Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Eenen Lofsanck des Propheten Iesaia tot Godt met eender Prophetie vande roepinghe der Heydenen. Ende vande wtroeydinge Moabs.

1

⁺HEERE ghy zijt mijn Godt, v prijse ick, Ick loue uwen Naem, Want ghy doeghet wonderlijcke dingen, uwe voornemen van outs herwaerts zijn ghetrou, ende warachtich.

+ A vers 1

2

Want^† ghy maket de Stadt tot steenhoopen, de vaste stadt dat sy op eenen hoop leyt, der vreemder Palleysen, dattet niet meer een stadt en sy, ende nemmermeer getimmert en worde.

† Esaie. 26.a.5. 37.e.26. Iere. 9.b.11.

3

Daerom eeret v een machtich volck, de steden der geweldiger Heydenen vreesen v,

4

Want ghy zijt der cleynen stercte, der Armen sterckte in droeffenisse.^* Een toeulucht voor het onweder, een schaduwe voor de hitte, Wanneer de Tyrannen rasen, als een ongheweder teghen eenen Wandt.

* Esaie. 4.b.6.

5

Ghy verootmoe-dicht der vreemder tempeesten, ghelijck als de hitte in een dorre plaetse, dat de hitte den Wijnrancken der Tyrannen verderue, ende de Wolcke nochtans haer schaduwe gheue.

6

Ende de HEEre Sebaoth sal op desen berghe allen volcken bereyden een vette^† maeltijt, een maeltijt van reynen Wijne, van vette, van marcke, van Wijne daer gheen heffe in en is.

† Matt. 22.a.2.

7

⁺Ende hy sal op desen berghe dat bewinden wech nemen, daer alle volcken mede bewonden zijn, Ende dat decksel, daermede alle Heydenen bedect zijn.

+ B vers 7

8

Wandt hy sal den^† doot ganschelijck verslinden eewelijck. Ende de HEEre HEEre sal de^* tranen van allen aensichten afwasschen, Ende sal wechnemen de versmaetheyt zijns Volcx in allen landen, Want de HEEre heuet gheseyt.

† Hos. 13.c.14 1.Cor. 15.f.54

* Apoc. 7.c.17 21.a.4.

9

Tot dier tijt salmen seggen: Siet, dat is onse Godt,^* opten welcken wy wachten,^† ende hy sal ons helpen. Dat is de HEEre, op dien wy wachten, op dat wi ons verblijden, ende vrolijck zijn, in zijn Heyl.

* Esai. 30.d.18

† Ephe. 2.a.4

10

Wandt de hant des HEEren rust op desen Berch. Maer^* Moab sal onder hem ghedorsschet worden, ghelijck als stroo ghedorsschet wordt, ende als dreck.

* Esaie. 48.a.1.

11

Ende hy sal zijne handen wtstrecken midden onder haer, gelijck als een swemmer die wtstrect om te swemmen. Ende sal hare pomperie vernederen, metten Armen zijnder handen,

12

Ende de hooghe Vesten uwer Mueren buyghen, vernederen, ende inden stof ter Aerden werpen.