Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

1

⁺ VVerwaerts is uwe vrient gegaen, O ghy schoonste onder de wijuen? Werwaerts heeft hem v vriendt ghekeert? So willen wy met v hem soecken.

+ A vers 1

2

Mijn vrient is neder ghegaen in zijnen hof, tot den cruythoofkens, dat hy hem in de houen soude weyden, ende roosen plucken.

3

Mijn vrient is mijn, ende ick ben zijn, die hem onder de roosen weydet.

4

^* Ghy zijt schoone mijn vriendinne,

* Cantic. 1.c.15.

[p. 239v]

ghelijck Thirza, lieflijck ghelijck Ierusalem, verschrickelijck ghelijck een heyrscherpte

5

(Keert uwe ooghen van my, want sy maken my vyerich)^* Vwe hayren zijn ghelijck een cudde gheyten, die opten berch Gilead gheschoren zijn.

* Cantic. 4.a.1.

6

Vwe tanden ghelijck een cudde Schapen, die wt der wassche comen, die altemael tweelinghen draghen, ende daer en is gheene onuruchtbaer onder hen.

7

Vwe wanghen zijn ghelijck een schale aen eenen granaet appele, tusschen uwe vlechten.

8

^† Tsestich is der Coninghinnen, ende tachtentich der byslaperschen, ende der meyskens en is gheen ghetal.

† 3.Reg. 11.a.3.

9

⁺ Maer eene is mijn duyue, mijne vrome. Een is haerder moeder de liefste, ende de wtuercorene haerder moeder. Doense de dochteren saghen, presense die selue salich. De Coninginnen ende de byslaperschen loefdense.

+ B vers 9

10

Wie is die voort coemt, gelijck den dagheraet, schoone gelijck de Mane, wtuercoren ghelijck de Sonne, verschrickelijck ghelijck de heyrscherpte?

11

Ick ben nederghegaen inden noothof om te beschouwen de struycxkens aen de beke, om te sien, oft den wijnstock bloeyt oft de granaet appelen groenden.

12

Mijne siele en wistet niet, dat hy my tot eenen waghen Amminadab gheset hadde.

13

Keert weder, Keert weder, O Sulamith: Keert weder, keert weder, dat wy v aenschouwen. Wat siet ghy aen Sulamith, dan reyen te Mahanaim.