Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Van de straffinghe ende plaghe Tyri ende Sidonis, ende der Eylanden met alle de steden aenden Meyr ghelegen.

1

⁺DIt is den last ouer^* Tyro. Huylt ghy Schepen op de zee, want si is verdestrueert, dat daer oock niet een huys en is, noch yemandt derwaerts en trect. Wt den Lande Chitim sullen si des ghewaer worden.

+ A vers 1

* Iere. 47.b.3. Ezech. 26.a.3. 27. 28.

2

De Inwoonders der Eylanden zijn stille geworden. De Cooplieden tot Sidon, die ouer dat Meyr trocken, veruulden v.

3

Ende soo wat vruchten aen Sihor, ende soo wat Corens aent water wiesch, dat brachtmen tot haer in, ouer groote wateren. Ende ghi waert der Heydenen marct gheworden.

4

Ghy moget wel verschricken Sidon. Want dat Meyr, Ia de alder vaste aent Meyr spreeckt: Ick en ben niet meer beurucht, Ic en bare niet meer, So en voede ick oock gheen Ionghelinghen op, ende en brenghe gheen Maechdekens op.

5

Ghelijck alsmen verschricte, doemen van Egipten hoorde: Alsoo salmen oock verschricken, wanneermen van Tyro hooren sal.

6

Vaert henen opt Meyr, Huylt ghy Inwoonders der Eylanden.

7

Is dat uwe vrolijcke stadt, die haer van haren ouderdom beroemde? Hare voeten sullense verre wech voeren, om te wandelen.

8

^* Wie hadde dat gemeynt, dattet Tyro der Croonen also gaen soude? Soo doch hare Cooplieden Vorsten zijn, ende haer Cremers de heerlijcste inden Lande?

* Mat. 11.c.21. Luce. 10.b.13.

9

⁺De HEERE Sebaoth heeftet alsoo ghedacht, op dat hy crencte alle pomposicheyt der lustiger stadt, ende verachtelijck makede alle heerlijcheyt inden Lande.

+ B vers 9

10

Vaert henen, door dijn Lant ghelijc als eenen stroom, ghy dochter des Meyrs,^† daer en is gheenen gordel meer.

† Iob. 12.c.25.

11

Hy strect zijn hant ouer dat Meyr,^* ende verschrict de Coninckrijcken. De HEEre gebiet ouer Canaan, datmen hare machtige wt soude roeden,

* Dani. 2.c.21.

12

Ende seyt: Ghy en sult niet meer vrolijc zijn, ghy geschoffierde Maget, ghy dochter Sidon.

13

O Chitim maect v op, ende trect voort, Want ghy en moet aldaer oock niet blijuen, maer inder Chaldeen Lant, dat geen volck en was. Maer Assur heeftet ghefundeert, datmen daer met Scepen vaert, ende hebben vaste Thoornen daer in opghericht, ende Palleysen opghetimmert.

14

Maer si is geset, dat si verstoort worden sal. Huylet ghy Schepen opter zee, want uwe macht is ghedestrueert.

15

⁺In dier tijt sal Tyrus vergeten worden tseuentich Iaer lanck, soo langhe als een Coninc leuen mach. Maer na tseuentich Iaer salmen van Tyro een Hoeren Liet singhen:

+ C vers 15

16

Neemt de Herpe, gaet inder stadt rontom, ghy vergetene Hoere, bedrijft wat ghenuechten opt snarenspel, ende singet haest, op datmen ws weder ghedencke.

17

Want nae tseuentich Iaren sal de HEEre^† Tyrum besoecken, op dat si weder come tot haren Hoeren loon, ende Hoerderije bedrijue met alle Conincrijcken op Aerden.

† Act. 21.a.3.

18

Maer hare^† Comenschappe ende Hoeren loon, sullen den HEEre heylich zijn. Men en salse niet tot scatten vergaderen noch verberghen. Maer die voor den HEEre woonen, die sullen haer coopgoet hebben, op dat si eten ende versaet worden, ende wel ghecleet zijn.

† Psal. 45.c.13.