Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Een claghe teghen de valsche ongerechte Ouerheeren, met vercondinghe van haerder straffinghen, teghen den hoomoet des Conincx van Assyrien, Ende hoe hem Godt verootmoedighen sal. Eenen troost Israels.

1

⁺VVee den Schriftgheleerden,^† die onrechte Wetten maken,

+ A vers 1

† Mat. 23.a.3.

2

Ende die onrechte oordeelen schrijuen, op dat si de saken der armen buyghen, ende ghewelt ghebruycken inden rechte der ellendighen, onder mijnen volcke, also dat de weduwen haren roof, ende de weeskens haren buete zijn moeten.

3

Wat wilt ghy doen inden daghe der besoeckinge, ende des onghelucx dat van verre coemt? Tot wien wilt ghy vlieden om hulpe?

4

Ende waer wilt ghy uwe eere laten, dat si niet onder de gheuangen ghebuycht en worde, ende onder de verslaghene en valle?^* In dien allen en laet sinen thoorne niet al, zijn handt is noch wtghestrect.

* Esaie. 5.d.25. 9.c.11.

5

O wee dien Assur,^† die mijns toorns roede, ende hare hant, eenen stoc mijnder grammicheyt is.

† Esaie. 36.a.1. Iere. 25.b.9. Ezec. 21.b.13.

6

Ick wil hem seynden teghen een gheueynst volck, ende hem beuel gheuen tegen dat volc mijnder gramschappen, dat hijt berooue, ende wt deyle, ende vertrede ghelijc als slijck opter straten.

7

⁺Hoe wel dat hijt alsoo niet en meynt, ende zijn hert alsoo niet en denct: Maer zijn herte staet te vernielen, ende wt te roeden niet weynich volcken.

+ B vers 7

8

Want hy spreect:^† En zijn mijn Vorsten niet altemael Coninghen?

† 4.Re. 18.f.33.

9

En is CalNo niet als Carchemis? En is Hamath niet als Arpad? En is Samaria niet als Damascus?

10

Ghelijc als mijne hant gheuonden heeft de Coninckrijcken der Afgoden, so doch haer Afgoden stercker waren dan de ghene die tot Ierusalem ende Samaria zijn,

11

En soude ick Ierusalem ende haren Afgoden niet doen, ghelijck ick Samaria ende haren Afgoden ghedaen hebbe?

12

Maer als de HEEre alle sine wercken volbracht heeft opten berch Sion ende te Ierusalem, soo wil ick besoecken de vreese des hoochmoedighen Conincx te Assyrien, ende de heerlijckheyt zijnder hoouaerdigher oogen.

13

Daerom dat hy spreect:^* Ick hebbe door de cracht mijnder handen ghedaen, ende door mijne wijsheydt, want ick ben cloeck. Ick hebbe de Lantschappen anders gedeylt, ende haer incomen berooft, Ende ghelijck als een gheweldighe, de inwoonders ter Aerden gheworpen.

* Deut. 8.c.17. Esaie. 47.b.8 Ezech. 29.b.9

14

Ende mijne hant heeft de volcken geuonden, ghelijck als eenen voghelsnest,⁺ alsoo dat ick alle de Lantscappen tsamen gheraept hebbe, ghelijckmen eyeren op raept die verlaten zijn, daer niemant een veder en roert, oft den beck op en sperret oft pijpt.

+ C vers 14

15

^* Mach ooc een^† aexe haer beroemen teghen den genen die daer mede houwet? Oft een saghe pochen teghen den ghenen diese trect? Ghelijck als die roemen can, die den stoc voert, ende heft ende voeret hem soo licht, als oft hy gheen houdt en ware?

* Esaie. 45.b.9 Roma. 9.c.20.

† Oft, Bijle.

16

^† Daerom sal de HEERE, HEEre Sebaoth onder sine vetten de quelende siecte seynden, ende hy sal zijne heerlijckheydt aensteken, dat si bernen sal als een vier.

† Esaie. 37.f.36

17

Ende dat licht Israels sal een vier zijn, ende zijn Heylighe sal een vlamme zijn, Ende sal sine doornen ende dijstelen aensteken ende verteeren op eenen dach.

18

Ende de heerlijckheydt van zijn wout ende van zijn velt sal te niete worden, van de siele aen, tot op dat vleesch, ende sal vergaen ende verdwijnen,

19

Dat de ouer ghebleuen boomen zijns wouts ghetelt moghen worden, datse oock een Ionghe mach beschrijuen.

20

⁺In dier tijt sullen de ouerghebleuene in Israel, ende die daer behouden worden inden huyse Iacobs, haer niet meer verlaten op dien, diese slaet: Maer sy sullen haer verlaten opten HEEre den Heylighen in Israel, inder waerheyt.

+ D vers 20

21

De ouerghebleuene sullen haer bekeeren, Iae de ouerghebleuene in Iacob tot God den stercken.

22

^† Want oft dijn volc O Israel is, ghelijck als tsant aen de zee, soo sullen doch de ouerghebleuene des seluen bekeert worden. Want in dien dattet verderuen ghestuert wort, so sal daer oueruloedighe gherechticheyt comen.

† Rom. 9.d.27. 3.Reg. 19.d.18 Esaie. 11.c.11.

23

Want de HEEre HEEre Sebaoth sal een verderuen laten gaen, Ende dat selue doch stueren int gantsche Lant.

24

Daerom spreect de HEEre HEEre Sebaoth: En vreest v niet, mijn volck, dat tot Sion woont, voor Assur, Hy sal metten stock slaen, ende sinen staf teghen v opheffen, ghelijck als in Egipten.

25

Want het is noch om een weynich te doen, so sal de onghenade, ende mijn gramschap ouer haer onduecht een eynde hebben.

26

^† Als dan sal de HEERE Sebaoth een gheessel ouer hem verwecken,^* ghelijck als inden slach Midian op de steenrootse Oreb.⁺ Ende sal zijnen staf dien hy aent meyr ghebruycte, opheffen,^† ghelijck als in Egipten.

† Esaie. 37.f.36

* Iudic. 7.g.25.

+ E vers 26

† Exod. 14.e.21

27

Op die tijt

[p. 5v]

sal sinen last van uwe schouderen wijcken moeten, ende zijn iock van uwen halse. Want dat iock sal veruuylen van vetticheyt.

28

Hy coemt (laet het also zijn) tot Aiath, Hy trect door Migron. Hy monstert zijn Heyr te Michmas.

29

Sy trecken voor onsen legher Geba ouer, Rama is verschrict, Gibeath Sauls vliet,

30

Ghy dochter Gallim crijscht luyde, Hooret toe Laisa, Ghi ellendige Anathoth,

31

Madmena wijct, De borgers tot Gebim stercken hen.

32

Men blijuet by auontueren eenen dach tot Nob, soo sal hy sine hant strecken tegen den berch der dochter Sion, ende teghen den hueuel Ierusalems.

33

^* Maer siet, de HEEre HEEre Sebaoth sal den struyck met macht af houwen, Ende wat hooch opgherecht staet, af corten, dat de hooghe vernedert worden,

* Esaie. 31.b.8. 37.f.36.

34

Ende dat dicke wout sal met yser om ghehouwen worden, ende Libanus sal vallen door den machtighen.