Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Propheet verwijt den volcke de duechden, die hy haer voor andere volcken ghedaen heeft, Ende daer teghen hare ondancbaerheyt ende onghehoorsaemheyt, ende toont wat straffinghe den verachters aenstaende is.

1

⁺VVel aen, Ick wil mijnen Lieue een Liedeken mijns Ooms singhen, van zijnen Wijnberge.^† Mijn lief heeft eenen Wijnberch op een vette plaetse.

+ A vers 1

† Psal. 80.a.9. Esaie. 3.c.13. Iere. 2.c.18. 12.b.10. Matt. 21.d.33.

2

Ende hy heeft hem betuynt ende met steenhoopen verwaert, ende edele wijngaert rancken daer in geleydt. Hy timmerde oock eenen Toren daer in, ende groef een Wijnpersse daer in. Ende wachtede dat hy druyuen voortbrengen soude: Maer hy bracht wilde druyuen.

3

Nv oordeelt ghy borghers te Ierusalem, ende ghy mannen Iuda tusschen my ende mijnen wijnberghe,

4

^* Wat soudemen doch meer doen aen mijnen wijnberch, dat ick niet aen hem ghedaen en hebbe? Waerom heeft hy dan wilde druyuen ghebracht, als ick wachtede dat hy druyuen soude voortbrenghen?

* 4.Esd. 1.d.21

5

Wel aen, ic wil v toonen wat ic mijnen wijnberge doen wil. Sijnen wandt sal wech ghenomen worden, dat hy verwoest worde,^† Ende zijnen Thuyn sal verschuert worden, dat hy vertreden worde.

† Psal. 80.b.13. 89.e.41.

6

Ick wil hem woest laten ligghen, dat hy niet besneden noch ghesnoeyt en worde.^* Maer datter dijstelen ende doornen op wassen. Ende wil den wolcken beuelen, dat sy daer niet op en reghenen.

* Esaie. 32.b.13.

7

Den Wijnberch des HEEren Sebaoth, dat is thuys Israels, ende de mannen Iuda, zijn lieflijcke planten. Hy wacht na dat recht, Siet, soo ist scheynderye: Na gherechticheyt, Siet, soo ist claghe.

8

⁺Wee den ghenen die^* deen huys aen dandere trecken, Ende den eenen Acker aenden anderen brengen, tot datter geen ruymte meer en sy, dat sy dat Lant alleen besitten.

+ B vers 8

* Abac. 3.b.5. Iob. 20.b.19.

9

Het is voor de ooren des HEEren Sebaoth. Wat gheldet, Oft niet vele dier huysen woest en sullen worden, ende de groote ende fijne ledich staen.

10

^† Want thien Ackers Wijnberchs sullen slechts een Ame gheuen, Ende een mouder saets sal maer een Schepel gheuen.

† Hagg. 2.c.17.

11

Wee den^* ghenen die Smorghens vroech op zijn om haer tot dat suypen te stellen, ende sitten tot inder nacht toe, dat haer den Wijn verhittet.

* Esaie. 56.c.12. Sapien. 2.b.7

12

Ende hebben^* Herpen, Psalters, Trommelen, Pijpen, ende Wijn in hare brasserien, ende en sien op dat werck des HEEren niet, ende en hebben gheen acht op dat gheschapene zijnder handen.

* Iob. 21.b.11. Amos. 6.a.5.

13

^† Daerom sal mijn volck wech gheuoert moeten worden onuersiens, ende zijn heerlijcke sullen hongher lijden, ende zijn ghemeyn Volck dorst lijden.

† Osee. 4.b.6.

14

Daeromme heeft de Helle de siele

[p. 3v]

wijdt op ghesperret, ende de kele bouen maten op ghedaen. Dat onderwaerts varen, beyde haer heerlijcke ende de ghemeyne man: Beyde hare rijcke ende vrolijcken.

15

^† Soo dat een yeghelijck hem buyghen moet, ende een yeghelijck vernedert worde, ende de ooghen der hoouaerdighe verootmoedicht worden.

† Esaie. 2.b.12.

16

Maer dat de HEEre Sebaoth verhoocht worde inden Rechte, Ende Godt de heylighe gheheylicht worde inder gerechticheyt.

17

Dan sullen de Lammeren haer weyden in ghener plaetse, ende vreemdelinghen sullen haer generen inder woestijnen der vetten.

18

⁺Wee den ghenen, die hen te samen coppelen met loosen stricken om onrecht te doen, ende met waghenseelen om te sondighen,

+ C vers 18

19

Ende segghen: Laet zijn werck haest ende gheringe comen, op dat wijt sien. Laet herwaerts varen ende comen den aenslach des heylighen in Israel, op dat wijt wijs worden.

20

^* Wee den genen, die dat quaet goet, ende dat goet quaet heeten. Die wt duysternisse licht, ende wt licht duisternisse maken. Die wt suer, soete, ende wt soete, suer maken.

* Prou. 17.c.15 24.c.24. Mich. 3.a.2.

21

^† Wee den ghenen, die by haer seluen wijs zijn, ende houden haer seluen cloeck.

† Rom. 12.d.17 Prou. 3.a.7.

22

Wee den ghenen die Helden zijn om Wijn te suypen, Ende Crijchsmannen met vol te drincken.

23

Die^‡ den Godtloosen recht gheuen, om der gauen wille, Ende dat recht der Rechtuaerdighen van hen af keeren.

‡ Deut. 17.a.2. Ezech. 13.d.19 Prou. 17.c.15. 24.c.24. Mich. 3.b.5.

24

Daerom, ghelijck als des Vyers vlamme stroo verteert, ende de gloet stoppelen wech neemt, Also sal haer wortele veruuylen, ende haer spruyten op varen ghelijck als stof. Want sy verachten de Wet des HEEren Sebaoth, Ende lasteren de reden des heilighen in Israel.

25

^+† Daeromme is den toorne des HEEREN vergramt op zijn Volck, ende strect zijne hant ouer haer wt, ende slaetse, dat de berghen beuen, Ende haer Lichaem is ghelijck als dreck opter straten.^* Ende in dien alle en laet zijnen toorn niet af, maer zijn hant is noch wt ghestrect.

+ D vers 25

† Num. 11.g.33.

* Esai. 9.c.11. 10.a.4.

26

^† Want hy sal een banier opwerpen verre onder de Heydenen, ende de selue aenlocken vanden eynde der Aerden. Ende siet, haestelijck ende snel comen sy aen,

† Esai. 42.c.24 Deut. 9.e.26.

27

Ende daer en is niemant onder haer moede oft swack, niemandt en sluymert noch en slaept, niemanden en gaet den gordel op van zijnen Lendenen, ende niemandt en breect eenen schoenriem.

28

Haer Pijlen zijn scherp, ende alle hare Boghen ghespannen. De Clauwen haerder Peerden zijn gelijck als keysteenen gheacht, ende hare waghenraders als eenen stormwindt.

29

Sy brullen als Leeuwen, ende brullen als Ionghe Leeuwen.

30

Sy sullen ruysschen, ende den roof grijpen, ende daer af brenghen, alsoo datse niemandt verlossen en sal. Ende sal in dier tijt ouer haer ruysschen als de See.^* Alsmen dan dat Lant aensien sal, Siet, soo ist duyster van ancxt, ende dat Licht en schijnt niet meer, bouen ouer hen.

* Esaie. 9.d.18.