Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlix. Capittel.

¶ Onder den persoone des Propheten, so wort de toecoemste ende dat offcie Christi beschreuen ende ingebracht, dat de salicheyt niet alleen den Ioden maer ooc den Heydenen vercondicht wort.

1

⁺HOort my, ghy Eylanden, ende ghy Volcken ghy die verre zijt, merckt op. De HEEre heeft my geroepen van Moeders lichaem aen, hy heeft mijns naems ghedacht, doen ick noch in Moeders lichaem was.

+ A vers 1

2

^† Ende heeft mijnen mont gemaect gelijck als een scherp^* Sweert, met de schaduwe zijnder hant heeft hy my bedect. Hy heeft my tot eenen reynen Pijle ghemaect, ende my in zijnen Koker ghesteken.

† Esaie. 51.c.16.

* Ephe. 6.b.17.

3

Ende sprack tot my: Ghy zijt mijn knecht Israel^† door den welcken ick ghepresen wil worden.

† Ioan. 17.a.4

4

Maer ic dacht: Ick arbeydede te vergeefs, ende brachte mijn crachte te vergheefs ende onnuttelijcken toe. Hoe wel nochtans mijn sake des HEEren, ende mijn Officie mijns Godts is.

5

Ende nv spreect de HEEre, die my van Moeders lichaem aen, tot zijnen knecht toe bereyt heeft, dat ick Iacob tot hem soude bekeeren, op dat Israel niet en soude wech gheruckt worden. Daerom ben ick voor den HEEre heerlijck,⁺ Ende mijnen Godt is mijn sterckte,

+ B vers 5

6

Ende spreeckt: Het is een cleyn dinck, dat ghy mijn knecht zijt, om de gheslachten Iacobs op te rechten, ende dat verroeckeloosde in Israel, weder te brenghen.^† Maer ick hebbe v oock tot een Licht der Heydenen ghemaect, op dat ghy sout zijn mijn Heyl, tot aen de eynden der werelt.

† Act. 13.e.47. Ioan. 8.b.12. Esaie. 42.a.6 Luc. 2.e.32.

7

Alsoo spreect de HEEre, de verlos-ser Israels, zijn heylighe, tot de verachte sielen, totten volcke, waer af men eenen grouwel heeft, totten knecht, die onder de Tyrannen is. Coninghen sullen sien, ende opstaen, Ende Vorsten sullen aenbidden, om des HEEren wille,^‡ die getrouwe is, om des heylighen in Israels wille, die v wtuercoren heeft.

‡ Deut. 32.a.4. 1.Cor. 1.a.8.

8

De HEEre spreect alsoo:^† Ick hebbe v verhoort ter genadigher tijt, ende hebbe v inden daghe des Heyls gheholpen,^† ende hebbe v behoedt, ende tot een verbondt onder dat volck ghestelt, op dat ghy dat Landt soudt oprechten, ende dat verdestrueerde erffenisse in sout nemen,

† 2.Cor. 6.a.2.

† Esai. 42.a.6.

9

⁺Om te segghen totten gheuanghenen: Gaet wt, Ende totten ghenen, inde duysternissen: Coemt hier voor, op dat sy haer opten weghe weyden, ende op alle Hueuelen hare weyde moghen hebben.

+ C vers 9

10

Sy^† en sullen, noch hongher, noch dorste meer hebben,^* Haer en sal oock gheen hitte, noch Sonne steken, Wandt die haerder ontfermhertich is, die salse leyden, ende salse aender waterfonteyn leyden.

† Apo. 7.c.16.

* Psal. 121.a.6

11

Ick wil alle mijne Berghen tot weghen maken, ende mijn voetpaden sullen ghebanet zijn.

12

Siet, dese sullen van verre comen, Ende siet, de ghene van Noorden, Ende dese vander See, Ende de ghene vanden Lande Sinim.

13

^† Iuychet ghy Hemelen, verhuecht v Aerde, loeft ghy Berghen met Iuychen. Wandt de HEERE heeft zijn Volck ghetroost, ende het iammert hem haerder ellenden.

† Esai. 44.d.23 52.b.9.

14

Maer Sion spreect:^† De HEERE heeft my verlaten: De HEERE heeft mijns vergheten.

† Psa. 112.a.6.

15

^* Mach ooc een vrouwe haers kints vergheten, dat sy niet en ontferme des soons van haeren Lichaem? Ende oft sy des seluen al vergate, so en wil ick nochtans ws niet vergheten.

* Iere. 14.d.21.

16

⁺Siet, inde handen hebbe ick v gheteeckent, uwe mueren zijn altijt voor my,

+ D vers 16

17

Vwe Boumeesters sullen haer haesten: Maer uwe verdestrueerders ende verwoesters sullen hen daer af maken.

18

^* Heft uwe ooghen op rontom, ende siet, alle dese comen vergadert tot v. Soo waerachtelijck als ick leue, spreeckt de HEEre: Ghy sult met alle dese ghelijck als met een chieragie bedect worden, ende sultse om v nemen als een Bruyt.

* Gen. 15.a.5. Esai. 60.a.4. Matt. 8.b.11.

19

Wandt dijn woest, verdestrueert, ende verdoruen Landt, dat sal v dan te enghe worden, om daer in te woonen, als uwe verderuers verre van v comen,

20

^* Alsoo dat de kinderen uwer onvruchtbaerheyt voorder segghen sullen voor uwen ooren: De ruymte is my te enghe, schict v wat ghintswaerts, dat ick by v woonen mach.

* Ioan. 1.a.12.

21

Maer ghy sult segghen in v herte: Wie heeft my dese ghewonnen? Ick ben onvruchtbaer, alleene, verdreuen, ende verstooten, Wie heeft my dese opgeuoet? Siet, Ick was eensaem ghelaten, van waer waren dan dese?

[p. 18r]

22

⁺Alsoo spreeckt de HEEre HEEre: Siet, Ick wil mijn handt totten Heydenen opheffen, ende totten volcken mijn Baniere opwerpen, soo sullen sy uwe sonen inden armen brenghen, ende uwe dochteren op de schouderen draghen.

+ E vers 22

23

^† Ende de Coninghen sullen^* uwe Voesterheeren, ende haer^† Vorstinnen uwe Voestervrouwen zijn.^* Sy sullen voor v neder vallen ter Aerden op het Aensicht, ende dat stof uwer voeten lecken. Dan sult ghy beuinden, dat ick de HEEre ben,^† aenden welcken niet beschaemt en worden, die op my wachten.

† Esai. 60.c.16

* 1.Tess. 2.a.7

† Princessen.

* Act. 14.b.12.

† Rom. 9.d.33. Eccles. 2.b.12. Psal. 25.a.3.

24

Canmen oock eenen Ruese den roof nemen? Oft canmen den Rechtuaerdighen zijne gheuanghenen los ghemaecken?

25

Wandt alsoo spreect de HEERE:^† Nv sullen de gheuanghenen den Ruese genomen worden,^* ende den roof des stercken los worden, Ende ick wil teghen uwe Kijuers kijuen, ende uwe kinderen helpen.

† Luc. 11.c.22. Ephes. 4.a.8.

* Collo. 2.b.15

26

Ende ick wil uwe Scheynders spijsen met haer eyghen vleesch, Ende sy sullen van haren eygen bloet, ghelijc als van soeten Wijn droncken worden. Ende alle dat vleesch sal beuinden, dat ick de HEEre ben, dijn Heylandt, ende dijn Verlosser, de machtighe in Iacob.