Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

1

¶ Hy leert dat alle dinc sinen tijt heeft.

2

⁺EEn yegelijc dinc heeft sinen tijt. Ende aller voornemen onder den Hemel heeft sine vre.

+ A vers 2

3

^† Gheboren te worden, heeft sinen tijt.^* Steruen, heeft sinen tijt. Planten heeft zijnen tijt. Wtroeyen dat gheplant is, heeft sinen tijt.

† Eccle. 14.c.16.

* Iob. 14.a.4

4

Dooden heeft sinen tijt. Heelen heeft sinen tijt. Te stucken breken heeft zijnen tijt. Timmeren heeft sinen tijt.

5

^† Weenen heeft sinen tijt. Lachen heeft sinen tijt. Roudraghen heeft sinen tijt. Danssen heeft zijnen tijt.

† Prou. 14.b.13

6

Steenen verwerpen heeft sinen tijt. Steenen vergaderen heeft sinen tijt.^† Inden arm nemen heeft sinen tijt. Verre te zijn van inden arm te nemen heeft sinen tijt.

† 1.Cor. 7.a.5.

7

Soecken heeft sinen tijt. Verliesen heeft sinen tijt. Bewaren heeft zijnen tijt. Wechwerpen heeft sjnen tijt.

8

Schueren heeft sinen tijt. Toenaeyen heeft sinen tijt.^† Swijghen heeft sinen tijt. Spreken heeft sinen tijt.

† Eccle. 20.a.6.

9

Beminnen heeft sinen tijt. Haten heeft sinen tijt.^* Strijdt heeft sinen tijt. Vrede heeft sinen tijt.

* Esai. 45.a.7.

10

⁺Men arbeyde soomen wil, so en canmen doch niet meer^† wtrichten.

+ B vers 10

† Beschicken.

11

Daer wt sach ick de moeyte, die God den menschen ghegeuen heeft, dat si daer in gheplaecht worden

12

(Maer hy doet alle dinck fijn tot zijnder tijt) Ende laet haer

[p. 236r]

herte beangsten, hoe dattet gaen sal inder werelt: Want de mensce en can doch niet verstaen dat werck dat Godt doet, noch dat beghinne noch eynde.

13

^† Daerom mercte ick, dat niet beters daer in en is, Dan vrolijck zijn, ende hem goetlijc doen in zijnen leuen.

† Eccle. 2.d.24. 5.c.17.

14

Want een yeghelijck mensche die daer eet ende drinct, ende heeft eenen goeden moet in alle sinen arbeyt, dat is een gaue Godts.

15

Ick merckte, dat alle wat Godt doet, dat bestaet alle tijt, men can daer toe niet ghedoen, noch af ghedoen. Ende sulcks doet Godt, datmen hem voor hem vreesen sal,

16

Wat God doet, dat staet daer, ende wat hy doen wil, dat moet worden. Want hy peynst, ende iaghet hem nae.

17

⁺Voort sach ick onder der Sonnen, steden des oordeels, daer was een Godloos wesen: Ende steden der gherechticheydt, daer waren Godtloose.

+ C vers 17

18

Doen dachte ick in mijnder herten: Godt moet oordeelen den gerechten ende Godtloosen. Want alle dat voornemen heeft sinen tijt, ende alle wercken.

19

^† Ick sprac in mijn herte vanden wesen der menschen, daer in Godt betoont, ende laettet aensien, als waren si onder malcanderen, ghelijck dat Vee.

† Eccle. 2.b.14. Psal. 49.a.11

20

Want het gaet den mensche ghelijc den Vee. Ghelijck als dit sterft, soo sterft hy ooc, ende hebben alle beyde eenderley Aseme. Ende de mensche en heeft niet meer, dan dat Vee. Want alle dinck is ydelheyt.

21

Alle dinck vaert tot eender plaetsen. Alle dinck is van stof ghemaect, ende wort weder tot stof.

22

^† Wie weet oft den Asem der menschen opwaerts vare, ende den Asem des Vees onderwaerts onder de Aerde vare?

† Eccle. 12.b.7.

23

^* Daerom segge ick, datter niet beters en is, dan dat een mensche vrolijc sy in sinen arbeydt. Want dat is zijn deel. Want wie wilt hem daer toe brenghen, dat hy sie, wat nae hem gheschieden sal?

* Eccle. 2.d.24. 3.b.13. 5.c.17. 8.c.15.