Den Bibel, Inhoudende dat Oude ende Nieuwe Testament (Biestkensbijbel)

¶ Dat .liij. Capittel.

¶ De Propheet beclaecht hem wt medelijden ende smerten vander verstoctheyt ende verhertheyt des volcx, die den wtgerecten arm Gods, dats den gheopenbaerden Christum niet aennemen en sullen. Daerna beschrijft hy voorder opt voorgaende de verneertheyt ende hoocheyt Christi.

1

⁺SIet, mijn knecht sal wijsselijck handelen, ende sal verhoocht ende seer hooch verheuen worden

+ A vers 1

2

^† Datter vele om uwen wille haer vererghe-

† Math. 15.b.12 Ioan. 6.e.60.

[p. 19r]

ren sullen, omdat zijn gedaente mismaecter is, dan andere Lieden, ende zijn Aensien, dan der menscen kinderen.

3

Maer also sal hy veel Heydenen besprenghen, dat oock Coninghen haren mont teghen hem sullen toe houden.^* Want den welcken daer niet af vercondicht en is, die selue sullent met lust sien: Ende die daer niet af ghehoort en hebben, die sullent mercken.

* Esaie. 65.a.1. Rom. 15.c.21.

4

^† Maer wie gelooft onser predicatie? Ende wien wordt den arm des HEEren gheopenbaert? Want hy schiet voor hem op, ghelijck als een rijs, ende ghelijck als een wortel wten dorren Aertrijcke.

† Ioan. 12.d.38. Rom. 10.c.16.

5

Hi en heeft gheen ghedaente noch schoonte. Wy saghen hem, maer daer en was geen ghedaente die ons behaecht hadde.

6

Hi was die alder verachste ende onweertste, vol smerten ende crancheden. Hy was also veracht, datmen daensicht voor hem verborch, daerom en hebben wy hem niet gheacht.

7

^† Voorwaer hy droech onse crancheden, ende onse smerten nam hy op hem: Maer wy hielden hem voor den genen, die van Gode geslaghen ende gemartert ware.

† Matt. 8.b.17. 1.Pet. 2.c.24.

8

^† Maer hy is om onser misdaden wille gewont, ende om onser sonden wille gheslaghen. De straffinghe leyt op hem, op dat wy vrede hadden, ende door zijne wonden zijn wy gheheelt.

† 1.Cor. 15.a.3.

9

^+* Wy ghingen alle dolende gelijc als schapen, een yegelijc sach op zijnen wech: Maer de HEEre worp onser alder sonden op hem.

+ B vers 9

* Ps. 119.y.177. 1.Pet. 2.d.25.

10

Doen hy ghestraft ende gemartert werdt, en dede hy zijnen mondt niet op,^† ghelijc als een^* Lam, dat totter slachbancken geleyt wort, ende ghelijck als een schaep, dat stomme wordt, voor zijnen scheerder, ende zijnen mont niet op en doet.

† Iere. 11.d.19. Mat. 27.b.14 Act. 8.d.31.

* Ioan. 1.c.29. 1.Cor. 5.b.6.

11

Maer hy is uyt den ancxt ende Gerichte genomen.^* Wie wil zijns leuens lengde wtspreken? Want hy is wt den lande der leuender wech gheruct, doen hy om de misdaet mijns volcs geplaecht was,

* Mich. 5.a.1. Coll. 1.b.15.

12

Ende hy is begrauen, gelijc als de godloosen, ende gestoruen als een rijcke.^† Hoewel hy niemanden onrecht ghedaen en heeft, noch eenich bedroch in zijnen mont gheweest en is.

† 1.Pet. 2.c.22. 2.Cor. 5.c.21. 1.Ioan. 3.a.5.

13

Maer de HEERE woude hem alsoo slaen met crancheden.^† Wanneer hi zijn leuen tot een schultoffer ghegheuen heeft, so sal hy saet hebben, ende lange leuen. Ende des HEEren voornemen sal door zijn hant voortgaen.

† Ioan. 12.c.24. Rom. 8.d.32.

14

Daeromme dat zijn siele ghearbeyt heeft, soo sal hy zijnen lust sien, ende volheyt hebben.^* Ende door zijn kennisse sal hy mijn knecht, die rechtuaerdighe, vele rechtuaerdich maken:^* Wandt hy draecht haer sonden.

* Rom. 3.c.24.

* Ioan. 1.c.29. 1.Pet. 2.c.24.

15

Daerom wil ick hem een groote menichte tot eender buete gheuen,^‡ ende hy sal de stercke tot eenen roof hebben. Daeromme dat hy zijn leuen inden doot ghegheuen heeft,^† ende den misdadighen ghelijck gerekent is, ende hy veelder sonden ghedraghen heeft,^* ende voor de Ouertreders ghebeden.

‡ Coll. 2.b.15.

† Mar. 15.c.28 Luc. 22.c.37.

* Luc. 23.c.33.