Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Een Liedeken der kinderen Israels hoe datmen op Godt betrouwen sal, Ende hoe hy de gheloouighe in alle haren iammer troost ende onderhout. Ende van de verrijsenisse.

1

⁺IN die tijt salmen inden lande Iuda een sulcken Liedt singhen:

^* Wy hebben een stercke stadt, de mueren ende geweren zijn^† Heyl.

+ A vers 1

* Pro. 18.b.10 Sach. 2.a.5.

† Dat is vaste ende onouerwinlijck.

2

^‡ Doet op de poorte, datter ingae dat gerechte volck, dattet ghelooue bewaert.

‡ Psa. 118.b.19

3

Ghy onderhout ghestadelijck vrede, na sekeren toeseggen. Want men verlaet hem op v.

4

^* Daerom verlaet v op den HEEre eewelijck. Want God de HEEre is een steenrootse inder eewicheyt.

* Prou. 3.a.5.

5

Ende hy buyghet de ghene die inder hoochten woonen,^† De hooge stadt vernedert hy, Ia, hy stootse ter Aerden, dat sy inden stof leyt.

† Esaie. 25.a.2.

6

Dat sy met voeten vertreden wordt, Ia met voeten der Armen, metten voeten der slechter.

7

Maer der gherechten wech is slecht.^† Den ganck der oprechter maect ghy gerechtich.

† Iere. 10.d.23.

8

Want wy wachten op v HEEre inden weghe ws rechts, Des herten lust staet tot dijnen Naem, ende uwer ghedachtenisse.

9

Ick begheere dijns des nachts van

[p. 9v]

herten, Daer toe met mijnen gheest wake ick vroech tot v.

Want waer dat v recht inden Lande gaet, Daer leeren de Inwoonders des Aertrijcx gherechticheyt.

10

⁺Maer hoe wel den Godloosen genade aengeboden wordt, Soo en leeren sy nochtans gheen gherechticheyt.

Maer doen slechts quaet int oprechte Lant, want si en sien des HEEren heerlijcheyt niet.

+ B vers 10

11

HEEre dijn hant is verhoocht, dat en sien sy niet: Maer als zijt sien sullen, soo sullen sy te schande worden inden ijuer ouer de Heydenen. Daer toe sult ghijse^† metten vyer (daer ghy uwe Vianden mede verteert) verteren.

† Heb. 12.d.29.

12

Maer ons HEEre sult ghy vrede maken,^* want al dat wy hebben, dat hebt ghy ons ghegheuen.

* 1.Cor. 4.b.7. Iacob. 1.b.17.

13

HEEre onse Godt, daer heerschappen wel ander Heeren ouer ons, dan ghy: Maer wy ghedencken nochtans dijner alleen ende dijns Naems.

14

De dooden en blijuen niet leuende: De ghestoruen en staen niet op.

^* Want ghy hebtse besocht ende vernielt, Ende te niet ghemaect alle hare gedachtenisse.

* Psal. 1.b.6.

15

Mer ghy HEEre vaert voort onder de Heydenen, Ghy vaert altoos voort onder de Heydenen, bewijst v heerlijcheyt, ende coemt verre tot aent eynde der werelt.

16

^* HEEre als daer droefheyt is, dan soectmen v: Ende als ghyse straffet, dan roepen sy ancxstelijck.

* Leu. 26.g.43.

17

^+* Ghelijc als een beuruchte vrouwe, als sy schier baren sal, so is haer banghe, roept in haren smerten, Alsoo gaetet ons oock HEEre voor uwen aensichte.

+ C vers 17

* Ioan. 16.c.21. Mich. 4.b.9.

18

Soo zijn wy oock beurucht,^* ende ons is banghe, Ia dat wy nauwelijc den Adem verhalen en connen.

Nochtans en connen wy den lande niet gehelpen, Ende de Inwoonders op den Aertbodem en willen niet vallen.

* Roma. 8.d.22.

19

^† Maer uwe dooden sullen leuen,^* Ende metten lichaem weder opstaen.

Waect op, ende roemet, ghy die daer ligt onder der Aerden, Want uwe dauwe is eenen dauwe des groenen veldts, maer dat Landt der dooden sult ghy nederwerpen.

† 2.Cor. 6.b.9

* Ioan. 5.d.28 Dani. 12.b.12. 1.Cor. 15.f.52. 1.Thes. 4.c.16 Philip. 3.c.21.

20

Gaet henen mijn Volck inde Camer,^* Ende sluyt de duere achter v toe, Verbercht v eenen cleynen ooghenblick, tot dat den toorne voor by gae.

* Gene. 19.c.10. Apoc. 6.b.11.

21

^† Want siet, de HEEre sal wt gaen van zijnder plaetse, om te besoecken de boosheyt der Inwoonders des Landts ouer haer.^* Alsoo dat dat Lant openbaren sal haer bloet, ende niet langher verhelen die daer in verworcht zijn.

† Mich. 1.a.3.

* Apoc. 18.e.24