Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiiij. Capittel.

¶ Vande straffinghe Godts, die oock ouer de Heydenen gaen sal.

1

⁺COemt herwaerts ghy Heydenen, ende hoort: Ghy volcken merct op.^* De Aerde hoore toe ende al wat daer in is: Des Werelts omloop, tsamen met zijnder vrucht.

+ A vers 1

* Esaie. 1.a.2. Deut. 32.a.1.

2

Want de HEEre is toornich op alle Heydenen, ende vergrampt op alle haer heyr. Hy salse verbannen, ende om gedoot te worden ouer leueren.

3

Ende haer verslaghene sullen wech gheworpen worden, alsoo dat den stanck van haren lichamen op gaen sal, ende de berghen van haren bloede vlieten sullen.

4

Ende dat gantsche Hemelsche Heyr sal veruuylen,^† Ende den Hemel sal in een gherolt worden, ghelijck eenen brief, ende alle zijn Heyr sal verwelcken, gelijck als een bladt verwelct aenden wijnstock, ende als een dorre blat aenden vijgeboom.

† 2.Pet. 3.b.10. Esaie. 51.b.6. Apoc. 6.c.14.

5

Want mijn^* sweert is droncken inden hemel, ende siet, het sal neder comen op Edom, ende ouer dat verbannen volck, totter straffinghe.

* Heb. 4.c.12. Ephe. 6.b.17. Apoc. 1.c.16. 19.b.15.

6

Des HEEren sweert is vol bloets, ende dick van vette, vanden bloede der Lam-meren ende Bocken, vant vette der nieren wt den Rammen.⁺ Want de HEEre hout een slaen te Bozra, ende een groot worgen inden Lande Edom.

+ B vers 6

7

Daer sullen die Eenhoornen met hen daer onder moeten ende de Ossen mette gemeste Ossen, want haer Lant sal droncken worden van bloet, ende haer Aerde dic vanden vette.

8

^† Want het is den dach der wraken des HEEren, ende dat Iaer der betalinge, om Sion te wreken.

† Esai. 63.a.4.

9

Daer sullen hare beken tot peck worden, ende haer Aerde tot solfer. Ia haer Landt sal tot bernende peck worden,

10

^† Dwelcke noch dach noch nacht ghebluscht en mach worden: Maer daer sal eenen eewigen rooc van haer opgaen, ende sal inder eewicheyt woest zijn, alsoo datter niemant en sal doorgaen inder eewicheyt,

† Esa. 66.d.24 Marc. 9.e.47 Ezech. 21.a.3.

11

Maer^* Roerdompen ende Egels sullent in hebben, Nachtwlen ende Rauen sullen aldaer woonen.

* Seph. 2.c.14.

12

Want hy sal een Metserssnoer daer ouer trecken, dat sy woest worde, ende een richtloot, opdat sy leech sy, also dat hare Heeren heeten moeten, Heeren sonder Lant, ende alle hare Vorsten een eynde hebben.

13

⁺Ende daer sullen doornen wassen in haer Palleysen, netelen ende dijstelen in hare Borchten, ende het sal een wooninge zijn der Draecken,^† ende weyde voor de Struyssen.

+ C vers 13

† Tren. 4.a.3.

14

Daer sullen onder een loopen Maerteren ende Gieren, ende den eenen veltduuel sal den anderen ontmoeten.

15

Daer sal ooc de Nachtvrouwe logeren, ende haer ruste aldaer vinden. Den Egel sal oock aldaer nestelen ende broeden, ende zijne Iongen voortbrenghen, onder hare schaduwe. Oock sullen de Kieckenwouwen aldaer te samen comen.

16

^* Soect nv in den boecke des HEEren, ende leset, Daer en sal nergens aen eenen faelgeren: Men en mist daer oock noch dit noch dat. Want hy ist, die door mijnen mont gebiet, ende zijnen geest ist, diet te samen brengt.

* Deut. 28.

17

Hy gheeft dat Lot ouer haer, ende zijn hant deylt de mate wt onder haer, dat sy daer inne eruen eewelijcken, ende inder eewicheyt daer inne blijuen.