Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlv. Capittel.

¶ De Propheet vertoeft noch in dien, dat hy bewijse den volcke, dat Godt alleen een warachtich Godt is, Ende sonderlinghe om dat hy toecomende dinghen voorseydt, Door Cyrum oft Corem, in eenen hoogheren verstant wort Christus bediet.

1

⁺ALso spreect de HEERE tot sinen ghesalfden, den Cores, dien ick by zijnder rechter hant neme, op dat ic de Heydenen voor hem onderwerpe, ende den Coninghen dat Sweert af gorde, op dat de duere worde voor hem gheopent, ende de poorten niet ghesloten en blijuen.

+ A vers 1

2

Ick wil voor v henen gaen, ende de Hueuelen effen maken.^† Ick wil de metalen dueren in tween slaen, ende de ijseren grendelen in stucken breken.

† Psa. 107.b.16

3

Ende ick wil v gheuen de heymelijcke schatten ende de verborghen Cleynodien, op dat ghy bekent, dat ic de HEERE, de God Israels, v met uwen naem ghenoemt hebbe,

4

Om^† Iacob mijns knechts wille, ende om Israel mijns wtuercorens wille. Iae ick riep v met uwen naem, ende noemde v doen ghy my noch niet en kendet:

† Gene. 39.a.5.

5

^† Ic ben de HEERE ende anders niemandt meer. Daer en is gheen Godt behaluen my:^* Ick hebbe v gherustet doen ghy my noch niet en kendet,

† Esai. 43.b.10 Deut. 32.f.39.

* Iere. 1.a.5.

6

Op datmen onderuinde, beyde vander Sonnen opganck, ende vander Sonnen nederganck, dat sonder my niet en is. Ick ben de HEEre, ende niemant meer.

7

Ick die dat Licht make, ende scheppe de duysternisse.^† Ick die vrede gheue ende scheppe dat quaet. Ick ben de HEEre, die sulcx al doet.

† Eccle. 11.b.5. Treno. 3.d.37 Iudi. 9.d.23.

8

Dauwet gy Hemelen van bouen nederwaerts, ende de Wolcken regenen de gherechticheydt. De Aerde doe haer op, ende brenghe Heyl, Ende gerechticheyt wasse daer mede by. Ick de HEERE scheppet.

9

Wee den genen die met sinen schepper kijft, te weten, dat scerf metten potbacker.

[p. 16v]

^† Spreeckt oock dat leem totten potbacker:⁺ Wat maect ghy? Ghy en bewijst uwe handen niet aen uwen wercke.

† Roma. 9.c.20 Esai. 29.c.16. Iere. 18.a.5.

+ B vers 9

10

Wee den ghenen die tot sinen Vader seyt: Waerom hebt ghy my ghewonnen, Ende totten wijue: Waerom baert ghy?

11

Alsoo spreect de HEEre de heylighe in Israel, ende haer meester: Eysschet van my de teekenen, wijset mijne kinderen, ende dat werck mijnder handen tot my.

12

Ic hebbe de Aerde ghemaect, ende den mensche daer op geschapen. Ic bent,^† wiens handen den Hemel wtghebreyt hebben, ende hebbe zijnen gantschen heyr gheboden.

† Gene. 1.a.1. Esai. 40.c.22. 44.e.24. Iere. 10.c.12.

13

Ick hebbe hem verweckt in gherechticheydt, Ende alle sine weghen wil ick effen maken.^† Hy sal mijne Stadt bouwen, ende mijne gheuangenen los laten, niet om ghelt, noch om gheschencke, seyt de HEEre Sebaoth.

† 1.Esd. 1.a.1.

14

Soo spreect de HEEre: Der Egiptenaers handel, ende der Mooren neeringhen, ende der langer Lieden tot Seba, sullen haer v opgheuen, ende v eyghen zijn: Sy sullen v volghen. In boeyen sullen si gaen, ende sullen voor v neder vallen, ende v smeecken. Want by v is God, ende daer en is anders geen Godt meer.

15

^† Voorwaer ghy zijt een verborghen Godt, ghy Godt Israels, de Heylandt.

† Roma. 11.d.33

16

Maer de^* Afgodenmakers moeten alle gader met schanden ende spot bestaen, ende deen metten anderen beschaemt wech gaen.

* Esai. 44.b.9

17

Maer Israel wort verlost door den HEEre, door een eewige verlossinghe, ende en wort niet tot schanden, noch tot eenen spot inder eewicheyt.

18

⁺Want also seyt de HEEre,^† die den Hemel gheschapen heeft, de Godt, die de Aerde toebereyt heeft, ende heeftse ghemaect, ende geordineert, Ende hy en heeftse niet gemaect, datse ledich zijn soude, mer heeftse toebereyt, datmen daer op woonen soude.^‡ Ick ben de HEEre, ende daer en is gheen meer,

+ C vers 18

† Genes. 1.a.1. Psal. 115.b.15. 124.a.8. 146.b.6. Act. 14.c.14. Apoc. 14.b.7.

‡ Esaie. 44.b.6. Deut. 32.f.39.

19

^* Ick en hebbe int verborghen niet gesproken, in duyster hoecken der Aerden. Ick en hebbe tot den sade Iacobs niet te vergeefs geseyt: Soect my. Want ick ben de HEERE die van gherechticheyt spreect, ende vercondighe dat daer recht is.

* Exo. 20.c.18. Esai. 48.c.16.

20

Laet haer vergaderen, ende by malcanderen herwaerts comen, De Helden der Heydenen, die niet en weten, ende sleypen hen met de blocken haerder Afgoden, ende smeecken den Godt die niet ghehelpen en can.

21

Vercondighet ende maect v herwaerts, hout raet met malcanderen. Wie heeft dit laten segghen van oudts herwaerts? Ende alsdoen vercondicht? En hebbe ict niet ghedaen de HEEre?^† Ende daer en is anders geen God, dan alleen ick, Een gherecht God, ende Heylandt, Ende daer en is gheen, dan ick.

† Ioan. 17.a.3. 1.Cor. 8.a.4. Deut. 4.f.35.

22

Keert v tot my, soo wordt ghy salich, Alle ghy eynden der werelt. Wandt ick ben Godt, ende niemant meer.

23

^† Ick sweere by my seluen, ende een woort der gherechticheydt gaet wt mijnen monde, daer salt by blijuen, te weten:^* Alle knien sullen haer voor my buyghen, ende alle tonghen sweeren ende segghen:

† Hebr. 6.b.13 Iere. 22.a.5.

* Ro. 14.b.11. Phil. 2.a.10. Psal. 22.d.30.

24

Inden HEEre hebbe ick gherechticheydt ende stercte. Sulcke sullen oock tot hem comen. Maer alle die hem wederstaen, moeten beschaemt worden.

25

^† Wandt dat gantsche saet Israels wort gherechtueerdicht inden HEEre, ende si sullen haer zijns beroemen.

† Rom. 10.a.4. Acto. 13.d.39.

26

Den^* Bel is ghebuycht, den Nebo is gheuallen, haer Afgoden zijn den dieren ende den Vee ten deele gheworden, dat si haer moede draghen aen uwen last. Ia si vallen ende buyghen haer altemael, ende en connen den last niet wech gebrengen, maer hare sielen moeten in de gheuanckenisse gaen.

* Iere. 50.a.2.