Den Bibel, Inhoudende dat Oude ende Nieuwe Testament (Biestkensbijbel)

¶ Dat .lvij. Capittel.

¶ Hy straft de groote ontrouwe der valscher Propheten, der godlooser ouerheyt, ende de ouertredinghe des valschen volcx. Ende by dien belooft hy de ghenade ende barmherticheyt Godts, allen den ghenen die wederkeeren.

1

⁺ENde ghy coemt herwaerts, ghy kinderen der dachverkieserinnen,^† ghy saet der Ouerspeelders, ende der hoeren.

+ A vers 1

† Mat. 12.d.39.

2

Aen wien wilt ghy nv uwen lust hebben? Ouer wien wilt ghy nv den mont op sperren, ende de tonghe wtsteken? En zijt ghy niet de kinderen der ouertredinghen, ende een valsch saet?

3

Ghy die in der hitte totten Afgoden loopt onde alle groene boomen^* ende vermoort de kinderen aen de beken, onder de steenclippen:

* Deut. 12.d.31. 18.b.9. Leu. 18.c.21. 20.a.2.

4

Dijn wesen is aenden gladden beecksteenen, die selue zijn v deel, den seluen ghiet ghy dijn Dranckoffer, daer ghy Spijsoffer offert. Soude ick my dies getroosten?

5

^† Ghy maeckt uwen Legher op eenen hooghen verheuen berch, ende gaet derwaerts op, om te offeren,

† Exo. 20.d.26.

6

^* Ende achter der dueren ende stijlen set ghy uwe gedachtenisse. Want ghy wentelt v van my, ende ghy gaet henen op, ende maeckt uwen Legher wijt, ende ghy verbindt v met hen. Ghy bemint haren Legher, soo waer ghy die siet.

* Deut. 27.b.15

7

Ghy^† reyst met olie totten Coninck, ende hebt menigherley Cruyt,⁺ ende seyndet dijn Ambassaten verre henen, ende ghy zijt vernedert totter Hellen toe.

† Hose. 12.a.2.

+ B vers 7

8

Ghy verarbeyt v in de menichte dijnre weghen, ende en spreeckt niet: Ick latet. Maer want ghy vint een leuen dijnre handt, daerom en wort ghy niet moede.

9

Voor wien zijt ghy soo sorchuuldich, ende vreest so seer? So ghy doch met lueghenen omgaet, ende en ghedenct mijnder niet, ende en neemtet niet ter herten:^† Meynt ghy dat ick altoos swijgen sal, dat ghy my niet met allen en vreest?

† Psal. 50.b.21.

10

Maer ick wil uwe gerechticheyt cont doen, ende dijne wercken, dat sy gheen nutte zijn en sullen.

11

Als ghy roepen sult, soo laet v dijne hoopen helpen.^† Maer de wint salse alle wech voeren, ende ydelheyt salse wech nemen.^* Maer wie op my betrouwet, die sal dat Lant beeruen, ende mijnen heyligen berch besitten:

† Iob. 11.b.20. Sap. 5.c.15.

* Rom. 5.a.5.

12

Ende sal seggen:^* Maect bane, maeckt bane, ruymet den wech, neemt de aenstootinghe wt den weghe mijns volcx.

* Esai. 40.a.3.

13

⁺Wandt alsoo spreect de hooghe ende verheuene, die daer eewelijc woont, wiens Naem Heylich is: Ick die in de hoochte ende int Heylichdom woone,^† ende by den ghenen die van eenen verslaghenen ende ootmoedighen gheest zijn, op dat ick vermake den gheest der verootmoedichden, ende dat herte der verslaghenen.

+ C vers 13

† Ps. 34.c.19. 51 c.19. 147.a.3. Esaie. 61.a.1. 66.a.2.

14

Ick en wil niet eewelijck kijuen, ende oock niet altoos gram zijn: Maer eenen gheest sal van mijn aensicht waeyen, ende ick wil adem maken.

15

Ick was toornich op de onduecht haerder ghiericheyt, ende ick sloechse, Ick verberch my, ende was gram. Doen ghinghen sy herwaerts ende ghindts in den wech haers herten.

16

Maer doen ick hare weghen aensach, heelde ickse, ende leydese, ende gaf haer weder troost, ende den ghenen die ouer haer lieden rouwe droegen.

17

Ick wil vrucht der lippen scheppen, die daer prediken:^† Vrede, vrede, beyde den ghenen die verde zijn, ende den ghenen die na by zijn, spreect de HEEre, ende wilse heelen.

† Ephes. 2.c.16.

18

^† Maer de godloosen zijn als een ruysschende See, die niet stille ghesijn en can, ende wiens goluen dreck ende vuylnis wtwerpen.

† Esai. 48.d.22

19

De godloosen en hebben geenen vrede, spreect mijn Godt.