Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Ouerdenckinghe van menigherley dinghen.

1

⁺ICk keerde my ende sach aen,^† alle die daer onrecht lijden onder der Sonnen, Ende siet, daer waren tranen der gheender die daer onrecht leden, ende en hadden gheenen trooster. Ende die hen onrecht deden die waren te machtich, alsoo dat si gheenen trooster ghehebben en costen.

+ A vers 1

† Abac. 1.a.2. Eccle. 5.a.7.

2

Doen loofde ick de dooden, die al te voren ghestoruen waren, meer dan de leuende, die dat leuen noch hadden.

3

Ende dien noch beter dan die beyde, die noch niet en is, ende de boose wercken niet en siet, die onder der Sonnen gheschieden.

4

Ick sach aen den arbeyt, ende gheschictelijcheyt in allen saken, Daer benijde deene den anderen. Dat is ymmer ooc ydelheyt ende moeyte.

5

Want een Sot slaet de vingheren in malcanderen, ende verslint zijn vleesch.

6

^† Het is beter een hant vol met rusten, dan beyde vuysten vol met moeyte ende iammer.

† Psal. 37.b.16. Prou. 15.b.16 16.b.8. Eccle. 29.d.30. 1.Tim. 6.b.8.

7

⁺Ick keerde my, ende sach aen de ydel-heyt onder der Sonnen.

+ B vers 7

8

Daer is een mensche alleen ende niet zijn tweeder, ende en heeft, noch kint, noch broeder, nochtans en is zijns arbeyts gheen eynde, ende sine ooghen en worden des Rijckdoms niet sadt. Voor wien arbeyde ick doch, ende breke mijnder sielen af? Dat is ymmer ooc ydelheyt, ende een quade moeyte.

9

So isset ymmer beter twee dan een: Want si ghenieten doch haers arbeyts wel.

10

Valt haerder eene, so helpet hem zijn gheselle op. Wee den ghenen die alleene is, Als hy valt so en is daer geen ander, die hem op helpe.

11

Ooc als twee by malcanderen liggen, verwermen si malcanderen. Doch hoe can een alleen werm gheworden?

12

⁺Eene mach verweldicht worden: Maer twee mogen wederstaen. Want een drieuoudich snoer en breect niet lichtelijck in tween.

+ C vers 12

13

Een arm kint dat wijs is, is beter dan een oude Coninck die een Sot is, ende en weet hem niet te voorsien.

14

^‡ Daer coemt eene wt der gheuanckenisse totten Conincrijck:^* Ende een ander die in sine Conincrijcke gheboren is, verarmet.

‡ Gen. 41.b.14. 1.Reg. 16.c.11.

* 3.Re. 12.c.16. 2.Par. 33.c.11. 4.Reg. 25.a.5

15

Ende ick sach, dat alle de leuende onder der Sonnen wandelen by eenen anderen kinde, die in des gheens plaetse sal opcomen.

16

Ende des volcx dat voor hem henen ghinck, en was gheen eynde, ende des, dat hem nae ghinck. Ende en werden van hem nochtans niet blijde, Dat is ymmer oock ydelheydt, ende een iammer.