Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Iesaie den Propheet wort vertoont de straffinge Egipti ende Ethiopie.

1

⁺INden Iare doen Thartan tot Asdod quam, doen hem gesonden hadde Sargon de Coninck tot Assyrien, ende street teghen Asdod ende wanse:

+ A vers 1

2

Inder seluer tijt sprack de HEEre door Iesaiam den sone Amoz, ende seyde: Gaet henen, ende treckt af den Sack van uwe lendenen, ende treckt de schoenen wt van uwe voeten. Ende hy dede alsoo, ghinck naect ende bloots voets.

3

Doen sprack de HEEre: Ghelijc als mijn knecht Iesaia naect ende baruoets gaet, tot een Teecken ende wonder van drie Iaren ouer Egipten ende Morenlant,

4

Alsoo sal de Coninck tot Assyrien henen drijuen de gheuanghen Egipti, ende het verdreuen Morenlandt, beyde ionck ende out,⁺ naect ende baruoets, met de schamelheyt bloot tot schanden den Egiptenaers.

+ B vers 4

5

Ende si sullen verschricken, ende met schande bestaen voor Morenlant, daer sy haer op verlieten. Ende wederom dat Morenlandt beschaempt zijn voor Egipten,

6

Vanden welcken si haer beroemden. Ende de Inwoonders deser Eylanden, sullen segghen ter seluer tijt: Is dat onse toeulucht, daer wy toe vloden om hulpe, dat wy verlost mochten worden vanden Coninck tot Assyrien? Hoe fijn zijn wy ontcomen.