Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ In dese twee nauolghende Capitulen zijn vele profitelijcke leeringen, ende wijse spruecken, welcke alleman wel behoort te aenmercken ende te onthouden.

1

⁺DAer is een ongheluck, dat ick sach onder der sonnen, te weten, onuerstant dat onder den gheweldighen ghemeyne is:

+ A vers 1

2

Dat een Sot sittet in grooter waerdicheyt, ende de Rijcken hier beneden sitten.

3

^† Ick sach knechten op rijpaerden, ende Vorsten te voet gaen, ghelijck knechten.

† Prou. 17.a.2.

4

^*Maer wie eenen cuyle maect, die sal seluer daer in vallen: Ende wie den tuyn breect, dien sal een slanghe steken.

* Prou. 26.c.27 Eccle. 28.a.2. Psal. 7.b.16. 9.c.16. 35.b.8. 1.Hes. 7.c.10. Susan. g.62. Dani. 6.c.24.

5

Wie steenen wech wentelt, die sal daer moeyte mede hebben: Ende wie hout clieft, die sal daer af ghequetst worden.

6

⁺Ist dat een ijser plomp wort, ende aen de wate ongheslepen blijft, so moetment met macht weder scherpen: Alsoo volget oock wijsheyt der naersticheyt.

+ B vers 6

7

Een clappaert en is niet beter, dan een slanghe, die ombesworen steeckt.

8

De woorden wt den monde eens wijsen, zijn lieffelijc: Maer des sotten lippen verslinden hem seluen.

9

Dat beghintsel zijnder woorden is sotheyt, ende dat eynde is scadelijcke dwaesheyt.

10

Een sotte maeckt veel woorden, want de mensche en wetet niet wat gheweest is. Ende wie wil hem seggen, wat nae hem zijn sal?

11

Den arbeyt der Sotten wordt hen suer, dewijle men niet en weet in de Stadt te gaen.

12

⁺Wee v Lant^† dies Coninck een kint is, ende dies Vorsten vroech eten.

+ C vers 12

† Esaie. 3.a.3. Prou. 28.c.16.

13

Wel v Lant, dies Coninck edel is, ende diens Vorsten ter rechter tijt eten, ter stercheyt ende niet ter lust

14

(Want door luyheyt sincken de balcken, ende door traghe handen, wordt dat huys lekende) dat doet,

15

Sy maken broodt tot eenen lachen,^* ende den wijn moet de leuende verblijden, ende dat ghelt moet hen alle dinck te weghe brenghen.

* Psa. 104.b.15 Eccle. 32.a.7.

16

En vloeckt den Coninck niet in dijn herte, ende en vloeckt den rijcken niet in uwe slaepcamer. Want de voghelen des Hemels voeren de stemme wech: Ende die vederen hebben, segghent nae.