Den Bibel, Inhoudende dat Oude ende Nieuwe Testament (Biestkensbijbel)

¶ Dat .lv. Capittel.

¶ Godt de HEEre biet zijne ghenade, ende noodet alle menschen tot zijne maeltijt, die welcke hy in Christo bereyt heeft, ende dat profijt zijns lijdens wort hier beschreuen.

1

⁺VVel aen,^† alle ghy die dorstich zijt, coemt hertwaerts totten watere, ende ghy, die gheen ghelt en hebt, coemt herwaerts, coopt ende eet, Coemt herwaerts ende coopt sonder ghelt ende om niet beyde wijn ende^* melck.

+ A vers 1

† Eccle. 51.d.33. Ioan. 7.d.37. Apoc. 22.d.17.

* 1.Pet. 2.a.2. 1.Cor. 3.a.2.

2

Waerom telt ghy ghelt henen, daer gheen broot en is, Ende uwen arbeyt, daer ghy niet sadt af worden en condt?^† Hooret doch na my, ende etet dat goede, soo sal uwe siele in wellust vet worden.

† Esaie. 1.c.19.

3

Neyghet uwe ooren herwaerts, ende coemt herwaerts tot my, hoort, soo sal uwe siele leuen.^* Want ic wil met v een eewich^† verbont maken, te weten: De sekere ghenade Dauids.

* Ezec. 37.d.26. 60.f.16. Act. 13.d.34.

† 2.Reg. 7.c.13

4

⁺Siet, ick hebbe hem den Lieden tot eenen ghetuyghe gheset, tot eenen Vorste ende gebiedere den volcken.

+ B vers 4

5

Siet, ghy sult Heydenen roepen die ghy niet en kent, Ende de Heydenen, die v niet en kennen sullen tot v loopen om des HEEREN dijns Gods wille, ende des Heylighen in Israel, die v prijst.

6

^* Soect den HEEre, dewijle dat hy te vinden is: Roept hem aen, dewijle dat hy na by is.

* Math. 7.a.7.

7

^‡ De godloose late af van zijnen weghe, ende de quaetdoender van zijne gedachten^† ende bekeere hem totten HEEre, so sal hy hem zijnder ontfermen, ende tot onsen Godt, want by hem is vele vergheuinge.

‡ Ezec. 18.e.27. 33.b.11.

† Tob. 13.b.8.

8

^* Want mijn gedachten en zijn niet uwe gedachten: Ende dijne wegen en zijn niet mijne wegen, spreect de HEEre.

* 4.Esd. 4.c.21. Sap. 9.b.16. 1.Cor. 2.b.14.

9

Maer so veel den Hemel hoogher is dan de Aerde, so zijn ooc mijne wegen hooger dan uwe weghen, ende mijne gedachten dan uwe gedachten.

10

⁺Want gelijck als den^† regen ende sneeu vanden hemel valt, ende derwaerts niet weder en coemt, maer maeckt de Aerde vocht ende vruchbaer, ende groeyende, datse saet gheeft te saeyen, ende broodt te eten.

+ C vers 10

† Deut. 32.a.2.

11

Alsoo sal dat woort, dat wt mijnen monde gaet, oock zijn.^* Het en sal niet ledich weder tot my comen, maer doen dat my behaecht, ende sal hem gheluckich zijn, daer icket toe seynde.

* Matt. 13.c.23. Colloss. 1.a.5.

12

Want ghy sult in vruechden wt trecken, ende in vreden gheleyt worden, Berghen ende Hueuelen sullen voor v henen vrolijck zijn met roem, ende alle boomen opten velde, metten handen clappen.

13

Daer sullen dennen voor bosschen wasschen, ende Myrten voor doornen. Ende de HEEre sal eenen Name ende eewich Teecken zijn, dat niet wtgheroyt en worde.