Den Bibel, Inhoudende dat Oude ende Nieuwe Testament (Biestkensbijbel)

¶ Dat .liiij. Capittel.

¶ Wt de Ioden ende Heydenen sal een eenige kercke Christi worden, zijn bruyt ende huysvrouwe, ende wat vruechde ende gauen dat die van Christo vercrijghen sullen, dat wordt beschreuen.

1

⁺VErblijt v,^* ghy onuruchtbare die niet en baert, weest vrolijck met roem, ende iuychet, ghy die niet beurucht en zijt, wandt die eensame heeft meer kinderen, dan die den man heeft, seyt de HEEre.

+ A vers 1

* Gall. 4.c.27. Sapi. 3.c.13. Luc. 23.d.29.

2

Maeckt de ruymte dijnre hutten wijdt, ende breydet wt de Tapeten dijnre Wooningen, en spaertse niet, trect dijne Reepen lanck, ende steect dijne nagelen vast in.

3

Want ghy sult ter rechter ende ter slincker sijden wtbreken, ende dijn saedt sal de Heydenen beeruen, ende inde verwoeste Steden woonen.

4

^† En vreest niet, want ghy en sult niet te schande worden: En wordt niet bloode, wandt ghy en sult tot spotterije niet worden. Maer ghy sult der schanden dijnre ionckfrouschaps vergheten, ende de versmaedtheyt dijns weduweschaps niet meer ghedencken.

† Esai. 41.b.10. 43.a.1.

5

^* Want die v gemaect heeft^† is dijn man.^‡ HEre Sebaoth heet zijnen Naem, ende dijn verlosser, die Heylige in Israel, die alder werelt Godt ghenoemt wort.

* Esa. 62.a.4

† Ioan. 3.c.29 2.Cor. 11.a.2. Ephes. 5.d.23.

‡ Esai. 48.a.2

6

Wandt de HEEre heeft v laten int gheruchte zijn, dat ghy zijt, als een verlaten ende van herten bedroeft wijf, Ende ghelijck een ionck wijf die verstooten is spreect dijn Godt.

7

^+* Ic heb v een cleyn oogenblick verlaten: Maer met grooter barmherticheyt wil ick v vergaderen.

+ B vers 7

* Psal. 30.a.6.

8

Ick heb mijn aensicht in een ooghenblick des toorns een weynich van v verborghen:^† Maer met eewigher ghenade wil ick my dijnre ontfermen, spreeckt de HEEre, dijn verlosser.

† Mich. 7.c.19.

9

Wandt sulcx sal my zijn ghelijck dat water Noah^* doen ick swoer, dat de wateren Noah niet meer en souden ouer den Aerdtbodem gaen. Alsoo hebbe ick ghesworen, dat ick op v niet toornich zijn noch schelden en wille.

* Gene. 9.b.11.

10

Wandt Berghen sullen wel wijcken, ende Hueuelen veruallen. Maer mijn ghenade en sal niet van v wijcken, ende dat verbont mijns vredes en sal niet veruallen, seyt de HEEre dijn ontfermer.

11

Ghy ellendighe, ouer de welcke alle tempeesten gaen, ende ghy troosteloose,^† Siet, ick wil dijne steenen als een chieraet leggen, ende ick wil dijn fundament met^* Saphyren legghen,

† Esai. 60.b.10.

* Apoc. 21.c.19.

12

Ende uwe vensteren van Crystalle maken, ende uwe poorten van Robinen, ende alle uwe palen van wtghelesen steenen,

13

^+† Ende alle uwe kinderen geleert vanden HEEre, ende grooten vrede uwen kinderen.

+ C vers 13

† Ioan. 6.e.45. 1.Ioan. 2.d.27

14

Ghy sult door gherechticheyt bereyt worden. Ghy sult verre van ghewelt ende onrecht zijn, dat ghy daer voor niet en derft vreesen, ende verschricken, want sy en sal v niet ghenaken.

15

Siet, wie wil hem teghen v vergaderen, ende v oueruallen, aenghesien dat sy haer vergaderen sonder my?

[p. 19v]

16

Siet, ick doet, dat de smit die de colen int vyer opblaest, een instrument daer af make tot zijnen wercke: Want ick doet, dat de verderuer vergaet.

17

Want alle instrument dat teghen v bereyt wordt, dien en salt niet ghelucken.^* Ende alle tonge die haer tegen v settet, sult ghy int Oordeel verdoemen. Dat is dat Erue der knechten des HEEren, ende haer gerechticheyt van my, spreect de HEEre.

* Luc. 21.b.14. Actor. 6.b.10.