Den Bibel, Inhoudende dat Oude ende Nieuwe Testament (Biestkensbijbel)

¶ Dat .xliij. Capittel.

¶ Godt voorseyt door den Propheet de toecoemst ons Salichmakers, Door den welcken ooc de Heydenen tot een volck Godts aengenomen sullen worden, Ende hier wt bewijst hy dat hy alleen de warachtighe Godt is. Hy vermaent haer oock der voorledene weldaden, op dat si des te beter de toecomende gheloftenissen souden geloouen.

1

⁺ENde nv spreect de HEERE die v gheschapen heeft Iacob, Ende v Israel, ghemaect heeft:^† En veruaert v niet, want ic hebbe v verlost.^* Ic hebbe v by uwen naem gheroepen, Ghy zijt mijn.

+ A vers 1

† Esai. 41.b.10. 4.Re. 17.g.36

* Deut. 7.a.6 26.d.18.

2

^‡ Want als ghy doort water gaet, soo wil ick by v zijn, dat v de stroomen niet en sullen verdrincken,^† Ende als ghy int vier gaet, soo en sult ghy v niet verbernem, ende de vlamme en sal v niet ontsteken.

‡ Exo. 14.e.22

† Dan. 3.d.23. Psal. 66.b.12.

3

Want ick ben de HEEre dijn God, de heylighe in Israel, dijn Heylant. Ick hebbe Egipten, Morenlant, ende Seba in v plaetse tot een versoeninghe ghegeuen.

4

Want ghy so weert voor mijnen ooghen gheacht waret, daerom moet ghi oock heerlijck zijn, ende ick hebbe v lief. Daerom geue ick menschen in dijn plaetse, ende volcken voor dijn siele.

[p. 15v]

5

Daerom en verslaet v niet, want ick ben by v.^† Ick wil vanden Oosten uwe saet herwaerts brenghen, ende wil v vanden Westen versamen.

† Esai. 41.d.25. Matth. 8.b.11 Baruch. 5.a.2

6

Ende ick wil segghen tegent Noorden: Geeft herwaerts. Ende teghent Suyden: En keeres niet.^* Brengt mijne sonen van verre herwaerts, Ende mijne dochteren vanden eynden der werelt,

* Esai. 29.d.22.

7

Alle die met mijnen Naem ghenoemt zijn, namelijck, die ick gheschapen hebbe tot mijnder heerlicheyt, ende hebbe haer toebereyt ende gemaect.

8

^+† Laet hier voortreden dat blinde volck, welcke nochtans oogen heeft, ende de doouen, die nochtans ooren hebben.

+ B vers 8

† Luce. 14.c.21.

9

^* Laet alle Heydenen tsamen comen op eenen hoop, ende hen de volcken vergaderen, Wie isser onder haer, die sulcx vercondigen mach, Ende ons te voren hooren late, wat gheschieden sal? Laet haer hare ghetuyghen voortbrenghen, ende het bewijsen, soo salment hooren, ende seggen: Het is de waerheyt.

* Ephe. 3.a.6.

10

Maer ghy zijt mijne ghetuyge, spreect de HEEre, ende mijn knecht, dien ic vercoren hebbe, op dat ghy weten sout, ende my gheloouen, ende verstaen, dat ict ben.^† Voor my en is gheen God ghemaect, soo en salder oock nae my gheen wesen,

† Esai. 44.b.6 Apoca. 1.b.8.

11

Ick,^* Ic ben de HEEre, ende behaluen my en isser gheen Heylandt.

* Hoz. 13.a.4.

12

Ick hebt vercondicht, ende hebbe ooc gheholpen, ende ick hebt v doen segghen, Ende daer en is geen vreemde [Godt] onder v. Ghi zijt mijne ghetuygen, spreect de HEEre, soo ben ick God.

13

Oock ben ic eer dan eenich dach was,^† Ende daer en is niemant, die wt mijnder hant verlossen can. Ick wercke, Wie wilt keeren?

† Deut. 32.f.39. Iob. 10.a.7. Ioan. 10.c.29.

14

⁺Also spreect de HEEre uwe Verlosser, de heylige in Israel:^† Om uwen wille hebbe ick na Babel gesonden, Ende hebbe de grendelen alle hier onder ghestooten, ende de claghende Chaldeen inde schepen gheiaecht.

+ C vers 14

† Esai. 5.b.13.

15

Ick ben de HEEre uwe heylighe, Ick die Israel gheschapen hebbe, uwe Coninck.

16

Alsoo spreeckt de HEEre,^† die inder zee wegen,^* ende in stercke wateren banen maeckt.

† Exod. 14.e.21

* Iosue. 3.d.16

17

^‡ Die daer wt brengt wagen, ende peert, heyr, ende macht, dat si op eenen hoope daer neder ligghen, ende niet weder op en staen, dat si wtghebluscht worden ghelijck een lement wtghebluscht wordt.

‡ Esai. 10.a.5. 37.f.36.

18

En denct niet op dat oude, ende en acht niet op dat voorledene.

19

Want siet,^* Ic wil wat nieus maken, nv salt opgaen, dat ghy onderuinden sult,^† dat ick weghen inder woestijnen make, ende waterstroomen inder wildernissen,

* 2.Cor. 5.c.17. Apoca. 21.a.5.

† Psalm. 107.a.4. Esai. 35.b.6. 41.c.18. 44.a.3.

20

Iae dat my ooc de dieren opten Velde sullen prijsen, de Draken ende Struysen. Want ic wil wateren inder woestijne, ende stroomen inder wildernisse gheuen, om te drincken mijn volck, mijne wtuercorenene.

21

⁺Dit volck hebbe ick my bereyt, het sal mijnen Roem vertellen.

+ D vers 21

22

Niet dat ghy my gheroepen hadt Iacob, oft dat ghy om my ghearbeyt hadt Israel.

23

Want voorwaer, ghy en hebt my niet ghebracht de Schapen ws Brandt-offers, Noch my gheeert met uwen offeren.^* Vwen dienst in Spijsoffer en heeft my niet beuallen, Ende ick en hebbe ooc gheenen lust ghehadt aen uwen arbeydt int wieroocken.

* Esaie. 1.b.11. Iere. 7.c.20. Amos. 5.d.22. Psal. 40.b.7. 50.a.7. Mich. 6.b.7. Matt. 9.b.13.

24

Ooc en hebt ghy my om ghelt gheenen Calmus gecocht, noch met dat vette dijnre offerhanden en hebt ghy my niet gheuult. Iae my hebt ghi in uwen sonden arbeyt ghemaect, ende hebt my moeyte ghemaect in uwe misdaden.

25

Ick,^† Ick wisch wt uwe ouertredinghe, om mijnen wille, ende en ghedencke uwer sonden niet.

† Psal. 25.b.11. 130.a.8. Iere. 33.b.8.

26

Vermaent my, Laet ons met malcanderen rechten. Segghet op waer mede dat ghy meynt gherecht te zijn?

27

Vwe Vaderen hebben ghesondicht,^* ende uwe Leeraers hebben teghen my mishandelt.

* Num. 20.b.12

28

Daerom hebbe ic de Vorsten des Heylichdoms ontheylicht, Ende hebbe Iacob tot eenen Ban ghemaect, ende Israel tot eenen spot.