Den Bibel, Inhoudende dat Oude ende Nieuwe Testament (Biestkensbijbel)

¶ Dat .lvj. Capittel.

¶ Hier wordt verhaelt met welcke cleynodien dat haer de gemeynte Christi verchieren sal, ende toemaken tot zijnder toecoemst. De Propheet beclaecht oock hier de groote ontrouwe der valscher Propheten.

1

⁺ALso spreect de HEEre:^† Hout dat recht ende doet gerechticheyt.^* Want mijn Heyl is na by, dat het come, ende mijn gherechticheyt, datse gheopenbaert worde.

+ A vers 1

† Sapien. 1.a.1. Matt. 3.a.2.

* Esa. 47.a.1.

2

Wel den mensche, die sulcx doet, ende des menschen kindt, diet vast hout,^* dat hy den Sabbath houde ende niet en ontheylighe, ende houde zijn hant, dat hy niet quaets en doe.

* Esaie. 58.c.13.

3

Ende die vreemde die hem totten HEEre ghegeuen heeft, en sal niet seggen:^† De HEEre sal my scheyden van zijnen volcke. Ende de ghesnedene en sal niet segghen: Siet, ick ben eenen dorren boom.

† Deut. 23.a.1.

4

⁺Want also spreect de HEEre totten gesnedene, Die mijnen Sabbath onderhouden, ende verkiesen wat my wel behaecht, ende mijn verbont vast vatten: Ic wil hen in mijnen huyse ende binnen mijne mueren een plaetse geuen, ende eenen beteren Naem dan den sonen ende dochteren:

+ B vers 4

5

^† Eenen eewigen Naem wil ick hen gheuen, die niet vergaen en sal.

† Ioan. 1.a.12.

6

^* Ende der vreemder kinderen, die hen totten HEEre ghegheuen hebben, dat si hem dienen, ende zijnen Naem lief hebben, op dat sy zijne knechten souden zijn, een yeghelijck die den Sabbath houdt, also dat hy hem niet en ontwijet, ende mijn verbont vast houdt.

* Sap. 3.d.14.

7

Die selue wil ick tot mijnen heylighen berghe brenghen, ende wilse verblijden in mijnen bedehuyse, ende haren offer ende Brandtoffer sullen my aenghenaem zijn, op mijnen^* Altaer.^† Wandt mijn huys heet een bedehuys allen volcken.

* Psa. 43.a.4

† 3.Re. 8.f.38. Matt. 21.b.13. Marc. 11.b.17 Luc. 19.d.42.

8

De HEERE HEEre, die de verstooten wt Israel te samen vergadert, spreect:^* Ick wil noch meer totten hoope die verghadert zijn, vergaderen.

* Ioan. 10.b.16

9

⁺Alle dieren opten velde, coemt ende verslint, Ia alle dieren inden woude.

+ C vers 9

10

^† Alle haer wachters zijn blint, sy en weten alle niet. Stomme honden zijn sy, die niet straffen en connen, zijn luy, ligghen ende slapen gheerne.

† Iere. 12.b.10. Mat. 15.b.14

11

Maer het zijn stercke honden van lijue, die nemmermeer sadt gheworden en connen, Sy, die Herders, en weten geen verstant,^* een yegelijc siet op zijnen wech, een yegelijck ghiert voor hem seluen in zijnen staet.

* Iere. 6.b.13.

12

^† Coemt herwaerts, laet ons wijn halen, ende ons vol suypen, ende het sal morghen zijn, als heden, ende noch veel meer.

† Esaie. 22.b.13. Sap. 2.b.7. Esaie. 5.b.11.

13

Maer de Rechtuaerdighe vergaet, ende daer en is niemandt diet ter herten neme. Ende heylige Lieden worden wech gheruckt, ende niemant en acht daer op. Want de Rechtuaerdighe worden wech gheruct, voor dat ongheluck.

14

^† Ende die oprechtelijck voor haer seluen ghe-

† Sapien. 3.a.3. 4.a.1.

[p. 20r]

wandelt hebben, comen tot vrede ende ruste in haren cameren.