Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Vande straffinghe ende plage Babylons, Dume ende Arabie.

[p. 8r]

1

⁺DIt is den last ouer de woestijne aen de zee. Ghelijck als een onweder vanden Suyden coemt, dwelc alle dinck omkeert, soo coemtet wt der woestijne wt eenen veruaerlijcken Lande.

+ A vers 1

2

Want my is een swaer ghesicht gheopenbaert.^† Deen verachter coemt tegen den anderen: Deen verstoorder tegen den anderen. Trect op Elam, belegghet haer Madai, Ick wil van alle zijn suchten een eynde maken.

† Dani. 5.e.30.

3

Daerom zijn mijne lendenen vol smerten, Ende angst heeft my omuanghen, ghelijck als eender die daer baert. Ick cromme my als ick het hoore, ende verschricke als ict aensie.

4

Mijn herte beeft, grouwel heeft my verslaghen. Ick en hebbe inden lieuen nacht gheen ruste daer af.

5

Iae decket de tafel, laet waken op de hoede: Eet, drinct: Maect v op ghy Vorsten: Smeert den schilt.

6

⁺Want de HEEre seyt tot my alsoo: Gaet henen, stelt eenen wachter, die daer toesie, ende het bootschappe.

+ B vers 6

7

Ende hy siet Ruyters rijden ende varen, op Peerden, Ezelen, ende Kemelen, Ende heeft met grooter neersticheyt acht daer op.

8

Ende eenen Leeuwe riep: HEEre,^† ick stae op de wachte den gheheelen dach door, Ende ick stelle my op de hoede den gantschen nacht.

† Abac. 2.a.1.

9

Ende siet, daer coemt een, die vaert op eenen waghen, die antwoort, ende spreect:^* Babel is geuallen, Sy is gheuallen, Ende alle de Beelden haerder Afgoden, zijn ter Aerden neder gheuallen.

* Iere. 51.b.8. Apoc. 14.b.8. 18.a.2.

10

Mijnen lieuen dorschuloer, daer ick op dorssche. So wat ick gehoort hebbe vanden HEERE Sebaoth, den Godt Israels dat vercondighe ick v.

11

^† Dit is den last ouer Duma. Men roept tot my wt Seir: Wachter, is den nacht schier wech? Wachter is den nacht schier wech?

† Iere. 49.b.7.

12

⁺De Wachter sprack: Al coemt den morgenstont aen, Het sal nochtans weder nacht worden. Ende oft ghy al vraecht, so sult ghi doch weder comen, ende weder vraghen.

+ C vers 12

13

Dit is den last ouer Arabia. Ghy sult int wout in Arabia woonen, opten weghe nae Dedanim.

14

Brengt den dorstighen water tegen, ghy die daer woonest inden lande Thema. Biedet den vluchtigen broot.

15

Want si vlieden voor tsweert, Iae voor tbloot sweert, voor den gespannen boghe, voor den grooten strijt.

16

Want^† alsoo spreeckt de HEEre tot my: Noch in een Iaer, ghelijck als des dachlooners iaren zijn, sal alle heerlijcheyt Kedar onder gaen,

† Iere. 49.e.28.

17

Ende der ouergebleuene Schutters der Helden tot Kedar, sal weynigher worden. Wandt de HEEre de Godt Israels heuet gheseyt.