Den Bibel, Inhoudende dat Oude ende Nieuwe Testament (Biestkensbijbel)

[p. 238v]

Dat hooge Liet Salomo.

¶ Dat eerste Capittel.

1

⁺ HI cusse my metten Cusse zijns monts, wandt uwe borsten zijn lieflijcker dan wijn,

+ A vers 1

2

Datmen v goede salue riecke.^* Vwen Naem is een wtghestorte salue, daerom beminnen v de meyskens.

* Eccle. 7.a.2. Prou. 22.a.1. Eccle. 42.a.7

3

Trect my na v, so loopen wy. De Coninc leydet my in zijn Camere, Wy verblijden ons, ende zijn vrolijc ouer v. Wy ghedencken uwer borsten meer dan des wijns: De vrome beminnen v.

4

⁺ Ic ben swert, maer seer lieflijc, ghy dochtere Ierusalems, ghelijck de Hutten^† Kedar^* gelijc de tapite Salomo.

+ B vers 4

† Gen. 25.b.12

* 2.Pa. 3.c.14

5

En siet my niet aen, dat ick so swert ben,^‡ want de Sonne heeft my verbernt. Mijnder moeder kinderen zijn toornich op my, men heeft my tot eender bewaerdersen der wijnbergen geset: Maer mijnen wijnberch dien ick hadde, en heb ick niet bewaert.

‡ Apo. 7.c.16. Psal. 121.a.6.

6

Geeft my te kennen, ghy die mijn siele bemindt, waer ghy weydet, waer ghy rust, inden middage, op dat ick niet herwaerts ende derwaerts gaen en moete, by de cudden uwer gesellen.

7

En kent ghy v niet, ghy schoonste onder den wijuen, soo gaet henen wt, op de voetstappen der Schapen, ende weyt uwe Bocken by der Herderen huysen.

8

Ic gelijcke v mijne vriendinne, mijnen reysigen getuych aen den wagen Pharao.

9

⁺ Vwe wangen staen lieflijc inden spansel, ende uwen hals inde keten,

+ C vers 9

10

Wy willen v gulden spanselen maken met silueren puckelkens.

11

Doen hem de Coninc herwaerts keerde, gaf mijne Nardus zijnen rueck.

12

Mijn vrient is my een bosselken Myrren, dat tusschen mijn borsten hangt.

13

Mijn vrient is my een Druyuen coffer in de Wijngaerden te Engeddi.

14

^* Siet, mijn vriendinne, ghy zijt scoon, schoone zijt ghy.^† Vwe oogen zijn gelijc duyuen oogen.

* Cant. 6.a.4

† Cant. 5.d.12.

15

Siet mijn vrient, ghy zijt schoon ende lieflijck. Ons bedde groenet.

16

Onser huysen balcken zijn Cederen: Onse latten zijn Cypressen.