Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Van de straffinge Ierusalems (die sy veracht) om dat sy de wet Godts verlaten, Ende der menschen insettinghen aenhanghen.

1

⁺VVee Ariel Ariel, ghy Stadt des Leghers Dauids, Ghy hout Iaerghetijden, ende viert feesten:

+ A vers 1

2

Maer ick wil den Ariel benauwen, dat hy truerich ende iammerlijck sy, ende hy sal my een rechte Ariel zijn.

3

Want ick wil v belegheren rontom, ende ick wil v benauwen met Bolwerc, ende wil wallen om v laten maken.

4

Als dan sult ghy vernedert worden, ende wt der Aerden spreken, ende wt den stof met dijner redene mommelen, dat uwe stemme sy, gelijck eens Toouenaers wt der Aerden,

5

Ende uwe redene wt dat stof wispele. Ende de menichte die v verstroeyen, dier sal soo veel zijn als een dunne stof, Ende de menichte der Tyrannen^* ghelijck een weysterende kaf, Ende dat sal corts onuersiens gheschieden.

* Psal. 1.b.5.

6

Want ghy sult vanden HEEre Sebaoth besocht worden, met onweder ende aertbeuinge, ende grooten donder, met eenen draeywint, met eenen grooten onweder, ende met een vlamme des verterenden vyers.

[p. 10v]

7

⁺Maer ghelijck als een nachtghesicht^† inden droom, soo sal zijn de menichte aller Heydenen, die teghen Ariel strijden, tsamen met alle haer heyr ende bolwerck, ende die hem benauwen.

+ B vers 7

† Psal. 73.a.2. Iob. 20.a.8.

8

Want gelijck als eenen hongherighen droomt, dat hy etet: Maer als hy ontwaect, so is zijn siele noch^† ledich. Ende gelijck als eenen dorstighen droomt dat hy drinct: Maer als hy ontwaeckt, soo is hy mat ende dorstich. Alsoo sullen zijn de menichten aller Heydenen, die teghen den berch Sion strijden.

† Idel.

9

Wordet verbaest ende verslegen, verblint v, ende wort droncken, nochtans niet van Wijn. Tuymelt nochtans niet van stercken drancke.

10

Want de HEEre heeft v eenen geest des herden slaeps ingeschenct, ende uwe oogen toeghedaen.^† Vwe Propheten ende Vorsten metten Sienders heeft hi verblint,

† Esaie. 56.c.10.

11

Also^† dat v alder [Propheten] ghesichten zijn sullen, gelijck als de woorden van eenen toeghesegelden boec, dwelcke, Sooment dede eenen die lesen can, ende seyde: Lieue, leest dat. Ende hy seyde: Ick en can niet, Want het is toegheseghelt.

† Esaie. 6.b.9.

12

Oft ghelijck wanneermen dat selue gheeft eenen die niet lesen en can, ende segghe: Lieue, leest dat, Ende hy antwoordt: Ick en can niet lesen.

13

⁺Ende de HEEre spreect:^† Om dat dit volck tot my naket met zijnen monde, Ende met zijnen lippen my eert, Maer haer herte verre van my is, ende my vreesen na menschen gheboden, die sy leeren:

+ C vers 13

† Matt. 15.a.8. Marc. 7.a.6.

14

So wil ick oock met desen volcke wonderlijcken omgaen, op dat alder wonderlijcste ende seltsaemste,^† dat de wijsheyt zijnder wijsen onderga, Ende dat verstandt zijnder cloecken verblint worde.

† Obadia. 1.b.8 1.Cor. 1.d.17.

15

^* Wee den ghenen die verborgen zijn willen voor den HEEre, haer voornemen te verbergen, ende haer doen int duyster houden, ende seggen:^† Wie siet ons? Ende wie kent ons?

* Iere. 23.d.24.

† Eccl. 23.d.25 Esai. 47.b.10 Ezech. 8.b.12. 9.c.9. Iob. 22.b.13.

16

Hoe zijt ghy soo verkeert?^* Ghelijck oft des potbackers leem dachte, ende een werck sprake van zijnen meester: Hi en heeft my niet gemaect, Ende een maectsel seyde van zijnen werckmeester: Hy en kent my niet.

* Esai. 45.a.9 Iere. 18.a.5. Rom. 9.c.20.

17

Welaen, Het is noch om een cleyn weynich te doen, Soo sal Libanon een velt worden, ende dat velt sal een wout geacht worden.

18

^† Want totter seluer tijt sullen de doouen hooren de woorden des boecx, Ende de oogen der blinden sullen wt den donckeren ende duysteren sien,

† Esai. 35.a.5. Mat. 11.a.5.

19

Ende de ellendighe sullen weder vruechde hebben inden HEEre. Ende de arme onder der menschen sullen vrolijck zijn inden heylighen Israels,

20

Als de Tyrannen een eynde hebben, ende alst metten bespotters wt zijn sal, Ende vernielt sullen zijn, alle die so waken om moeyte aen te richten,

21

^† De welcke de Lieden doen sondighen doort prediken, Ende legghen den ghenen lagen, diese straffet inder poorten, wijcken door lueghenen vanden Rechtuaerdighen.

† Prou. 1.a.11.

22

Daerom spreect de HEEre, die Abraham verlost heeft, totten huyse Iacobs alsoo:^† Iacob en sal niet meer te schande worden, ende zijn aensicht en sal niet meer beschaemt worden.

† Esai. 43.a.6.

23

Want als sy sien sullen haer kinderen, de wercken mijner handen onder hen, soo sullen sy mijnen Naem heyligen ende sullen den Heylighen in Iacob heylighen, ende den Godt Israels vreesen.

24

^† Want die sulcken dolenden geest hebben, sullen verstant aennemen, Ende de^† Swetsers sullen haer laten leeren.

† Esaie. 32.a.4.

† Clappers.