Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Teghen de sotte, stoute, ende ongerechte geloften, Men en behoort niet te verwonderen datter veel onbehoorlijcheyt gheschiet, want der schalcken zijn veel, Teghen de rijcke ende rijckdommen.

1

⁺BEwaert uwen voet, als ghy totten huyse Gods gaet,^* ende coemt dat ghy hooret. Dat is beter dan der Sotten offer, want si en weten niet, wat si quaets doen.

+ A vers 1

* 1.Reg. 15.d.22

2

En zijt niet snel met uwen monde, ende en laet v herte niet haesten, yet te spreken voor Godt.^* Want God is inden hemel, ende ghy opter Aerden.^† Daerom laet uwer woorden weynich zijn. Wandt waer veel sorghe is, daer comen droomen: Ende waer veel woorden zijn, daer hoortmen de Sotten.

* Psal. 115.a.3.

† Mat. 6.b.7. Iacob. 1.b.19.

3

^* Ist dat ghy Gode een gelofte doet, so en vertrecse niet te houden. Want hy en heeft geen behagen aen de sotte. Wat ghy ghelooft dat hout.

* Deut. 23.d.21. Baru. 6.e.34. Psal. 76.b.12.

4

Het is beter, dat ghy niet en ghelooft, dan dat ghy niet en hout, dat ghy ghelooft.

5

En verheughet uwen mont niet, dat hy dijn vleesch verleyde, Ende en spreect voor den Enghel niet: Ick ben ontschuldich. Godt mocht toornich worden op uwe stemme, ende verderuen alle wercken uwer handen.

6

Waer veel droomen zijn, daer is ydelheyt, ende veel woorden: Maer vreeset ghy Godt.

7

^† Siet ghy den Armen onrecht doen,

† Eccle. 4.a.1. Abac. 1.a.2.

[p. 236v]

ende recht ende gherechticheyt inden lande wech trecken, so en verwondert v dies voornemens niet.⁺ Want daer is noch een hoogher Hoedere ouer den hoogen, ende daer zijn noch hoogher ouer die beyde.

+ B vers 7

8

Daer en bouen is noch de Coninc int gheheele lant, dat velt te bouwen.

9

^* Wie gelt lief heeft, die en wort des ghelts nemmermeer sadt. Ende wie rijcdom lief heeft, die en sal daer gheen nutticheyt af hebben, dat is oock ydelheydt.

* Baruc. 3.c.17.

10

Want waer veel goets is, daer zijnder veel diet eten. Ende wat batet dien, diet heeft, dan dat hijt met den oogen aensiet?

11

^* Wie arbeyt, dien is den slaep soete, Hy hebbe weynich oft veel geten:^† Mer de oueruloedicheyt des rijcken en laet hem niet slapen.

* Eccle. 31.b.22.

† Iob. 20.b.22

12

Dat is een boose plaghe, die ick sach onder der Sonnen: Rijckdom bewaren ter schaden, dies dien heuet.

13

Want de rijcke vergaet met grooten iammer. Ende ist dat hy eenen sone gewonnen heeft, dien en blijft niet inder hant.

14

^+† Ghelijck hy naect van zijnder moeder lichaem is ghecomen, soo vaert hy weder wech, ghelijc hy gecomen is, ende en neemt niet met hem van sinen arbeyt in zijnder hant, als hy wech vaert.

+ C vers 14

† Iob. 1.c.21. 1.Tim. 6.b.7.

15

Dat is een boose plaghe, dat hy wech vaert soo hy ghecomen is. Wat helpet hem dan, dat hy inden wint ghearbeyt heeft?

16

Sijn leuen lanc heeft hy int duyster gheten, ende in grooten ommoet, ende crancheyt, ende truericheyt.

17

^* So sie ick nv dat voor goet aen, dat het fijn si: Alsmen etet ende drincket, ende goets moets is in allen arbeyt, die eene doet onder der Sonnen zijn leuen lanc, dat hem Godt gheeft: Want dat is zijn deel.

* Eccle. 2.d.24. 3.b.13.c.23. 1.Tim. 4.a.4

18

Want welcken mensche, Godt, rijckdom ende goeden ende ghewelt gheeft, dat hi daer af etet ende drincket voor zijn deel, ende vrolijc is in sinen arbeyt, dat is een gaue Godts.

19

Want die en denct niet vele aen dat ellendige leuen, de wijle dat Godt zijn hert met vruechden veruult.