Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Niemant en weet wat dat goet ende toecomende is, Ende hoe costelijc dat eenen goeden naem is. Van dat profijt der wijsheyt.

1

⁺VVant wie weet, wat den mensche nut is inden leuen, also langhe als hy leeft in zijnder ydelheyt, dwelck wech vaert gelijc een schaduwe? Oft wie wil den mensche segghen, wat nae hem comen sal, onder der Sonnen.

+ A vers 1

2

^* Een goet geruchte is beter dan goede salue, ende den dach des doots is beter, dan den dach der gheboorten.

* Prou. 22.a.1. Canti. 1.a.3. Eccle. 42.a.7

3

Het is beter in dat claechhuys gaen, dan in dat drinck huys. Int gene is dat eynde alder menscen, ende de leuende nemet ter herten.

4

Trueren is beter dan lachen, want door trueren wort dat herte ghebetert.

5

Dat herte der wijsen is int claechhuys. Ende dat herte der Sotten int huys der blijschappen.

6

^† Het is beter hooren dat schelden des wijsen, dan hooren den sanc der Sotten.

† Prou. 27.a.5.

7

Want dat lachen der Sotten, is ghelijck dat craecken der doornen onder den potte, Ende dat is oock ydelheyt.

8

Een wederspannige, maect eenen wijsen onwillich, ende verderuet een milde herte.

9

Dat eynde eens dincx is beter, dan zijn beghinsel. Een verduldige geest, is beter dan eenen hooghen gheest.

10

⁺En^† zijt niet snel van ghemoede, om toornich te worden, want de toornicheyt rust int herte eens Sotten.

+ B vers 10

† Iacob. 1.c.19. Math. 5.c.22.

11

En segghet niet: Wat ist, dat de voorleden daghen beter waren dan dese? Want ghi en vraecht sulcx niet wijsselijck.

12

De wijsheydt met eene erffenisse is goet, ende helpt dat hem een vander Sonnen verhueghen can.

13

Want ghelijck als de wijsheydt beschermt, soo beschermt dat ghelt oock: Maer de kennisse der wijsheydt gheeft dat leuen dien, diese heeft.

14

Aensiet de wercken Gods, want wie can dat slicht gemaken, dat hy crommet?

15

Inden goeden dage, zijt goets moets, ende den boosen dach neemt ooc voor goet: Want desen scheppet Godt neffens ghenen. Daerom dat de mensche niet weten en sal wat toecomende is.

16

Alderley hebbe ic gesien, den tijt ouer

[p. 237r]

mijne ydelheyt. Daer is een Rechtuaerdige,⁺ ende vergaet in zijnder gerechticheyt: Ende daer is een godloose, die leeft langhe in zijnder boosheyt.

+ C vers 16

17

En zijt niet al te rechtueerdich, ende niet al te wijs, op dat ghy v niet en verderft.

18

En zijt niet al te godloos, ende en sottet niet, op dat ghi niet en sterft ter ontijt.

19

Het is goet, dat ghy dit vatet, ende tghene oock niet wt uwer hant en laet. Want so wie God vreest, dien ontgaet dien alle.

20

^† De wijsheyt sterct den wijsen meer, dan thien geweldige die inder stadt zijn.

† 2.Re. 20.c.16

21

Want^* daer en is gheen mensche op Aerden die wat goets doet, ende niet en sondighe.

* 2.Par. 6.f.36. Luc. 17.a.3. 4.Esd. 8.d.35. 1.Ioan. 1.b.8.

22

En neemt ooc niet ter herten al watmen seyt, op dat ghy niet hooren en moet, dat v uwe knecht vloecket:

23

Want v herte weet wel, dat ghy ooc ander dicwils gheuloect hebt.

24

Sulcx alle heb ick wijslijc gheproeft.^† Ick dachte: Ick wil wijs zijn: Maer sy quam verder van my.

† Iob. 28.b.12.

25

Het is verre, wat salt zijn? Ende is seer diepe, wie wilt vinden?

26

⁺Ick keerde mijn herte om te onderuinden, ende te ondersoecken, ende te soecken wijsheyt, ende const, ende te onderuindene der godloosen dwaesheyt, ende dolinge der dullen:

+ D vers 26

27

^‡ Ende beuont dat een sulcken wijf, der welcker herte een nette ende strick is, ende hare handen banden zijn, bitterder sy dan de doot. Wie Gode behaecht die sal haer ontcomen: Maer de Sondaer wort door haer gheuanghen.

‡ Prou. 7.c.21.

28

Siet, dat heb ick beuonden, seyt de Prediker, Deen na den anderen, op dat ick Conste onderuonde:

29

Ende mijne siele soecket noch, ende en heeftse niet gheuonden. Onder duysent heb ic eenen mensce geuonden: Mer ic en heb onder alle die, geen wijf geuonden.

30

Alleen aenschout dat, Ick hebbe gheuonden^† dat God de menschen oprecht ghemaect heeft: Maer sy soecken veel Consten. Wie is soo wijs? Ende wie can dat wtlegghen?

† Gen. 1.d.26. Sap. 2.c.23. Eccles. 10.c.22. 17.a.8.