Den Bibel, Inhoudende dat Oude ende Nieuwe Testament (Biestkensbijbel)

[p. 2r]

¶ De Propheet Iesaia.

¶ Dat eerste Capittel.

¶ De Propheet straft dat volck Israels, Ende hy hout haer hare Gods verachtinghe voor, ende vercondicht hare toecomende schade, ende Gods straffinghe.

1

⁺DIt is dat ghesichte Iesaie des soons Amoz, dat hy sach van Iuda ende Ierusalem,^† inder tijt Vsie, Iotham, Ahas, ende Iehiskia, der Coninghen Iuda.

+ A vers 1

† 2.Par. 26. 27. 28. 29.

2

Hoort^‡ ghy Hemelen, ende ghy Aerde neemt ter ooren, Want de HEEre spreect: Ick hebbe kinderen opgheuoet ende verheuen, ende sy zijn van my afgeuallen.

‡ Deut. 32.a.1. Mich. 1.a.2.

3

^* Een Ossche kent zijnen Heere, ende een Ezel de Cribbe zijns Heeren: Maer Israel en bekennet niet, ende mijn volck en verstaettet niet.

* Iere. 8.a.4.

4

^† O wee des sondighen volcx, Des volcx van grooter misdaet, des boosachtighen saets, der schadelijcker kinderen, die den HEEre verlaten,^* Den heylighen in Israel lasteren, ende te rugghe wijcken.

† Osee. 7.c.13.

* Psal. 89.c.19. Abac. 1.c.12.

5

Wat salmen meer aen v slaen? Als ghy des afwijckens dies niet dan te meer en maect? Dat gantsche hooft is cranck, dat gheheele hert is mat.

6

^† Vander voetsolen aen totten Hoofde toe, en isser niet ghesondts aen hem: Maer wonden ende stramen, ende etterbuylen, die niet vermaect, noch verbonden, noch met olie versoet en zijn.

† Deut. 28.d.35.

7

^† Vwe lant is woest, uwe steden zijn met vyer verbrant. Vreemde verteren uwe Ackers voor uwen ooghen, ende het is woest, ghelijck dat, dat door vreemde verheert is.

† Leui. 26.e.32.

8

⁺Maer soo wat daer noch ouergebleuen is vander dochter Sion, dat is ghelijck als een huysken in eenen Wijnberch, als een nachthutte inden Concommer hof, als een verheerde stadt.

+ B vers 8

9

^* Indien ons de HEERE Sebaoth niet een weynich en liet ouer blijuen, soo waren wy^† als Sodom, ende Gomorra.

* Rom. 9.d.29.

† Gene. 19.e.24

10

Hoort des HEEREN woort, Ghy Vorsten van Sodom: Neemt ter ooren onses Godts Wet ghy volck van Gomorra.

11

Wat^† sal my de menichte uwer offerhanden? Spreect de HEEre. Ick ben sadt der Brandtofferen vanden Rammen, ende des vets vanden ghemesten: Ende ick en hebbe gheenen lust totten bloede der Ossen, der Lammeren ende Bocken.

† Iere. 7.c.20. Mat. 9.b.13. Amos. 5.f.22. Psal. 40.b.7. 50.a.7. Mich. 6.b.7.

12

Als ghy in coemt voor my te verschijnen. Wie eyscht sulcx van uwen handen, dat ghy op mijnen voorhof tredet?

13

^† En brenghet niet meer Spijsoffer soo te vergheefs. Dat rueckwerck is my eenen grouwel.

† Prou. 15.a.8. 21.d.27. Eccle. 35.a.1.

14

De^* Nieuwe Maenden ende Sabbathen daer ghy in te samen coemt, ende moeyte ende ancxt hebt, die en vermach ick niet. Mijn siele is Viant uwer nieuwer Maenden ende iaerghetijden, bouen maten zijn my de selue verdrietelijck, ick bens moede te lijden.

* Amos. 5.d.21.

15

^† Ende al steect ghy schoon uwe handen wt, so verberge ick doch mijn ooghen van v.^* Ende al bidt ghy schoon veel,^† so en hoore ick v doch niet, wandt uwe handen zijn vol bloets.

† 4.Es. 1.c.26 Esai. 59.a.2. Sach. 7.b.13.

* Mat. 6.b.7.

† Prou. 1.c.28. 4.Esd. 1.d.26 Mich. 3.a.4.

16

^+* Wascht, reynicht v,^‡ doet uwe boos wesen van mijnen ooghen. Laet af vant boose,

+ C vers 16

* Iere. 4.c.14

‡ Iere. 7.a.3. 21.c.12. 22.a.3.

17

Leert wat goets doen, denct op tghene dat recht is.^* Helpt den verdructen,^‡ doet den Weesen recht ende helpt der Weduwen saken,

* Eccl. 4.b.12 Pro. 24.b.11. Psal. 82.a.4.

‡ Iere. 21.c.12. 22.a.3. 4.Esd. 2.c.20. Sach. 7.b.10.

18

Soo coemt dan, ende laet ons te samen rechten spreect de HEERE. Al is uwe sonde alschoon bloedt root, soo sal sy doch sneeu wit worden. Ende oft sy alschoon is, als Rosijnverwe, soo sal sy doch als Wolle worden.

19

^† Indien ghy my hooren wilt, soo sult ghy des Lants goeden genieten:

† Deu. 11.b.14 28.b.12. Esaie. 55.a.2.

20

^* Maer ist dat ghy v weyghert, ende zijt onghehoorsaem, soo sult ghy vanden sweerde ghegheten worden. Wandt den Mondt des HEEren seytet.

* Leu. 26.d.25

21

Hoe gaet dat toe? Dat de vroome Stadt een Hoere gheworden is? Sy was vol rechts, gherechticheyt woonde daer inne, maer nv Moordenaers.

22

^† Dijn siluer is schuym gheworden, ende uwen dranck met water ghemengt.

† Prou. 25.a.4. Ezec. 22.b.18.

23

V Vorsten zijn afuallighe ende der dieuen ghesellen.^* Sy nemen alle gheerne geschencken ende dencken op ghiften.^† Den Weeskens en doen sy gheen recht ende der Weduwen sake en coemt niet voor haer.

* Exod. 23.a.8 Deute. 17.a.2. 27.c.26. Eccle. 20.d.31. Ezech. 22.b.12 Psal. 15.a.5. 26.b.10.

† Ezec. 22.a.7. Iere. 5.d.26. Malach. 3.a.5

24

⁺Daerom spreect de HEEre HEEre Sebaoth, de Machtige in Israel: O wee ick sal my troosten door mijne Vianden, ende my wreken door mijne Vianden.

+ D vers 24

25

Ende moet mijne hant teghen v keeren, ende uwen schuym op dalder louterste vaghen, ende al v Tin wech nemen,

26

^‡ Ende v weder Rechters geuen, ghelijck te voren waren, ende Raetsheeren ghelijck int beghinne.^* Als dan sult ghy een stadt der gherechticheyt, ende een vroome stadt heeten.

‡ Hier. 3.b.10.

* Sach. 8.a.3.

27

Sion moet door recht verlost worden, ende hare gheuanghenen door gherechticheyt,

28

Op^† dat de Ouertreders ende Sondaers tsamen met malcanderen in stucken ghebroken worden,^* ende die den HEEre verlaten, vergaen.

† Psal. 125.a.3.

* Iere. 17.b.13. Psal. 125.a.5.

29

Want sy moeten te schande worden, vanden Eycken daer ghy lust toe hebt, ende beschaemt worden van de houen, die ghy verkiest.

30

Wanneer ghy zijn sult, ghelijck een Eycke met dorre bladeren, ende ghelijck als eenen Hof sonder water.

31

Als de beschuttinghe zijn sal ghelijck als Heyde, ende zijn doen ghelijck een voncke,^* ende beyderley tsamen aenghesteken wordde, dattet niemandt wt en blussche.

* Ezech. 21.a.3.