Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ Hoe dat oock ghestraft worden, die dat volc Godts straffen ende verweldighen, met een gebet aen Godts goedertierenheyt, ende toesegghinghe zijnder hulpe.

1

⁺MAer wee v, ghy verdestrueerder,^† meynt ghy, dat ghy oock niet en sult verdestrueert worden? Ende ghy verachter, Meynt ghy datmen v oock niet en sal verachten?^† Wanneer ghy dat verdestrueren voleynt hebt, dan sult ghy oock verdestrueert worden. Als ghy des verachtens een eynde ghemaect hebt, dan salmen v weder verachten.

+ A vers 1

† Matt. 26.a.3.

† Exod. 21.b.12. Leu. 24.d.19. Mat. 7.a.2.

2

HEEre weest ons ghenadich, want op v verwachten wy.^† Weest haren arm vroech, daer toe onse Heyl inder tijt des droefheyts.

† Psal. 9.b.10.

3

Laet vlieden de volcken voor dat groote rumoer, Ende de Heydenen verstroyt worden, als ghy v verhoocht.

4

So salmen v op rapen als eenen roof, ghelijck alsmen de sprinchanen op raept, ende gelijck de Coolspringhers geiaecht worden, alsmense ouerualt.

5

De HEEre is verheuen, wandt hy woont inder hoochte. Hy heeft Sion vol gerichts ende gerechticheits gemaect.

6

Ende daer sal tot dijner tijt ghelooue zijn, ende Heerschappie, Heyl, wijsheyt, cloecheyt, vreese des HEEren sullen zijnen schat zijn.

7

^* Siet, haer boden roepen daer buyten^† ende de Engelen des vredes weenen bitterlijck [En segghen:]

* Esaie. 52.b.7. Rom. 10.c.15.

† Psa. 126.a.6 Malac. 2.a.7. Apoc. 2. 3.

8

De paden zijn woest, daer en gaet niemant meer opter strate. Hy en hout noch trouwe noch gelooue. Hy verwerpt de steden, ende en acht de lieden niet.

9

^† Dat Lant leyt claghelijck ende iammerlijck, de Libanon staet schandelijcken afghehouwen. Ende Saron is ghelijck als een slecht veldt, ende Basan ende Charmel is woest.

† Esai. 24.a.4.

10

⁺Nv wil ick my op maken, seyt de HEEre, nv wil ick my verheffen, nv wil ic hooch comen.

+ B vers 10

11

^* Met stroo gaet ghy beurucht, stoppelen baert ghy:

* Esai. 59.a.4.

12

^† Vyer sal v met uwen moet verteren. Want de volcken sullen tot calck verbrant worden, gelijck alsmen de afghehouwen doornen metten vyere aensteect.

† Iere. 5.c.14.

13

So hoort nv ghy, die verre zijt wat ick ghedaen hebbe, ende ghy, die naby zijt merct mijne stercte.

14

De sondaers tot Sion zijn verschrict, beuen is den gheueynsden aenghecomen [ende segghen:] Wie is onder ons, die by een^* verterende vyer can gewoonen?^† Wie is onder ons

* deu. 4.d.24 Heb. 12.d.29.

† Psal. 15.a.1. 24.a.3.

[p. 12r]

die byden eewigen gloet woone?

15

Wie in gherechticheyt wandelt, ende spreect wat recht is. Wie dat onrecht haet tsamen metter ghiericheyt, ende zijn handen aftrect^* dat hy geen geschencken en neemt. Wie zijn ooren toestopt, dat hy geen bloetschult en hoore, ende zijn ooghen toe hout, dat hy niet quaets en sie.

* Psal. 15.a.5. Prou. 17.c.23. Ezech. 22.b.12

16

Die sal inder hoochten wonen, ende steenrootsen sullen zijn vasticheyt ende bescherminge zijn. Sijn broot wort hem gegheuen, zijn water heeft hy gewis.^*

* 1.Ioan. 3.a.2.

17

Dijne oogen sullen den Coninck sien in zijnder schoonheyt, ghy sult dat lant gebreet sien,

18

Also dat v herte hem seer verwonderen sal, ende segghen:^* Waer zijn nv de Schriftgheleerde? Waer zijn de Voochden? Waer zijn de Cancelliers?

* 1.Cor. 1.d.18.

19

Daertoe soo en sult ghy tstercke volc niet sien, dat volck van dieper sprake, diemen niet verstaen en can, ende van een vreemde tonghe, diemen niet begrijpen en mach.

20

⁺Aenschouwet Sion de stadt onses^‡ Stiftes: Vwe oogen sullen^† Ierusalem sien, een sekere wooninge een^* hutte die niet wech geuoert en wort, welcker naghelen nemmermeer wtgetogen en sullen worden, noch haerder zeelen geen af gebroken en sal worden.

+ C vers 20

‡ Hoochtijdelijcker Feesten.

† Heb. 12.c.22. Apoc. 21.a.2.

* Heb. 9.b.11.

21

Want de HEEre sal aldaer machtich by ons zijn, ende daer sullen wy de watergrachten zijn, also dat daer gheen schepen met riemen varen, noch galeyen daer henen schepen en sullen.

22

^† Want de HEEre is onse richter, de HEre is onse^* meester, de HEEre is onse^† Coninck, die helpt ons.

† Psal. 7.b.12.

* Mat. 23.a.9 Ioan. 13.b.13.

† Sach. 9.b.9 Ioan. 12.b.15.

23

Laet haer hare stricken spannen, sy en sullen doch niet houden, also en sullen sy oock dat vaenken opten mastboom niet wtsteken. Dan sal veel costelijcx roofs wt gedeylt worden, dat ooc de Lammen roouen sullen.

24

Ende geen inwoonder en sal seggen: Ick ben swac. Want dat volc dat daer binnen woont,^* sal vergheuinghe der sonden hebben.

* Ephe. 1.b.7. Collo. 1.b.14. 2.b.13.