Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

1

⁺ O Dat ick v mijn broeder, ghy die mijnder moeder borsten suyghet, daer buyten vonde, ende v cussen moeste, dat my niemant en beschimpte.

+ A vers 1

2

Ick wilde v leyden, ende in mijnder moeder huys brenghen, daer ghy my leeren sout. Daer wilde ick v drencken met ghemaecten wijn, ende metten most mijnder granaet appelen.

3

^* Sijne slincke hant leyt onder mijn hooft, ende zijne rechte handt omhelset my.

* Cantic. 2.a.6.

4

^* Ick beswere v dochteren Ierusalems, dat ghy mijne beminde niet op en wect, noch en roeret, tot dattet haer seluer lustet.

* Cantic. 2.b.7. 3.a.5.

5

⁺ Wie is die, die daer op vaert vander woestijnen, ende lenet op haren vrient? Onder den appelboom wecte ick v, daer uwe moeder v ghebaert hadde, daer met v ghelegen heeft, die v gewonnen heeft.

+ B vers 5

6

Settet my ghelijck eenene seghel op uwe herte, ende ghelijck eenen seghel op uwen arme. Want de liefde is sterck gelijck de doot, ende^* ijuer is vaste ghelijck de Helle. Haren gloet is vierich, ende een vlamme des HEEren,

* zeloersheyt.

7

Dat^† oock vele wateren de liefde niet en moghen wt blusschen, noch de stroomen die verdrincken. Al wilde een allet goet in zijnen huyse om de liefde gheuen, soo en soude dat alle niet gelden.

† Roma. 8.e.35.

8

Onse suster is cleyne, ende en heeft gheene borsten. Wat sullen wy onser suster doen, alsmense nv sal aenspreken?

9

⁺ Is sy eenen muere, soo willen wy siluere bolwercken daer op timmeren. Is sy een duere, so willen wyse vestigen met Cederen tafelen.

+ C vers 9

10

Ick ben een muere, ende mijne borsten zijn ghelijck toornen, daer ben ick gheworden voor zijnen ooghen, als de ghene die vrede vindet.

11

Salomo heeft eenen wijnberch tot BaalHamon^* Hy gaf de wijnberch den bewaerders, dat een yeghelijck voor zijn vrucht brachte duysent siluerlinghen.

* Matt. 21.d. 33.

12

Mijnen wijnberch is voor my, V Salomo behoorender duysent, maer den bewaerders tweehondert met zijnen vruchten.

13

Ghy die inde Houen woont, laet my uwe stemme hooren, die gheselschappen mercken daer op.

14

Vliedt mijn vriendt, ende zijt ghelijck eenen Rhee of ionghen Hirte, op den cruyt berghen.

¶ Eynde des hooghen Liets Salomonis.