Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Noch vanden voorgaenden, Ende oock van de roepinghe der Heydenen.

1

⁺VVee den Lande, dat onder de Seylen inder schaduwen vaert, aen dese zijde des waters des Morenlants,

+ A vers 1

2

Dwelcke Ambassaten seynt op de zee, ende in rietschepen opten water vaert. Gaet henen ghy snelle boden totten volcke, dat verschuert ende gheplondert is, totten volcke, dat grouwelijcker is, dan ergens eenich andere, totten volcke dat hier ende daer wtghemeten ende vertreden is, wiens de waterstroomen zijn Landt in nemen.

3

Alle ghy die opter Aerden woont, ende inden Lande sittet, ghy sult sien hoe datmen de Banier opten Berghen opwerpen sal, ende hooren, hoe datmen de Trompetten blasen sal.

4

⁺Want also spreect de HEEre tot my: Ick wil stille houden, ende aensien in mijnder stede, ghelijc als een hitte die den reghen wt droocht, ende ghelijc Meeldauwe inde hitte des oogsts.

+ B vers 4

5

Want voor den oogste sal de vrucht af nemen, Ende de onrijpe vruchten inder bloeytijt, verdorren, datmen de stelen met wijnranckmessen sal moeten af snijden, ende de wijnrancken wech doen ende af houwen,

6

Datment te samen sal moeten laten ligghen, voor de Voghelen op de Berghen, ende den dieren inden Lande, dat des Somers de Voghelen daer in nestelen, Ende dat des winters alderley dieren inden Lande daer in ligghen moghen.

7

Tot dier tijt, sal dat verschuerde ende gheplonderde volck, dwelcke grouwelijcker is dan yewaerts eenich ander, dat hier ende daer af ghemeten ende vertreden is, Dien de waterstroomen zijn Lant in nemen, gheschencken brenghen den HEEre Sebaoth,^* op de plaetse, daer den Naem des HEEren Sebaoth is, totten Berghe Sion.

* Deut. 12.a.5.