Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Teghen de rijcke, die haerder rijckdommen niet en deruen genieten, hoe dwaes dat de selue zijn.

1

⁺DAer is een ongheluck dat ick sach onder der Sonnen, ende is gemeyne byden menschen.

+ A vers 1

2

^† Een dien God rijcdom, goeden ende eere ghegheuen heeft, ende hem niets en ghebreect dat zijn herte begheert, ende God hem nochtans geen macht en geeft, des seluen te ghenieten, Maer een ander verteeret, Dat is ydelheydt ende een quade plaghe.

† Dani. 5.

3

Al waert dat hi ooc hondert kinderen wonne, ende leefde soo langhe, dat hy veel iaren ouer leefde, ende sine siele en versadet haer doch van dien goede niet, ende bleef sonder graf, Van dien spreke ick, dat een ontijdighe gheboorte beter sy dan hy.

4

Want in ydelheyt coemt hy, ende in duysternisse vaert hy daer henen, ende sinen naem blijft in duysternisse bedect.

5

Hy en wort vande Sonne niet vrolijc, ende en weet gheen ruste, noch hier, noch daer.

6

⁺Al waert dat hy oock twee duysent iaer leefde, soo en heeft hy doch nemmermeer eenen goeden moet. En comet niet alle dinck tot eender plaetsen?

+ B vers 6

7

Eenen yeghelijcken mensche is arbeyt opgheleyt nae zijnder mate: Maer dat herte en can daer niet by blijuen.

8

Want wat beschiet een wijs man meer, dan een Sot? Wat onderstaet hem de arme, dat hy onder de leuende wil zijn?

9

Het is beter dat teghenwoordighe goet te ghebruycken, dan nae ander ghedencken, dat is oock ydelheyt ende iammer.

10

Wat ist, wanneer een al scoon hooch beroemt is? So weetmen doch dat hi een mensche is, ende en can niet twisten, teghen dien dat hem te machtich is.

11

Want des ydelen dincx is veel, wat heeft een mensche meer daer af?