Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

1

⁺ MIjne vrient come in zijnen hof, ende ete van zijne edele vruchten. Ic come mijn suster lieue bruyt in mijnen hof. Ick heb mijn Myrrhe met mij-nen cruyden af ghebroken. Ick heb van mijn seem met mijnen huenich geten. Ick heb van mijnen wijn met mijnen melcke ghedroncken. Etet mijne beminden, ende drinct mijne vrienden, ende wort droncken.

+ A vers 1

2

Ick slape, maer mijn herte waect, daer is de stemme mijns vrients, die aenclopt. Doet my open lieue vrindinne, mijne suster, mijn duyue, mijn vrome. Want mijn hooft is vol daus, ende mijn hayr vol nacht druppelen.

3

⁺ Ick heb mijnen rock wt getrocken, hoe sal ick hem weder aen ghetrecken? Ick hebbe mijne voeten ghewasschen, hoe sal ickse weder vuyle maken?

+ B vers 3

4

Maer mijn vrient steect zijn hant door een hol, ende mijn lichaem beeft daer voor.

5

Doen stont ic op, dat ick mijnen vrient open soude doen. Mijne handen droopen met myrrhen, ende myrrhen liepen ouer mijn vingeren, aenden grendel aent slot.

6

Ende doen ick mijnen vrient open gedaen hadde, was hy wech, ende henen ghegaen. Doen ghinck mijn siele wt na zijn woort.^† Ick socht hem, maer ick en vant hem niet. Ic riepe, maer hy en antwoorde my niet.

† Cantic. 3.a.1.

7

⁺ De wachters die inde Stadt om ghaen, vonden my, die sloeghen my wonden. De wachters opter mueren, namen my mijnen sluyer.

+ C vers 7

8

^* Ick beswere v ghy dochteren Ierusalems, vindet ghy mijnen vrient, soo segt hem, dat ick van liefden cranck ligghe.

* Cant. 2.b.7. 3.a.5.

9

Wat is uwe vrient voor andere vrienden, O ghy schoonste onder den wijuen? Wat is uwe vrient voor andere vrienden, dat ghy ons soo besworen hebt?

10

Mijne vrient is witte ende root, wtghecoren onder veel duysenden.

11

Sijn hooft is dat fijnste goudt. Sijne hayren zijn ghecrolt, swert ghelijck een raue.

12

⁺ Sijn^† ooghen zijn gelijck duyuen ooghen, aen de waterbeken, met melck gewasschen, ende staen in volheyt.

+ D vers 12

† Cantic. 1.c.15.

13

Sijne kinnebacken zijn ghelijck de wassende Cruythoofkens der Apotekers. Sijn lippen zijn ghelijck roosen, die met vloeyender Myrrhen druypen.

14

Sijn handen zijn ghelijck gulden ringhen, vol Torkoysen. Sijn lichaem is gelijck reyn yuooren met Saphiren verciert.

15

^* Sijne beenen zijn gelijck Marmor columnen, ghefundeert op gulden voeten, Sijn ghedaente is ghelijck Libanon, wtuercoren gelijck Cederen.

* Eccle. 26.c.24

16

Sijn kele is soete ende gheheel lieflijck. Een sodanighen is mijn vrient, mijne vrient is een sodanighe, ghy dochteren Ierusalems.