Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

1

⁺ SIet, mijn vriendinne, ghy zijt schoon, siet, schoone zijt ghy. Vwe oogen zijn ghelijck duyuen oogen, tusschen uwe vlechten.^* Vwe haer is ghelijck de geyten schaer, die geschoren zijn opten berch Gilead.

+ A vers 1

* Cantic. 6.a.5.

2

Vwe tanden zijn ghelijck de cudde met besnedender wolle, die wt der wasschen comen, die altemael tweelinghen draghen, ende onder hen en is gheene onuruchtbaer.

3

Vwe lippen zijn gelijck een rosijn varwen snoer, ende uwe redene lieflijck. Vwe wanghen zijn ghelijck de schale aenden granaetappel tusschen uwe vlechten.

4

Vwen hals is gelijck den toorne Dauid, met borstgeweer ghetimmert, daer aen duysent schilden hanghen, ende alderhande wapenen der stercken.

5

^† Vwe twee borsten zijn ghelijck twee ionghe Rehen tweelingen, die onder de roosen weyden,

† Cantic. 7.a.3.

6

Tot dat den dach coel worde, ende de schaduwe wijcke. Ick wil totten Myrrhen berch gaen, ende totten wieroock hueuele.

7

⁺ Ghy zijt in alder manieren schoon mijn vriendinne ende daer en is geen vlecke aen v.

+ B vers 7

8

Coemt mijn bruyt van Libanon, coemt van Libanon, gaet in, treedt herwaerts vander hoochten^† Amana, vander hoochten Senir ende Hermon, vander wooninghen der Leeuwen, vanden berghen der Leopaerden.

† 4.Reg. 5.c.12.

9

Ghy hebt my dat herte ghenomen, mijne suster lieue bruyt, met uwer ooghen eene, ende met uwer halsketene eene.

10

Hoe schoon zijn uwe borsten mijn sustere, lieue bruyt. Vwe borsten zijn lieflijcker dan wijn, ende den rueck uwer saluen gaet te bouen alle cruyden.

11

Vwe lippen mijn bruyt, zijn ghelijck druypende honichseem. Honich ende melck is onder uwe tonghe. Ende uwen cleeder rueck, is ghelijck den rueck Libanon.

12

⁺ Mijn suster, lieue bruyt, ghy zijt eenen beslotenen hof, een besloten fonteynadere, eenen beseghelden put.

+ C vers 12

13

Vwe vrucht is ghelijck eenen lusthof van granaetappelen, met edelen vruchten, Cypren met Nardus,

14

Nardus met soffraen, Calmus ende Caneel, met alderley boomen des wieroocx, Myrrhe ende Aloës, met alle beste cruyden,

15

Ghelijck een hof fonteyne, ghelijck een fonteyne der leuender wateren, die van Libanon vloeyen.

16

Staet op Noordenwint, ende coemt Suydenwint, ende waeyt door mijnen hof, op dat zijn cruyden druypen.