Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvij. Capittel.

¶ De hoochmoedighe Babiloniers werden ghedreycht met haerder verderffenisse, ende toecomende straffinghe, waer af hare goden ende beelden haer niet en sullen connen verlossen.

1

⁺HOort nae my, ghy van stouter herten, ghy die verre vander gherechticheyt zijt.^† Ick hebbe mijn gherechticheyt nae by ghebracht, si en is niet verre, ende mijn Heyl en^* versuymt niet. Want ic wil tot Sion dat Heyl geuen,

+ A vers 1

† Esai. 51.a.5. 56.a.1.

* Vertrect.

[p. 17r]

Ende in Israel mijne heerlijckheyt.

2

Heronder Maghet ghy dochter Babel stelt v int stof, settet v opter Aerden. Want de dochter der Chaldeen en heeft gheenen stoel meer. Men en sal v niet meer noemen, Ghy Teerdere ende lustighe.

3

Neemt de Muelen ende maelt Meel, vlechtet uwe vlechtsnoer wt, ontbloot den voet, ontdect de beenen, waedt doort water^† Dat uwe schamelheyt ontdect, ende uwe schande ghesien worde.

† Ezec. 16.d.37. Nahum. 3.a.5.

4

Ick wil my wreken, ende gheen mensche en salt my afbidden [Sulcx doet] onse Verlosser, die daer heet de HEERE Sebaoth, de heylighe in Israel.

5

Stelt v in dat stille, gaet inde duysternisse, ghy Chaldeesche dochter. Wandt ghy en sult niet meer heeten, een vrouwe ouer Conincrijcken.

6

^* Want doen ick op mijn volck toornich was, ende ontwijdde mijn Erfdeel, ghaf ickse ouer in dijn handt.^† Maer ghy en beweest haer gheen barmherticheyt, Oock ouer den Ouden maecte ghy uwe Iock al te swaer.

* 4.Reg. 25.a.1

† Prou. 21.b.13. Iere. 50.b.11.

7

Ende dachtet:^* Ick ben een Coninghinne inder eewicheyt. Ghy en hebt sulcx tot noch toe niet ter herten ghenomen, noch daer op ghedacht, hoe dattet met haer hier na gaen soude.

* Apoc. 18.b.7.

8

⁺Daerom hoort nv dit, ghy die in wellusten leuet, ende soo seker sittet,^† ende segt in dijn herte: Ick bent ende gheen meer, Ick en sal gheen weduwe worden, noch onuruchtbaer zijn.

+ B vers 8

† Esaie. 10.b.13. Apoc. 18.b.7.

9

Maer sulcx sal v alle beyde^† haestich comen op eenen dach dat ghy weduwe ende onuruchtbaer sult zijn. Ia volcomelijcken sullen sy v ouercomen, om der menichte wille uwer Toouenaren, ende om uwer besweerders wille welcker eenen grooten hoope by v is.

† Dan. 5.e.30.

10

^* Want ghy hebt v op uwe boosheyt verlaten, doen ghy dachtet:^† Men en siet my niet. Vwe wijsheyt ende Conste heeft v ter neder ghestooten, ende spraect in v herte: Ick bent, ende anders gheene.

* Ier. 49.c.16

† Esa. 29.c.15. Eccle. 23.d.25. Iob. 22.b.13. Ezech. 9.c.9.

11

Daerom salder een ongheluck ouer v comen, dat ghy niet en weet, wanneer dattet opgaet, Ende daer sal een ongeual op v vallen, dwelck ghy niet versoenen en cont. Want daer sal haestelijck een gedruyssche ouer v comen, daer ghy v niet voor en hoet.

12

Daeromme treedt nv herwaerts, met dijne besweerders, ende met den hoope dijnre Toouenaren, onder den welcken ghy v van dijnre Ionckheyt aen gheoeffent hebt,⁺ oft ghy dijns raet weet, oft dat ghy v muecht stercken.

+ C vers 12

13

Want ghy zijt moede, van de menichte dijnre opstellingen. Laet voort comen en v helpen,^* de Meesters des loops des Hemels, ende de Sterren kijkers, die na der Mane rekenen wat v ouer comen sal.

* Iere. 10.a.2.

14

Siet,^* sy zijn gelijck als stoppelen, die dat vyer verbernt. Sy en moghen haer leuen vander vlamme niet verlossen, Wandt het en sal gheen gloet zijn, daermen by ghewermen mach, noch oock een vyer, daermen rontom ghesitten conde.

* Malac. 4.a.1

15

Effen alsoo zijn sy, daer ghy v mede ghemoeyt hebt. Vwe hanteerders van dijnre iuecht op, Een yeghelijck sal zijns weechs herwaerts ende ghindtswaerts gaen, ende ghy en hebt gheenen hulper.