Den Bibel, Inhoudende dat Oude ende Nieuwe Testament (Biestkensbijbel)

¶ Dat .lij. Capittel.

¶ Hy gaet noch wat beter voort metter belouinge Messie, hy verblijt de Ioden ende de Heydenen totter toecoemst des Salichmakers.

1

⁺MAect v op, maect v op Sion, trect uwe stercte aen, verciert v heerlijcken^† ghy heylige stadt Ierusalem.^* Want daer en sal voort meer gheen onbesneden oft onreyne in v regeren.

+ A vers 1

† Apoc. 21.b.10.

* Esai. 35.b.8. Apoc. 21.d.27.

2

Maect v wt het stof,^† staet op ghy gheuanghene Ierusalem, Maect v los van de banden dijns hals, ghy gheuanghene dochter Sion.

† Esai. 51.d.17

3

Want also seyt de HEEre:^* Ghy zijt om niet vercoft,^‡ ghy sult oock sonder ghelt ghelost worden.

* Rom. 7.b.11 Esaie. 50.a.1.

‡ 1.Pet. 1.18.

4

Want also spreect de HEEre HEEre:^* Mijn volc trock ten eersten af in Egipten, op dattet aldaer een gast ware,^† Ende Assur heeft hem sonder oorsake ghewelt ghedaen.

* Gen. 46.a.1 Exod. 1.a.1.

† 4.Re. 18.a.9

5

Maer hoe doetmen my nv hier? Spreect de HEEre. Mijn volck wordt om niet verleyt, Sijne heerschappers maken enckel huylinge, spreect de HEEre.^* Ende mijnen Naem wort daghelijcx altijt ghelastert.

* Ezec. 36.d.20. Rom. 2.c.24.

6

⁺Daerom sal mijn volck mijnen Name kennen ter seluer tijt, Want siet, ick wil selue spreken.

+ B vers 6

7

^* Hoe lieflijck zijn op de berghen de voeten der boden, die daer vrede vercondigen, wat goets prediken, Heyl vercondighen. Die daer seggen tot Sion: Dijn Godt is Coninck.

* Nah. 2.b.15. Rom. 10.c.15. Esai. 33.a.7.

8

^† Dijne wachters roepen luyde met haerder stemme, ende glorieren allen met malcanderen, Want men salt met oogen sien, als de HEEre Sion bekeert.

† 1.Ioan. 1.a.2. Esai. 62.b.6.

9

^† Laet vrolijck zijn, ende met malcanderen glorieren dat woeste te Ierusalem. Wandt de HEEre, heeft zijn volck ghetroost, ende Ierusalem verlost.

† Esai. 49.c.13.

10

De HEEre heeft zijnen heyligen arm vertoont, voor de ooghen alder Heydenen,^* alle der werelt eynde siet dat Heyl onses Gods.

* Psal. 98.a.3.

11

^+* Wijckt, wijct, trect wt van daer, ende en ruert niet onreyns aen, Laet uyt van haer, Reynicht v, ghy die des HEEren ghereetschap draghet.

+ C vers 11

* 2.Cor. 6.c.17. Apoc. 18.b.4.

12

Wandt ghy en sult metter haest niet wt trecken, noch metter vlucht wandelen.^* Wandt de HEERE sal voor v henen trecken, Ende de Godt Israels, sal v by een vergaderen.

* Exod. 13.d.21.