Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlij. Capittel.

¶ Hier wordt bediedelijcken beschreuen de toecoemst Christi, ende zijn macht, Godts lof wordt hier vercondicht, ende den godloosen Ioden worden met sware straffinghe gedreycht.

1

⁺SIet,^† dat is mijn knecht, Ick onderhoude hem, ende mijn wtuercoren, aen welcken mijn siele een welbehaghen heeft, ick hebbe hem mijnen gheest gegeuen, Hy sal dat recht onder de Heydenen brengen.

+ A vers 1

† Mat. 3.b.17. 12.b.18. 17.a.5 2.Pet. 1.d.17.

2

Hy en sal niet crijsscen noch roepen, ende men en sal sine stemme niet hooren opter straten.

3

Dat ghequetst riet en sal hy niet ontstucken breken, ende de glimmende Lement en sal hy niet wt lesschen. Hy sal dat Recht warachtelijck leeren houden.

4

Hy en sal noch bijtachtich noch grouwelijck zijn, op dat hy op Aerden dat rechte aenrichte. Ende de Eylanden sullen op sine wet wachten.

5

Alsoo spreect Godt de HEEre,^* die de Hemelen schept ende wtbreyt, die de Aerde maect, ende hare vrucht, die den volcke dat daer op is den adem geeft, ende den gheest, den ghenen die daer op gaen.

* Genes. 1.a.1.

6

Ick de HEEre hebbe v gheroepen met gherechticheyt, ende ick hebbe v by dijner hant ghenomen,^* ende hebbe v behoet, ende hebbe v tot een verbont onder den volcke ghegheuen,^* tot een licht der Heydenen,

* Esa. 49.b.8.

* Sach. 9.b. Luc. 2.d.32.

7

Op dat ghy sout openen de ooghen der blinden,^† ende de geuanghenen wt der gheuanckenissen leyden, ende die daer sitten inder duysternissen, wt den kercker.

† Sach. 9.b.11 Esai. 61.a.1.

8

Ick de HEEre dat is mijnen Naem,^* ende ick en wil mijn eere gheenen anderen gheuen, noch mijnen Roem den Afgoden.

* Esai. 48.b.11.

9

Siet, so wat daer noch comen sal, dat vercondighe ic te voren, ende vercondighe ooc wat nieus, Eer dant op gaet, laet ict v hooren.

10

^+* Singhet den HEEre een nieuwe Liet. Sijnen roem is aen der werelt eynde. Die inder zee varen, ende al wat daer in is. De Eylanden, ende die daer in woonen.

+ B vers 10

* Psal. 149.a.1 Iudit. 16.c.17.

11

Roept luyde ghy woestijnen, ende de steden daer in, oock met den dorpen daer Kedar woont. Laetse Iuychen die inden steenrootsen woonen, ende roepen van de hoochten der bergen.

12

^† Laetse den HEEre de eere gheuen, ende zijnen roem inden Eylanden vercondighen.

† Iosue. 7.c.19. Psal. 115.a.1. Ioan. 9.d.24

13

De HEEre sal v trecken ghelijc als een Ruese, hy sal den ijuer opwecken ghelijck als een Crijchsman. Hy sal Iuychen ende crijsschen, hy sal sine Vianden ouerweldighen.

14

Ick swijghe wel eenen tijt lanck, ende ben stille, ende onthoude my: Maer nv wil ick ghelijck als eene die baert, crijsschen, ick wilse verwoesten, ende alle verslinden.

15

Ick wil Bergen ende Hueuelen verwoesten, ende alle haer gras verdorren, Ende wil de waterstroomen tot Eylanden maken, ende de zee wtdrooghen.

16

Maer de blinden wil ick opten weghe leyden, den welcken si niet en weten. Ic wilse op de bane brengen, die haer onbekent is. Ic wil de duysternisse voor haer henen tot een licht maken, Ende dat oneffen, slecht. Sulcx wil ick haer doen, ende haer niet verlaten.

17

Mer die haer op Afgoden verlaten, ende seggen totten ghegoten beelden: Ghy zijt onse Goden, die sullen te rugghe keeren, ende te schande worden.

18

⁺Hoort ghy doouen, ende siet herwaerts ghy blinden, op dat ghy sien moghet.

+ C vers 18

19

^† Wie is doch soo blindt als mijn knecht, ende wie is so doof als mijn bode dien ick seynde? Wie is soo blint, als die volcomen, Ende soo blint als de knecht des HEEren?

† Mat. 15.b.14

20

Men predict wel vele: Maer si en houdent niet. Men seyt hen genoech: Maer si en willent niet hooren.

21

Nochtans wil hen de HEEre wel, om zijnder gherechticheydts wille, ende dat hy de Wet heerlijck ende groot make.

22

Het is een berooft ende gheplondert volc. Sy zijn altesamen verstrict in Cuylen, ende versteken inden kercker. Sy zijn tot eenen roof gheworden, ende daer en is gheen verlosser. Gheplondert, ende daer en is niemandt die daer segghe: Gheeftse weder herwaerts.

23

Wie isser onder v lieden, die sulcx ter ooren neme, die daer op mercke, ende hoore tgene dat hier nae coemt?

24

^† Wie heeft Iacob ouerghegheuen te plonderen, ende Israel den Roouers? En heuet de HEEre niet ghedaen? Aen dien wy gesondicht hebben? Ende si en wouden op sine weghen niet wandelen, ende en gauen oock sine Wet gheen gehoor.

† 4.Reg. 17.a.5 24. 25.

25

Daerom heeft hy ouer haer wtghestort de gramheydt zijns toorns, ende crijghes macht, ende heeftse rontom ontsteken: Mer si en merckens niet, Ende heeftse aenghesteken, maer si en nemens niet ter herten.