Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Dat volck wort gestraft om dattet Godt verlaet, ende dattet metten godloosen verbont maect, ende by haer hulpe soect, datmen alleen op dat getuyghe der schrift sien sal.

1

⁺VVeest boos ghy volcken, ende gheeft nochtans de vlucht. Hoort ghy alle, ghy die in verren landen zijt?^* Rustet v, ende geeft nochtans de vlucht. Lieue rustet v, ende gheeft nochtans de vlucht.

+ A vers 1

* Wapent.

2

Sluyt^† eenen raet, ende daer en worde niet wt. Bespreect v, ende het en bestae niet. Want hier is Immanuel.

† Psal. 1.a.1. Esaie. 19.c.11. 30.a.1.

3

Want also spreect de HEEre tot my: Ghelijck oft hy my byder handt name, ende onderwees my dat ick niet en sal wandelen opten weghe van desen volcke, ende spreect:

4

Ghy en sult niet segghen: Een verbondt. Dit volc en spreect nieuwers af, dan van verbondt.^* En vreest v niet alsoo, ghelijck als sy doen, ende en laet v niet grouwelen:

* 1.Pe. 3.b.14

5

Maer heylighet den HEEre Sebaoth.^‡ Dien laet uwe vreese ende verschrickinge zijn, soo sal hy een Heylighinge zijn:

‡ 4.R. 17.g.36 Mat. 10.d.28.

6

Maer^† eenen steen des aenstoots, ende een keye der arghernissen den tween huysen Israels, tot eenen strick ende val den Borgheren te Ierusalem,

† Luc. 2.d.34. Roma. 9.d.33. 1.Pet. 2.b.6.

7

So dat haerder veel hen daer aen stooten, vallen, breken, verstrict, ende gheuanghen sullen worden.

8

⁺Bindt toe dat ghetuychenisse, besegelt de wet mijnen Iongheren.

+ B vers 8

9

Want ick hope op den HEEre, die zijn aensicht verborgen heeft, voor den huyse Iacobs. Mer ick verwacht zijnder.

10

^* Siet, Hier ben ick, ende de kinderen die my de HEEre ghegheuen heeft, tot een teeken ende wonder in Israel, vanden HEEre Sebaoth,^* die opten berch Sion woont.

* Hebr. 2.c.13.

* Psal. 9.b.12. 76.a.3. Iohel. 3.c.17.

11

Maer wanneer sy tot v seggen: Ghy moet de^‡ Waerseggers ende Teeckenbedieders vraghen, die daer clappen ende disputeren (dan sult ghy segghen) En sal een volck niet zijnen Godt vraghen? Oft salmen den dooden voor den leuendigen vraghen?

‡ Leui. 19.g.31 20.a.6.

12

Ia na de Wet ende de ghetuygenisse. In dien sy dat niet en seggen, so en sullen sy den morgenstont niet hebben.

13

Maer sy sullen inden Lande rontsomme gaen, seer gheslaghen ende hongherich. Maer als sy hongher lijden, soo sullen sy toornich worden, ende vloecken haren Coninck ende haren Godt.⁺ Ende sullen op haer seluen gapen,

+ C vers 13

14

Ende onder haer de Aerde aensien, ende niet vinden, dan droeffenisse ende duysternisse. Want sy zijn moede inden ancxt, ende gaen dwalende in duysternisse. Want het sal wel een ander moeiheyt zijn, die haer benautheyt maect, dan het in voorledene tijt was,

15

Doent lichtelijck toeghinck^* inden Lande Sebulon, ende inden lande Naphthali, ende doent daer na swaer-der wert aenden weghe des Meyrs, op dese syde der Iordanen, in der Heydenen Galilea.

* Matt. 4.b.15.