Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hoe datse Godt straffen sal om haerder aftredinghen wille, Ende bysonder de vrouwen, om haerder hoouaerdie, ende oueruloedighe verchieringhe.

1

⁺VVant siet, de HEEre, HEERE Sebaoth sal van Ierusalem ende Iuda nemen alderley voorraet,^* alle voorraet des broots, ende alle voorraet des waters,

+ A vers 1

* 4.Reg. 25.a.3 Ezech. 4.c.16 5.d.16. 14.b.13.

2

Stercke, ende Crijchslieden, Rechters, Propheten, Waersegghers, ende Oudtsten, Hooftlieden ouer vijftich, ende eerlijcke Lieden, Raetgheuers, ende wijse Wercklieden ende cloecke Taelmannen.

3

^† Ende sal hen Ionghelinghen tot Vorsten gheuen, Ende kintsche sullen ouer haer heerschappen.

† Prou. 29.b.18 Eccles. 10.c.12.

4

Ende dat volck sal schenderije bedrijuen, deen ouer den anderen, ende een yeghelijck ouer zijnen naesten. Ende de Ionghelinck sal stout wesen teghen den Ouden, ende een eerloos Man tegen den eerbaren.

5

⁺Dan sal een zijnen broeder wt zijns Vaders huys aengrijpen: Ghy hebt cleederen, weest onse Vorst, helpt ghy dit ongheual.

+ B vers 5

6

Maer hy sal tot dier tijt sweren, ende segghen: Ick en ben gheen Medecijnmeester. Daer en is noch broot noch cleederen in mijnen huyse, en settet my niet tot eenen Vorst inden Volcke.

7

Want Ierusalem valt daer henen, Ende Iuda leyt daer neder, dewijle dat haer tonghe, ende haer doen teghen den HEERE is, dat sy den ooghen zijnder Maiesteyt rebel zijn.

8

Sy gebruycken haer wesen openbaer ende roemen hare sonden,^* ghelijck die te Sodom, ende en verberghense niet. Wee haerder sielen: Want daermede brenghen sy hen seluen in alle ongheluck.

* Ezec. 16.e.49 Gene. 19.a.1.

9

Predict vanden gherechtighen, dat zijt goet hebben, want si sullen de vrucht haerder wercken eten.

10

Maer wee den Godloosen, wandt sy zijn boos,^* ende het sal haer vergouden worden, soo zijt verdienen.

* Mat. 16.d.27. Rom. 2.a.6. Iere. 17.b.10.

11

^‡ Kinderen zijn drijuers mijns Volcx, ende Wijuen Heerschappen ouer hen.^+† Mijn Volck, dijne troosters verleyden v, ende verstooren den wech daer ghy gaen sult.

‡ Eccl. 10.c.12.

+ C vers 11

† Esai. 9.d.15. 28.b.7.

12

Maer de HEERE

[p. 3r]

staet daer ter rechter handt,^* ende is opghetreden de Volcken te oordeelen.

* Iude. c.14. Apoc. 1.a.7.

13

Ende de HEEre coemt ten oordeel metten Outsten zijns Volcx, ende met zijnen Vorsten.^† Want ghy hebt den wijnberch verwoest, ende den roof vanden Armen is in uwen huyse.

† Esaie. 5.a.1. Psal. 80.b.14

14

^* Waeromme vertreedt ghy mijn Volck, ende slaet aen stucken de Persoonen der ellendigher? Spreect de HEEre, HEEre Sebaoth.

* Exod. 23.a.7 Psal. 10.b.8. 37.b.12.d.32. 109.c.16.

15

Ende de HEERE spreect: Daeromme dat de dochteren Sion stout zijn, ende gaen met opghereckten halse, met ghepalleerde aengesichten, treden daer henen, ende swentsen, ende hebben costelijcke schoenen aen haer Voeten,

16

⁺Soo sal de HEEre dat hooftschele der dochteren Sion kael maken, ende de HEEre sal haer chieragie wech nemen,

+ D vers 16

17

In dier tijt sal de HEEre dat chieraet aen de costelijcke schoenen wech nemen,

18

Ende de haecken, de spanselen, de ketenen, de armspanselen, de huyuen, de Doecken, de Lijsten,

19

De Snoeren, de Loouerkens, De Oorspanselen, De Ringhen, de Hayrbanden, de Vyercleederen,

20

De Huycke, de Sluyers, de Buydelen, de Spieghelen, de Schorteldocken, de Boorden, ende de Kedelen.

21

Ende voor den goeden ruecke sal daer stanck wesen, ende voor dat gordele een ongheachte Coorde,

22

Ende voor dat gheulochten ghecrolt hayr, sal daer een kaelheyt zijn,

23

Ende voor een wijde Huycke, eenen enghen sack. Sulcx alle inde plaetse uwer schoonheyt.

24

Vwe mannen sullen doort sweert vallen, ende dijne Crijghers inden strijt. Ende haer poorten sullen trueren ende row dragen, Ende sy sal iammerlijck opter Aerden sitten.

25

^† Alsoo dat seuen Wijuen sullen in dier tijt eenen man aengrijpen, ende segghen: Wy willen ons selfs gheneren ende cleeden, Laet ons slechts na dijnen naem heeten, op dat onse versmaetheyt van ons ghenomen worde.

† Sacha. 8.d.23