Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvj. Capittel.

¶ Van de verachtinge ende verstooringe der Beelden, Ende van de macht des warachtighen Godts.

1

⁺HOort na my, ghy vanden huyse Iacobs, Ende alle ouerghebleuene vanden huyse Israels,

+ A vers 1

2

Ghy, die van my inden Lichaem ghedraghen wort, ende my inder Moeder ligghet,

3

Ia, ick wil v draghen tot in dat ouderdom, ende tot dat ghy grijs wordt. Ick wilt doen, Ick wil heffen, ende draghen, ende verlossen.

4

^* Nae wien conterfeyt ghy? Ende by wien ghelijct ghy my dan? Teghen wien meet ghy my, dien ick ghelijck zijn soude?

* Esai. 40.c.25.

5

Sy^† schudden dat gout wten buydel, ende weghen daer dat siluer metter waghe, ende loonen den goutsmit,^* dat hy eenen God daer af make, voor den welcken si knielen ende aenbeden.

† Iudic. 17.b.4 Exod. 32.a.3.

* Psa. 115.a.4

6

^† Sy nemen hem op de schouderen, ende dragen hem, ende setten hem op zijn stede. Daer staet hy, ende en coemt van zijnder plaetse niet.⁺ Roept yemant hem aen, soo en antwoort hy niet, ende en helpt hem wt zijnder noot niet.

† Iere. 10.a.5. Baruch. 6.a.3

+ B vers 6

7

Ghedenct doch sulcx, ende weest vast ghy ouertreders, gaet in uwe herten. Gedenckt der voorledenen van oudts herwaerts,

8

^* Want ick ben Godt, ende niemant meer, Een Godt, wiens ghelijc nerghens en is.

* Deut. 32.f.39. Esai. 44.b.6 45.c.18. 1.Cor. 8.a.4.

9

Ick die te voren vercondighe, wat naemaels gheschieden sal, Ende te voren eer dattet gheschiet, ende segghe:^† Mijn voornemen dat blijft, Ende ick doe al dat my ghenuecht.

† Psal. 33.b.11.

10

^* Ic roepe eenen Voghel vanden Oosten, ende eenen man, die mijnen aenslach doe wt eenen verren lande. Wat ick segghe, dat laet ick comen: Wat ick dencke, dat doe ick oock.

* Exo. 16.c.13