Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ In dit Capittel bewijst de Prediker zijn gheheel meyninghe, recht oft hy segghen woude, Als ick van allen dinghen die onder der Sonnen zijn, gheproeft, ghedacht, ende gesproken heb, Soo is dit tslot van allen, Datter niet vasters noch gheduerigers en is, dan God, ende zijn vonnisse van der ioncheyt op voor ooghen te hebben.

1

⁺SOo verblijdt v Ionghelinck in uwer iuecht, ende laet dijn herte vrolijc zijn in uwer iuecht. Doet wat uwer herten lustet, ende uwen oogen behaecht, ende weet dat Godt v, om alle dit, voort oordeel sal leyden.

+ A vers 1

2

^* Laet de truericheydt wt uwer herten, ende neemt dat quaet van uwen lichaem. Want de kintsheydt ende iuecht is ydelheyt.

* Eccle. 30.c.22.

3

Gedenct ws Sceppers in uwer iuecht, eer dan de quade daghen comen, ende de iaren ghenaken, wanneer ghy sult segghen: Sy en behaghen my niet.

4

^* Eer dan de Sonne ende dat licht, de Mane, de Sterren duyster worden, ende wolcken weder comen nae den reghen.

* Mat. 24.b.29 Iohel. 2.b.10. 3.c.15.

5

⁺Ter tijt als de wachters in huys beuen, ende de stercke hen crommen, ende de molders ledich staen, dat haerder soo weynich gheworden is, ende de ghesichten door de vensters duyster worden, ende de dueren opter straten toe gesloten worden, dat de stemme der molenarinnen soo lijfelijc wordt, ende ontwaect als den voghel singt, ende alle dochteren des sangs haer buyghen.

+ B vers 5

6

Dat oock de hooghe vreesen, ende ontsien op den weghe, als den Amandelboom bloeyt, ende de Sprinchaen verladen wordt, ende alle wellust ophout (want de mensce vaert derwaerts, daer hy eewelijck blijft, ende de Clagers gaen omme op de strate)

7

Eer dan den silueren strick wech coemt, ende de gulden adere verloope, ende den Eemer verleke aen den putte, ende dat dat radt breke aen den putte.^* Want dat stof moet weder totter Aerden comen, ghelijck hy geweest is:^† Ende de geest weder tot Gode, dien hem ghegheuen heeft.

* Gene. 3.d.19. Eccle. 41.a.1.

† Eccle. 3.c.22.

8

^* Alle dinck is gheheel ydel, sprack de Prediker, gheheel ydel. Die selue Prediker en was niet alleen wijs, maer leerde ooc den volcke goede leeringe, ende mercte, ende ondersocht,^* ende maecte vele spruecken.⁺ Hy socht dat hy aenghename woorden soude vinden, ende schreef te recht de woorden der waerheyt.

* Eccle. 1.a.2.

* 3.Reg. 4.c.32. Prouerbia.

+ C vers 8

9

^† Dese woorden der wijsen zijn spiessen ende naghelen, gheschreuen door de Meesters der ghemeynten, ende van eenen Herder ghegeuen.

† Hebre. 4.c.12

10

Wacht v mijn sone, voor andere meer, want vele Boecken makens en is gheen eynde, ende veel predikens, maect dat lijf moede.

11

Laet ons de hooftsomme alder leeringhen hooren:^† Vreest Godt,^* ende hout sine gheboden, want dat behoort alle menschen toe.

† Apoc. 14.b.7. 4.Esdre. 16.g.68.

* Mat. 19.c.17

12

Want^‡ God sal alle wercken voort Oordeel brenghen,^† dat verborghen is, het sy goet oft quaet.

‡ Ro. 14.b.10. 2.Cor. 5.b.10. Mat. 12.d.30.

† 1.Cor. 4.a.5

¶ Eynde des Predikers Salomo.