Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hier verhaelt hy haer den voorledenen iammer, ende de gheuanghenisse, op dat sy de toecomende souden waernemen, Van de toecoemst ende dat Rijcke Christi, Hy verwijt haer haren hoochmoet, ende vercondicht Gods straffinghe.

1

⁺DAt^† volck dat in duysternisse wandelt, siet een groot licht:^* Ende ouer den ghenen die daer inden duysteren Lande woonen schijnt het heller.

+ A vers 1

† Mat. 4.b.16.

* 4.Regum. 15.f.29.

2

Ghy maect der Heydenen veel: Daer mede en maect ghy der vruechden niet veel.^* Maer voor v salmen hem verhueghen, ghelijck alsmen hem verhuecht inden Oogste,^† Ghelijck alsmen vrolijck is, alsmen den buete wt deylt.

* Psal. 119.x.163

† Prou. 16.c.19. Esaie. 17.d.13.

3

Want ghy hebt dat iock haers lasts, ende de roede haerder schouderen, ende den stock haers dryuers ghebroken, ghelijck als inder tijdt^† Midian.

† Iudic. 7.f.22.

4

⁺Want alle Crijch met Rumoer, ende een bloedich cleedt sal verbrant, ende met vyere verteert worden.

+ B vers 4

5

^* Want ons is een kindt gheboren, een soon is ons ghegheuen, Wiens heerschappie op zijn schouderen is, ende hy heet Wonderlijck, Raet, Cracht, Heldt, Eewich vader,^† Vreden vorst,

* Luc. 2.a.7.

† Phil. 4.b.9.

6

Op dat zijne heerschappie groot worde,^* ende des vreedts gheen eynde, op den stoel Dauidts, ende zijn Conincrijck, op dat hijt bereyde ende stercke, met oordeel ende gherechticheyt, van nv aen tot inder eeuwicheyt. Sulcx sal doen den ijuer des HEEren Sebaoth.

* Da. 2.g.44. 7.c.14. Ioan. 12.d.34

7

⁺De HEEre heeft een woordt ghesonden in Iacob, ende het is in Israel geuallen,

+ C vers 7

8

Dattet onderuinden sullen alle dat volck Ephraim, ende de borgheren te Samaria, die daer segghen in hoochmoedicheyt, ende in eenen stouten sinne:

9

Tychelsteenen zijn gheuallen, maer wy willent met^† werckstucken weder timmeren. Men heeft Moerbesiboomen af ghehouwen, soo willen wy Cederen in de plaetse setten.

† Viercante steenen.

10

Want de HEEre sal des Rezin Crijschvolck tegen haer verheffen, ende hare vianden te hoope rotten,

11

De Siriers van voren toe, ende de Philisteen van achter toe, op datse Israel verslinden met vollen monde.^† In dien alle en laet zijnen thoorne noch niet af, zijn hant is noch wtghestrect.

† Esaie. 5.d.25. 10.a.4.

12

Soo en keert hem dat volc oock niet tot dien, diet slaet, Ende en vraghen na den HEEre Sebaoth niet.

13

Daeromme sal de HEEre afhouwen van Israel, beyde dat hooft ende den steert, beyde den stronck ende tack op eenen dach.

14

De oude eerlijcke Lieden zijn dat hooft: Maer de Propheten die daer valschelijck leeren, zijn den steert.

15

^† Want de^* Leyders des volcx zijn verleyders: Ende die haer laten leyden, zijn verloren.

† Esaie. 3.c.11. Iere. 23.a.16.

* Voorgangers.

16

⁺Daeromme

+ D vers 16

[p. 5r]

en can de HEEre aen hare Iongelingen gheen blijschappe ghehebben, noch haerder Weeskens ende Weduwen ontfermen. Want si zijn al te samen Huychelaers ende boos, ende alder mont spreect dwaesheyt.^† In dien allen en laet zijnen thoorne noch niet af, zijn handt is noch wtghestrect.

† Esaie. 5.d.25. 10.a.4.

17

Want dat godtloose wesen is ontsteken als vier, ende verteert doornen ende dijstelen, ende bernt als in een dic wout, ende gheeft hooghen roock.

18

^* Wandt dat Landt is verduystert inden thoorne des HEEren Sebaoth, dat dat volc is ghelijck als spijse des viers. Niemant en spaert den anderen.

* Esaie. 5.d.30.

19

Rouen si ter rechter zijden, so lijden si hongher: Eten si ter slincker zijden, soo en worden si niet versaet. Een yeghelijck verslint dat vleesch van sinen arme,

20

Manasse den Ephraim, Ephraim den Manasse. Ende si alle beyde tsamen teghen Iuda.^* In dien alle en laet sinen thoorne niet af, zijn hant is noch wtghestrect.

* Esaie. 4.a.4 5.d.25.