Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxv. Capittel.

¶ Eenen troost ende belofte met bedecte woorden, op de roepinge der Heydenen luydende.

1

⁺MAer de^† woestijne ende wildernisse sal lustich zijn, ende dat velt sal vrolijck staen, ende sal bloeyen gelijck de Lelien.

+ A vers 1

† Esai. 32.b.15.

2

Sy sal bloeyen ende vrolijck staen in alderley lusticheyt ende blyschappe. Want de heerlijcheyt des Libanon is haer gegheuen, dat chieraet Charmels ende Sarons. Sy sien de heerlijcheyt des HEEren, den Maiesteyt onses Godes.

3

^* Sterct de moede handen, ende verpeystert de struyckelende knyen.

* Hebr. 12.b.12.

4

Segghet den versaechden herten:^† Hebt eenen goeden moet, en vreest niet, siet, uwe Godt die coemt totter wrake, Godt die daer betaelt, die coemt, ende die sal v helpen.

† Deut. 20.a.3. 31.b.8.

5

^† Als dan sullen der blinden ooghen op ghedaen worden, ende der doouen ooren sullen gheopent worden.

† Matt. 11.a.5. Esaie. 29.c.18.

[p. 12v]

6

^* Dan sullen de Lammen springhen ghelijck als een Herte, ende^† de tonghe der Stommen sal lof segghen.^* Wandt daer sullen wateren inder woestijne hier ende daer vloeyen, ende stroomen inde velden.

* Actor. 3.a.7. 13.b.9.

† Psal. 8.a.3.

* Esa. 41.c.18 43.c.19. 44.a.3.

7

⁺Ende so waer te voren droochte gheweest is, daer sullen waterganghen zijn: Ende daert dorre gheweest is, daer sullen Fonteynaderen zijn. Daer te voren de slanghen gheleghen hebben, daer sal hoy, riet ende lisch staen.

+ B vers 7

8

Ende aldaer sal een heyrbane ende passagie zijn, die welcke eenen Heylighen wech genoemt sal worden,^* dat gheen onreyne daer op gaen en sal. Ende die selue sal voor haer zijn, op datmen daer op gae, dat oock de onwetende niet en moghen dolen.

* Esaie. 52.a.1.

9

Ende daer en sal gheen Leeuwe zijn, ende daer en sal geen verschuerende dier op treden, noch aldaer gheuonden worden: Maer men salder vry ende seker gaen.

10

De^† verloste des HEEren sullen weder comen, ende te Sion comen met iuychen.^* Eewighe vruechde sal op hare hoofde zijn, blijschappe ende ghenoechte sullense omuangen, ende^† smerte ende suchten sal wech moeten.

† 2.Pet. 1.c.18.

* Esai. 51.b.11. 1.Petr. 1.b.8.

† Apoc. 21.a.4