Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlviij. Capittel.

¶ De straffinghe die hy inden xl. Capittel beghonnen heeft, die besluyt hy hier als inder summa. Hy verwijt haer hare ouertredinghen ende ontrouwe.

1

⁺HOort dat, ghy vanden huyse Israels^† ghy die metten naem Israels ghenoemt wordt, ende wt den water Iuda geuloten zijt. Ghy die byden Naem des HEEren sweert, ende ghedencket des Godts in Israel: Maer niet inder waerheyt noch gherechtichheyt.

+ A vers 1

† Matt. 3.a.9.

2

Want sy noemen haer wt der heyligher stadt, ende pochen opten Godt Israels,^† die daer heet de HEEre Sebaoth.

† Esai. 51.c.15. 54.a.5. Iere. 31.f.35.

3

^* Ick hebbe te voren vercondicht dit toecomende, het is wt mijnen monde gecomen, Ende ick hebt doen segghen, Ick doet oock bottelijcken dattet coemt.

* Esa. 46.b.9

4

Want ick weet dat ghy hert zijt, ende uwen neck is een yseren ader, ende dijn voorhooft is metalen.

5

Ick hebt v te voren vercondicht, ende hebt v doen segghen, eer dant ghecomen is, op dat ghy niet segghen en cont: Mijn Afgodt doetet, ende mijn beelt, ende Afgodt heuet beuolen.

6

⁺Sulcx alle hoordy, ende sietet ende en hebbet nochtans niet vercondicht. Wandt ick hebbe v te voren wat nieus doen segghen, ende wat verborghens, dat ghy niet en wistet.

+ B vers 6

7

Maer nv ist geschapen, ende niet op dat mael, ende ghy en hebt daer niet eenen dach te voren af ghehoort, op dat ghy niet ghesegghen en condt: Siet, dat wist ick wel.

8

Wandt ghy en hoordet niet, ende ghy en wistet ooc niet, ende dijn oore en was op dat mael noch niet geopent. Maer ic wistet wel, dat ghy verachten sout, ende van Moeders lichaem aen een ouertreder ghenoemt zijt.

9

Daerom ben ick om mijns naems wille lanckmoedich, ende om mijns roems wille wil ic my, v tot profijt, onthouden dat ghy niet wtgheroeyt en wort.

10

Siet, ic wil v suyueren, maer niet als siluer,^* Maer ick wil v wtuercoren maken inden Ouen der ellenden. Om mijnen wille,

* Sap. 3.a.6. 1.Pet. 1.b.6.

11

Ia om mijnen wille so wil ict doen, op dat ick niet ghelastert en worde.^* Want ick en wil mijn eere gheenen anderen laten.

* Esai. 42.a.8.

12

⁺Hoort na my, Iacob, ende ghy Israel, dien ick geroepen hebbe. Ick bent,^* Ick ben de eerste, daer toe oock de laetste.

+ C vers 12

* Esai. 41.a.4. 43.b.10. 44.b.6. Apoc. 22.c.13.

13

Mijn hant heeft den Aerdbodem gefundeert, Ende mijn rechter hant heeft den Hemel omspannen. Wat ick roepe, dat staet alle daer.

14

Verghadert v alle ende hoort. Wie isser onder dese, die sulcx vercondigen can? De HEEre bemint hem. Daerom sal hy zijnen wil aen Babel, ende zijnen arm aen de Chaldeen bewijsen.

15

Ick, Ia ick hebt geseyt, Ick hebbe hem geroepen, ick wil hem oock laten comen, ende zijn reyse sal hem oock ghelucken.

[p. 17v]

16

Tredet herwaerts tot my, ende hoort dit,^* Ick en hebt niet int verborghen te voren gesproken. Van dier tijt aen doent ghesproken wert, ben ick daer. Ende nv seynt my de HEEre HEEre ende zijnen gheest.

* Esai. 45.c.19.

17

⁺Alsoo spreeckt de HEEre dijn Verlosser, de heylige in Israel:^† Ick ben de HEEre v Godt die v leert soo wat profijtelijck is, ende leyde v op den wech, daer ghy op gaet.

+ D vers 17

† Rom. 7.b.12. 1.Tim. 1.b.8. Titum. 3.b.8.

18

Och^* oft ghy op mijn gheboden mercte, so soude uwen vrede zijn ghelijck eenen waterstroom, ende dijn gherechticheyt, ghelijck als goluen der See,

* Deut. 28.

19

Ende v saet soude zijn, ghelijck als sant, Ende de vrucht dijns lichaems ghelijck als des seluen steentkens, welcx Naem niet en soude wtgheroyt worden, noch vernielt voor my.

20

^* Gaet wt van Babel, vliet vanden Chaldeen, met vrolijcken gheschalle, Vercondicht, ende latet sulcx hooren, Verbreydet tot aender wereldt eynden toe. Segt: De HEEre heeft zijnen knecht Iacob verlost.

* Iere. 51.a.6. 1.Esdr. 1.b.5.

21

Sy en hadden geenen dorst, doen hyse inder Woestijne leyde.^‡ Hy dede haer water wter steenrootse vloeden. Hy schuerde de steenrootse, dat daer water wt liep.

‡ Exod. 17.b.6. Num. 20.b.11.

22

^* Maer de Godloosen (spreect de HEEre) en hebben geenen vrede.

* Esai. 57.c.18