Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Noch vanden voorgaenden, Ende oock van de roepinghe der Heydenen.

[p. 7v]

1

⁺DIt is den last ouer^† Egipten.^* Siet, De HEEre sal op een snelle wolcke varen, ende in Egipten comen. Dan sullen de Afgoden in Egipten voor hem beuen, ende den Egiptenaers sal dat hert versaecht worden in haren Lijue.

+ A vers 1

† Iere. 46.a.1. Ezech. 29.a.2.

* Luc. 21.d.25.

2

Ende^† ick wil de Egiptenaers teghen malcanderen hissen, alsoo dat deen broeder tegen den anderen, deen vrient tegen den anderen, deen stadt tegen dander, ende deen Rijck, teghen dat ander strijden sal.

† Marc. 13.a.8. Luce. 21.b.9.

3

Ende den moet sal den Egiptenaers onder haer vergaen, ende ick wil haer aenslaghen te niete maken. Dan sullen si vraghen haren Afgoden ende Papen, ende Waersegghers, ende Teeckenbedieders,

4

⁺Maer ick wil de Egiptenaers ouergheuen inde handen van grouwelijcken Heeren, ende een herdt Coninck sal ouer haer heerschappen, spreect de Heerschapper de HEEre Sebaoth.

+ B vers 4

5

Ende dat water inde zee sal wtgesopen worden, daer toe den stroom, sal versipen ende verdrooghen,

6

Ende de wateren sullen verloopen, dat de Meyren aenden Dammen sullen cleyn ende drooghe worden, beyde Riet ende Lisch verwelcken,

7

Ende dat gras aenden wateren verdorren, ende alle saet aenden wateren sal verwelcken, ende te niete worden.

8

Ende de Visschers sullen trueren, ende alle de ghene die den Angel int water werpen, sullen claghen,

9

Ende de ghene die netten wt werpen opt water, sullen bedroeft zijn. Ende si sullen tot scande comen die goet garen wercken ende netten breyden.

10

Ende die Poelen hebben met alle den ghenen die Vijuers om loon maken, sullen becommert zijn.

11

⁺De Vorsten tot Soan zijn dwasen, de^† wijse Raetgeuers Pharaons zijn inden raet Sotten gheworden. Wat segt ghy doch van Pharao? Ick ben een kint der Wijsen, ende ick ben van oude Coninghen ghesproten?

+ C vers 11

† 2.Re. 17.b.14 Esaie. 8.a.2. Psal. 33.b.10.

12

Waer zijn nv dan uwe Wijsen? Latet haer vercondighen ende betoonen, wat de HEEre Sebaoth ouer Egipten besloten heeft.

13

Maer de Vorsten tot Soan zijn Sotten gheworden. De Vorsten tot Noph zijn bedroghen. Sy verleyde met Egipten den hoecksteen der gheslachten.

14

Want^† de HEEre heeft eenen swijmelgheest onder haer wtghestort, alsoo dat si Egipten verleyden in alle haer doen, ghelijck een dronckaert tuymelt als hy braect.

† 3.Reg. 22.d.23

15

Ende Egipten en sal niemanden hebben, die hooft oft steert, tack oft spruyte op voeden mach.

16

Tot dier tijt sal Egipten zijn als wijuen, ende vreesen ende verschricken, wanneer de HEEre Sebaoth de hant ouer haer beweghen sal.

17

Ende Egipten sal verbaest wesen voor Tlant van Iuda, alsoo dat soo wie oock desseluen ghedenct, die sal daer voor verschricken ouer den raet des HEEren Sebaoth, den welcken hy ouer haer besloten heeft.

18

⁺Tot dier tijt sullen vijf steden in Egipten lande spreken, naeder sprake Canaan,^* ende sweeren byden HEEre Sebaoth. De eene sal heeten Irheres.

+ D vers 18

* Deut. 10.d.20.

19

Ter seluer tijt sal des HEEren Sebaoths Altaer midden in Egipten lant zijn, ende eenen Marcsteen des HEEren aen de Palen,

20

Welcke sal een Teeken ende ghetuychenisse zijn, den HEEre Sebaoth inden lande Egipti.

21

Want si sullen totten HEEre roepen ouer diese verdrucken, so sal hy haer seyn den eenen^† Heylandt ende meester, diese verlosse. Want de HEEre sal den Egiptenaers bekent worden,⁺ Ende de Egiptenaers sullen den HEEre kennen tot dier tijt, ende sullen hem dienen met offer ende Spijsoffer,

† Beschermer.

+ E vers 21

22

Ende sullen den HEEre belouen ende houden. Ende de HEEre sal de Egiptenaers plagen, ende^† heelen. Want si sullen haer bekeeren totten HEEre, Ende hy sal hem verbidden laten, ende haer heelen.

† Gesont maken

23

Tot dier tijt salder een bane zijn, van Egipten in Assyrien, alsoo dat de Egiptenaers in Assyrien, Ende de Assyriers in Egipten comen sullen, Ende de Egiptenaers metten Assyriers Gode sullen dienen.

24

Tot dier tijt sal Israel de derde zijn met den Egiptenaers ende Assyriers, door de segheninghe die opter Aerden zijn sal.

25

Want de HEEre Sebaoth salse seghenen, ende seggen. Gheseghent zijt ghy Egipten, mijn volck, ende ghy Assur mijnder handen werck,^* Ende ghy Israel mijn Erfdeel.

* Deut. 32.a.9. Iere. 51.d.19.