Den Bibel, Inhoudende dat Oude ende Nieuwe Testament (Biestkensbijbel)

[p. 2v]

¶ Dat .ij. Capittel.

¶ Van de roepinghe der Heydenen totter Kercken Gods, ende den toecomenden vrede, die door Christum zijnen volcke ontmoeten sal. Een straffinghe om der Afgoderien, ende alle grouwelen.

1

⁺DIt ist dat Iesaia de soon Amoz sach van Iuda ende Ierusalem.

+ A vers 1

2

^† Inde laetste tijt, sal den^* Berch, daer des HEEren huys is, gewisse zijn, hoogher dan alle Berghen, ende bouen alle Hueuelen verheuen worden.^† Ende alle Heydenen sullen daer toe loopen,

† Mich. 4.a.1

* Dani. 2.e.35.

† Sach. 8.d.21.

3

Ende veel Volcx henen gaen, ende seggen:^† Coemt laet ons opten Berch des HEEren gaen, totten huyse des Gods Iacobs, dat hy ons leere zijne wegen, ende dat wy wandelen mogen op zijne voetpaden.^* Want van Sion sal de Wet wtgaen, ende des HEEREN woort van Ierusalem.

† Psal. 122.a.1. Iere. 31.a.6.

* Psal. 50.a.2. Acto. 1.a.8.

4

Ende^† hy sal oordeelen onder de Heydenen, ende straffen veel volcx.^* Dan sullen sy hare sweerden tot ploechijsers, ende hare spiessen tot Sickelen maken. Want gheen Volck en sal teghen dandere een sweert opheffen: Ende en sullen voort aen niet meer leeren Oorloghen.

† Psal. 110.a.6

* Iohel. 3.b.10

5

Comet ghy vanden huyse Iacobs, laet ons wandelen int licht des HEEREN.

6

⁺Maer ghy hebt dijn Volck dat huys Iacobs laten varen. Want si bedrijuens meer, dan die teghen den opganck der Sonnen, Ende zijn dachverkiesers, ghelijck als de Philisteen, ende maken der vreemder kinderen veel.

+ B vers 6

7

Haer Lant is^† vol siluers ende gouts, ende haerder schatten en is gheen eynde. Haer Lant ia vol Peerden, ende haerder Waghens en is gheen eynde.

† Deut. 8.c.13. 17.d.22.

8

Ooc is haer Lant vol^† Afgoden,^* ende aenbeden haerder handen werck, dat haer vingheren ghemaect hebben.

† Esa. 44.b.9 Sap. 13.c.11.d.17.

* Iere. 1.c.16.

9

Daer^† bucket hem de ghemeyne man, daer verootmoedighen hen de Ionckeren, dat en sult ghy hen niet vergheuen.

† Buyghet.

10

Gaet inde steenrootse, ende verbercht v inder Aerden,^† voor de vreese des HEEren, ende voor zijne Heerlijcke Maiesteyt.

† 2.Thess. 1.b.9

11

Want^* alle hooge oogen sullen vernedert worden, ende soo wat hooghe Lieden zijn, die sullen haer moeten buyghen. Maer de HEEre sal alleen hooch zijn op die tijt.

* Psal. 18.c.28. Prou. 6.b.17.

12

Want den^† dach des HEEren Sebaoth, sal gaen bouen alle dat hooueerdich ende hooch is, ende ouer al dat verheuen is, op dattet vernedert worde.

† Esaie. 5.b.15.

13

⁺Oock bouen alle hooghe ende verheuen Cederen op den Libanon, ende bouen alle Eycken in Basan,

+ C vers 13

14

Bouen alle hooge Berghen, ende bouen alle verheuen Hueuelen,

15

Bouen alle hooghe Toornen, ende bouen alle vaste Mueren,

16

Bouen alle schepen in de See, ende bouen alle costelijcken arbeyt,

17

Also dat hem buyghen moet alle hoocheyt der menschen, ende vernederen so wat hooghe lieden zijn, Ende de HEEre alleen hooch sy tot dier tijt.

18

Ende^† met den Afgoden salt gantschelijck wt zijn.

† Seph. 2.b.11. Osee. 10.b.8.

19

^† Dan salmen inder steenrootsen holen gaen, ende inde Clouen der Aerden, van de vreese des HEEren, ende voor zijn heerlijcke Maiesteyt, als hy hem opmaken sal om te verschricken de Aerde.

† Apoc. 6.c.15. Luc. 23.d.29. Osee. 10.b.8.

20

^† In dier tijt sal een yeghelijck wech werpen zijne silueren ende gulden Afgoden (die hy hem hadde doen maken om aen te bidden) inde holen der Mollen ende Vledermuysen,

† Esaie. 31.b.7.

21

Op dat hy mach inde steenreten ende berchspleten cruypen^* voor de vreese des HEEren, ende voor zijn heerlijcke Maiesteyt, Als hy hem opmaken sal om te verschricken de Aerde.

* 2.Tessa. 1.b.9.

22

Soo laet nv af, vanden Mensche die eenen Adem inder Nuesen heeft, Want ghy en weet niet, hoe hooch hy gheacht is.