Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Van de straffinghe Leuiatans, Ende van de goedertierenheyt Godts, van de verlossinghe Israels, Ende roepinghe der Heydenen.

1

⁺TEr seluer tijt sal de HEEre versoecken met zijnen harden, grooten ende stercken sweerde, beyde de^† Leuia-thans, die een slechte Slanghe, ende den Leuiathan die een cromme Slange is, Ende sal de Draecken inder See verworghen.

+ A vers 1

† Iob. 40.b.10. 41.a.1. 1.Cor. 15.c.26. Apoc. 12.b.8.

2

Inder seluer tijt salmen singhen vanden wijngaert des besten wijns:

3

Ick de HEEre behoede hem, ende make hem vochtich in corter stont, op datmen zijne bladeren niet en ghemisse. Ick wil hem dach ende nacht behoeden.

4

God en toornet niet met my. Och dat ick mochte metten dijstelen ende doornen crijgen, So woude ic onder haer vallen, ende haer op eenen hoope aensteken.

5

Hy sal my onderhouden by mijner cracht, ende sal my vrede maken, vrede sal hy my nochtans maken.

6

^* Het sal nochtans euenwel daer toe comen, dat Iacob wortelen sal, ende Israel groeyen ende bloeyen sal, dat sy den Aertbodem met vruchten veruullen.

* Iere. 33.c.12.

7

⁺Hy en wort nochtans niet geslaghen, also hem zijne Vianden slaen: Ende en wort niet verworcht, so hem zijne Vianden verworchden.

+ B vers 7

8

^* Maer metter maten richt ghijse, ende laetse los, wanneer ghyse bedroeft hebt, met uwen scherpen wint, te weten, metten Oosten wint.

* Iere. 10.d.24. 30.b.11. 1.Cor. 10.b.13.

9

Daerom sal daer door de sonde Iacobs ophouden, ende dat ist profijt daer af, dat zijne sonden wech genomen worden, indien dat hy alle steenen des Altaers maket gelijck als gestooten steenen tot Asschen, dat daer gheen Bosschen noch beelden meer en blijuen.

10

Want de vaste stad moet eenlijc worden, de schoone huysen nedergestooten ende verlaten worden, gelijck als een woestijne,⁺ dat de Calueren aldaer weyden ende rusten moghen, ende aldaer de rijsers af eten.

+ C vers 10

11

Haer tacken sullen van dorheyt breken, dat de Wijuen comen sullen ende daermede vier maken.^† Want het is een onuerstandich volck. Daerom en sal hy haerder ooc niet ontfermen diese gemaect heeft: Ende diese gheschapen heeft, en sal haerder niet ghenadich zijn.

† Esaie. 30.b.9.

12

Tot dier tijt sal de HEEre werpen vanden Oeuer des waters, tot aen de beke Egipti, Ende ghy kinderen Israels sult vergadert worden, deene na den anderen.

13

Ter seluer tijt salmen met eender grooter Basuyne blasen, dan sullen comen de verloren inden lande Assur, ende de verstooten inden lande Egipti, ende sullen den HEERE aenbeden,^* opten heylighen Berch te Ierusalem.

* Esaie. 2.a.3.