Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxij. Capittel.

¶ Vanden goeden gherustigen staet, die zijn sal onder den Coninck der gerechticheyt. Hy dreyghet den sorgheloosen steden.

1

⁺SIet,^* daer sal een Coninck regeren, om gherechticheyt aen te richten, ende Vorsten sullen heerschappen, om dat recht te handthauen,

+ A vers 1

* Iere. 23.a.5.

2

Dat een yeghelijck zijn sal, als een die voor den windt bewaert is, ende als eenen die voor den plasreghen verborghen is, ghelijck als de waterbeken op drooghe plaetsen, ghelijck als de schaduwe van eender grooter Steenroosen inden dorren Lande.

3

Ende der siender ooghen en sullen haer niet laten verblinden, ende de ooren der toehoorders sullen aenmercken,

4

^† Ende de onuersichtighe sullen cloecheyt leeren, ende der stamelender tonghe sal veerdich ende verstandelijck spreken.

† Esaie. 29.c.24

5

Een dwaes en sal niet meer Vorste heeten, noch een ghierighe Heere ghenaemt worden.

6

Want een dwaes spreect van dwaesheyt, ende zijn herte gaet met ongheluck omme, op dat hy gheueynstheyt aenrichte, ende dat hy predike vanden HEEre, dolinghe, op dat hy de hongherighe sielen wthonghere, ende den dorstigen het drincken beneme.

7

Wandt des ghierighen regeren is enckel schade, wandt hy vindt listicheden om te verderuen de ellendighe met valsch woorden, wanneer hy des Armen Recht wt spreken sal.

8

Maer de Vorsten sullen vorstelijcke ghedachten hebben, ende daer mede om gaen.

9

⁺Staet op ghy stoute vrouwen, hoort mijne stemme, ghy die soo sekerlijck zijt, neemt ter ooren mijn redene.

+ B vers 9

10

Het is om Iaer ende dach te doen, so sult ghy seker beuen, want daer en sal gheenen Wijnoogst zijn, ende daer en sal oock gheen afplucken zijn.

11

Verschrict ghy stoute vrouwen, beeft ghy sekere, daer is voorhanden wttrecken,^† blooten, ende gorden om de lendenen.

† Naect maken

12

Men sal claghen om der Acker wille, Ia om de lieflijcke Ackers, om de vruchtbare wijnstocken.

13

^† Want op den Acker mijns volcx sullen doornen ende dijstelen wassen, daer toe op alle genoechlijcke huisen, inder vrolijcker stadt.

† Esaie. 5.a.6.

14

Want de palleysen sullen verlaten worden, ende de menichte inder Stadt sal soo eenelijck zijn, dat oock de toornen ende vesten eewighe holen zijn sullen, ende den wilden dieren tot vruechde, ende den cudden tot weyden.

15

^* So langhe tot dat ouer ons wtghegoten sal worden de gheest wt der hoochte,^* Soo sal dan de woestijne tot eenen Acker worden, ende den Acker voor een wout gherekent worden.

* Iohel. 2.f.28.

* Esai. 29.c.17. 35.a.1.

16

⁺Ende dat recht sal inder woestenie woonen, ende gerechticheyt op den acker logeren.

+ C vers 16

17

^† Ende de vrucht des gherechticheyts sal die vrede zijn, ende het profijt des gherechticheyts sal de eewighe stilte ende sekerheyt zijn,

† Rom. 5.a.1.

18

^† Also dat mijn volc in de huysen des vredes woonen sal, in sekerder wooninghen, ende in stouter ruste:

† Iere. 33.c.16.

19

Maer haghel sal zijn den woude af, ende de stadt daer beneden sal nederich zijn.

20

Ghy die saeyt ouer al aen de wateren,^* want daer muecht ghy de voeten der Osschen ende der Ezelen op laten gaen.

* Esai. 30.d.24.