Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

1

⁺ HOe schoon is uwen ganck in den schoenen, ghy Vorsten dochter? Vwe lendenen staen gelijck aen malcanderen, ghelijck twee spanselen, die des Meesters hant gemaect heeft.

+ A vers 1

2

Vwen nauel is gelijck eenen ronden beker, dien nemmermeer dranck en ontbreect. Vwen buycke is ghelijck eenen tarwen hoop, met roosen omsteken.

3

^† Vwe twee borsten zijn gelijck twee ionge Rehen tweelinghen.

† Cantic. 4.a.5.

4

Vwen hals is ghelijck eenen yuooren toorne. Vwe ooghen zijn gelijck de poelen tot Hesbon, aen de poorte Bathrabbim. Vwen nuese is ghelijck den toorne op Libanon, die teghen Damascon siet.

5

Vwe hooft staet op v, gelijck Carmelus. Dat hayr op uwe hooft is gelijck den Purpur des Conincx in ployen ghebonden.

6

^+* Hoe schoone ende hoe lieflijck zijt ghy, ghy beminde in wellusten.

+ B vers 6

* Cantic. 2.c.15.

7

Vwe lengde is gelijck eenen Palmboom, ende uwe borsten den wijndruyuen.

8

Ick sprack: Ick moet opden palmboom climmen, ende zijne tacken aengrijpen. Laet uwe borsten zijn, gelijck druyuen aen den wijnstock,

9

Ende uwer nuesen ruecke ghelijck appelen, ende uwe kele ghelijck goeden wijn, die mijnen vrienden glat in gae, ende spreke van ouden [dinghen.]

10

Mijn vriendt is mijn, ende hy hout hem tot my.

11

Coemt mijn vrient, laet ons wt gaen op dat velt, ende op de dorpen blijuen,

12

Op dat wy vroech op staen totten wijnberghen, dat wy sien, oft den wijnstock bloye^* ende ooghen ghecreghen heeft Oft de granaetappel boomen wtgheslaghen zijn. Daer wil ick v mijne borsten gheuen.

* Cantic. 2.c.13.

13

De Lelien gheuen den rueck, ende voor onse duere zijn alderhande edele vruchten. Mijn vriendt, ick hebbe v beyde nieuwe ende oude ghehouden.