Den Bibel, Inhoudende dat Oude ende Nieuwe Testament (Biestkensbijbel)

¶ Dat .l. Capittel.

¶ De Sinagoge hadde haer int voorgaende capittel beclaecht, dat sy van Godt verstooten was, Op dat antwoort hier onse HEEre Godt, ende bewijst dat de schult haer sy, wandt sy hem onghetrouwelijck verlaten hadde, ende met vreemde Goden ghehoereert.

1

⁺ALsoo spreect de HEEre:^† Waer is den Scheytbrief dijns Moeders daer ickse mede verlaten hebbe? Oft wie is mijnen Woekenaer dien ick v vercocht hebbe?^† Siet, ghy zijt om uwer sonden wille vercocht, Ende uwe Moeder is om uwer ouertredens wille verlaten.

+ A vers 1

† Deut. 24.a.1.

† Esaie. 52.a.3. 59.a.1.

2

Waerom quam ick, ende daer en was niemandt?^* Ick riep, ende niemandt en antwoorde?^‡ Is mijn hant nv so cort gheworden, dat sy niet verlossen en can? Oft en is by my gheen cracht te verlossen?^† Siet, met mijn schelden maeck ick de See droogh,^* ende make de waterstroomen als een woestijne, dat hare visschen van gebreck des waters stincken, ende vanden dorst steruen.

* Prou. 1.c.24. Esai. 65.b.11. 66.a.4. Iere. 7.b.13.

‡ Esaie. 59.a.1 Num. 11.e.23.

† Exo. 14.e.21

* Iosu. 3.d.16.

3

^‡ Ick becleede den Hemel met donckerheyt, ende make zijn decsel als eenen sack.

‡ Exo. 10.e.22.

4

⁺De HEERE HEEre heeft my een gheleerde tonghe ghegheuen, dat ick wete met den moeden ter rechter tijt te spreken. Hy wecket my alle morghen, Hy wect my dat oore, dat ick hoore, ghelijck als een^† Discipel.

+ B vers 4

† Leeriongen.

5

^‡ De HEERE HEEre heeft my dat oore gheopent, ende ick en ben niet onghehoorsaem, ende ick en ga niet achterwaert.

‡ Psa. 40.b.7 Heb. 10.a.7.

6

^* Ick hielt mijnen rugghe tot den ghenen die my sloeghen, ende mijn wanghen dien, die my ructen. Mijn aensicht en verborch ick niet voor smaet ende speecsel.

* Matt. 26.g.67. Luce. 22.e.64 Ioan. 18.c.22.

7

Wandt de HEEre HEEre helpt my, daerom en worde ick niet tot schanden. Daerom hebbe ick mijn aensicht gheboden, als eenen keysteen. Want ick weet, dat ick niet te schande en worde.

8

^‡ Hy is na by die my rechtueerdicht. Wie wil met my kijuen? Laet ons te samen treden, wie isser die tot my recht heeft? Die come herwaerts tot my.

‡ Rom. 8.f.34. Iob. 34.d.30.

9

Siet, de HEERE HEEre helpt my, Wie isser die my wil verdoemen?^* Siet, sy sullen altemael als een cleet verouden,^† de Motten sullense eten.

* Ps. 102.d.25.

† Psal. 51.b.8.

10

⁺Wie isser onder v Lieden die den HEEre vreest, die zijns knechts stemme hoore, Die inder duysternissen wandelt, ende hem geen [licht] en schijnt? Die hope op den Naem des HEEren, ende verlate hem op zijnen Godt.

+ C vers 10

11

Siet, ghi alle, ghy die een vyer aensteeckt metter vlammen toebereyt, Wandelt henen int licht ws viers, ende inder vlammen die ghy aenghesteken hebt. Sulcx gheschiet v van mijnder handt, In smerte moet ghy ligghen.