Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Een prophetie op de toecoemst Christi streckende, ende op zijn officie, Ende welcken vrede ende ruste den gheloouighen door hem ontmoeten sal.

1

⁺ENde^† daer sal een roede opgaen vanden stamme^* Isai, Ende een spruyte wt zijnder wortele vrucht voort brengen,

+ A vers 1

† Acto. 13.c.23.

* Mat. 1.a.6.

2

^† Opten welcken rusten sal de Gheest des HEEREN, de Gheest des wijsheyts ende des verstants, de Gheest des raets ende der stercten, de Gheest der kennissen ende der vreesen des HEEren.

† Esaie. 61.a.1.

3

Ende zijn riecken sal zijn in de vreese des HEEren. Hy en sal niet oordeelen na dien dat sine oogen sien, noch straffen nae dat ghene dat sine ooren hooren:

4

Maer hy sal met gherechticheydt de Arme richten, ende met gerichte straffen de ellendighe inden Lande, ende sal metten staf zijns monts de Aerde slaen,^† ende metten adem zijnder lippen de godtloose dooden.

† 2.Tes. 2.b.8.

5

^* Gerechticheyt sal dat gordel zijnder lendenen zijn: Ende het ghelooue dat gortsel zijnder nieren.

* Ephe. 6.b.14

6

De^† Woluen sullen by de Lammeren woonen, ende de Luypaerden by den Bocken neder liggen.

† Esa. 65.d.24.

7

⁺Een cleyn knechtken sal Calueren, ende ionge Leeuwen, ende mestvee tsamen drijuen. Koeyen ende Beyren sullen aen der weyden gaen, dat hare ionghen by malcanderen ligghen. Ende Leeuwen sullen stroo eten, ghelijc als de Osschen.

+ B vers 7

8

Ende een kint noch suygende, sal sinen lust hebben aent hol der Aderen, Ende een ghespeent kint sal de hant steken in de Cuylen des Basilisken.

9

Men en sal nerghens quetsen noch verderuen op mijnen heylighen berch. Want^† dat Lant is vol der kennissen des HEEren, ghelijck als met water des Meyrs bedect.

† Abac. 3.d.10.

10

^* Ende het sal gheschieden tot dier tijt, dat de wortel Isai, die daer staet tot eender Banieren den volcken, nae die sullen de Heydenen vragen, Ende zijn ruste sal Eere zijn.

* Roma. 15.b.12

11

^† Ende tot dier tijt sal de HEEre noch eens zijn hant wt strecken, dat hy de ouergebleuene van sinen volcke weder crijge, so wat daer ouerbleuen is,⁺ vanden Assyriers, Egyptenaers, Pathros, Moren lant, Elamiten, Sinear, Hamath, ende vanden Eylanden der zee.

† Esaie. 10.d.22

+ C vers 11

12

^† Ende sal een Banier onder de Heydenen oprechten, ende sal tsamen brengen de veriaechde Israels, ende die verstroyde wt Iuda te hoope voeren, vanden vier eynden des Aertrijcx.

† Luce. 2.e.31.

13

Ende den haet tot Ephraim sal ophouden, Ende de vianden van Iuda sullen wtgheroeyt worden, dat Ephraim den Iuda niet en benijde, ende Iuda niet en sy teghen Ephraim.

14

Maer si sullen den Philisteen teghen den Westen op den halse zijn, ende beroouen alle de ghene die teghen den Oosten woonen. Edom ende Moab sullen hare handen teghen haer vouden. De kinderen Ammon sullen ghehoorsaem zijn.

15

Ende de HEEre sal den stroom des meyrs in Egypten verbannen. Ende sal sine hant laten gaen ouer dat water met sinen stercken winde, ende die seuen stroomen slaen, datmen met scoenen daer door gaen mach.

16

Ende daer sal een bane zijn den ouerghebleuenen van sinen volcke, die ouergebleuen zijn vanden Assyriers, ghelijck als Israel gheschiede,^† ter tijt doen sy wt Egypten lande toghen.

† Exod. 14.f.29