Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hoe Iesaias gheroepen is, ende ghesonden, Hoe tvolc verhart is in boosheden, ende daerom gheplaecht sal worden.

1

⁺INt Iaer^† als de Coninck Vsia sterf,^* so sach ick den HEEre sitten op eenen hooghen ende verheuen Stoel, Ende zijnen soom veruulde den Tempele.

+ A vers 1

† 4.Re. 15.a.7

* Esai. 66.a.1 3.Reg. 22.d.19 2.Par. 6.d.21.

2

Seraphim stonden bouen hem, een yeghelijcke hadde ses Vloghelen, met tween bedeckten sy haer aensicht, met tween bedeckten sy hare voeten, ende met tween vloghen sy.

3

Ende deen riep totten anderen, ende sprack:^† HEILICH, HEILICH, HEILICH IS DE HEERE SEBAOTH:^* ALLE LANDEN SIIN VAN SIINDER EEREN VOL.

† Apoc. 4.b.8. Leuit. 19.a.2.

* Abac. 4.a.3.

4

Also dat de bouenste posten beefden van de stemme haers roepens^† ende dat huys wert vol roocs.

† 3.Reg. 8.b.10.

5

Doen sprack ick: Wee my, ick ben verdoruen, Want ick ben van onreynen lippen, ende woone onder een volck van onreynen lippen.^* Want ick hebbe den Coninck den HEEre Sebaoth ghesien met mijnen ooghen.

* Gene. 32.e.30. Iudic. 13.d.22.

6

Doen vlooch een vanden Seraphim tot my, ende hadde een gloyende kole inde hant die hy metter tanghe vanden Altaer nam,

7

^+† Ende roerde mijnen Mondt aen, ende sprack: Siet, hiermede zijn dijne Lippen aengeroert, op dat uwe misdaet van v ghenomen worde, ende dijne sonde versoendt sy.

Ende ick hoorde de stemme des HEEREN, dat hy sprack:

+ B vers 7

† Iere. 1.a.9.

8

Wien sal ick henen seynden? Wie wil onse bode zijn? Maer ick seyde: Hier ben ick, Seynt my henen.

9

Ende hy sprack: Gaet henen ende spreect tot desen volcke:^† Hoortet, ende en verstaetet niet: Sietet, ende en kennes niet.

† Esaie. 29.b.11. Mat. 13.b.14. Luc. 8.b.10. Mar. 12.b.12. Act. 28.d.26. Rom. 11.b.8.

10

Verstoct dat herte van desen Volcke, Ende laet haer ooren dick zijn, ende verblindt hare ooghen, op dat sy met haren ooghen niet en sien, noch met haren ooren niet en hooren, noch niet en verstaen met haer herte, ende haer bekeeren, ende genesen.

11

Maer ick sprac: HEEre, hoe lange? Hy sprac:^† Tot dat de Steden woest worden sonder Inwoonders, ende de huysen sonder Lieden, ende tot dattet velt geheel woest ligge.

† Leuit. 26.e.32.

12

Want de HEEre sal de Lieden verre wech doen, soo dattet Landt seer verlaten wort,

13

Nochtans sal dat thiende deel daer in blijuen.^* Want het sal wech gheuoert, ende verheert worden, ghelijck als een Eycke ende Linde, de welcke den stam noch hebben, al wordden hare bladeren afghestooten: Een heylich saet sal soodanighen stamme zijn.

* 4.Reg. 17.a.6. 25.a.4.