Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxj. Capittel.

¶ Hier vermaent ende waerschout ons de wijsheydt, dat wy ons voor boose wijuen wachten sullen, Ende daer nae beschrijftse eenen beeldenaer, oft beworpsel van eender eerbaerder, vroomer, ghehouder vrouwen.

1

⁺ DIt zijn de woorden des Conincks Lamuel, De leeringhe die hem sine moeder leerde.

+ A vers 1

2

Och mijn wtuercorene, O ghy Sone mijns Lichaems, Och mijne gewenschte Sone.

3

En laet den vrouwen v vermoghen niet: Ende en gaet de weghen niet, daer hen de Coninghen in verderuen.

4

O niet den Coninghen, Lamuel en^† gheeft den Coninghen gheenen wijn te drincken, noch den Vorsten stercken dranck.

† Eccle. 19.a.6.

5

Sy mochten anders drincken, ende der Rechten vergheten, ende veranderen erghens de saken der ellendigher lieden.

6

Gheeft stercken dranck den genen die vergaen sullen,^† ende den wijn den bedroefden sielen,

† Eccle. 32.a.7. Psa. 104.b.15

7

Op dat sy drincken, ende haerder ellendicheydts vergheten, ende haers onghelucx niet meer en ghedencken.

8

Doet uwen mont open voor den stommen, ende voor de sake aller, die verlaten zijn.

9

Doet uwen mont open, ende oordeelt recht, ende wreeckt den ellendighen ende armen.

10

^+† Wien een duechtsaem wijf verleent is, die is veel edelder dan de costelike peerlen.

+ B vers 10

† Prou. 18.c.22. 19.b.14. Eccle. 26.a.1.

[p. 235r]

11

Haers mans herte derf hem op haer verlaten, ende neringhe en sal hem niet ghebreken.

12

Sy doet hem goet, ende gheen quaet alle zijn leefdaghe.

13

Sy gaet met wolle ende vlasch om, Ende arbeyt gheerne met haren handen.

14

Sy is gelijc als een Coopmans Scip, dat sine neeringhe van verre brengt.

15

Sy staet snachts op, ende gheeft haren huyse voetsel, Ende teten haer maerten.

16

Sy denct nae eenen Acker, ende coopt dien, Ende plantet eenen wijnberch vanden vruchten haerder handen.

17

⁺ Sy gordet hare lendenen vaste, ende stercket hare armen.

+ C vers 17

18

Sy merckt hoe dat hare hanteringhe^† vroomen brengt, haer keersse en gaet snachts niet wt.

† Voordeel.

19

Sy strect hare hant na den spinrock, ende hare vingheren vaten de spille.

20

Sy^† breydet hare handen wt totten Armen, Ende reycket hare hant den nootdruftighen.

† Deut. 15.a.8. Prou. 11.c.24 28.d.27. 2.Cor. 9.b.9.

21

Sy en vreest voor haren huyse niet voor den sneeu: Want haer geheel huys heeft dubbelde cleederen.

22

Si maect haers selfs Deckens, witte zijde ende purperen is haer cleedt.

23

Haer man is vermaert inder poorten, Als hy sit by de Ouders des Lants.

24

Sy maeckt eenen rock ende vercoopten, een gordeel gheeft sy den Cremer.

25

Haer chieragie is dat reyn ende neerstich is,^† ende sal hier naemaels lachen.

† Luce. 6.c.21.

26

⁺ Sy^* doet haren mont open met wijsheyt: Ende op haer tonghe is heylsame leeringhe.

+ D vers 26

* Psa. 37.d.30

27

Sy aenschouwet hoet in haren huyse toegaet: ende en etet haer broot niet met luyheyt.

28

Hare sonen comen op, ende prijsense salich: Haer man looftse.

29

Veel dochteren brenghen rijckdom te samen: Maer die gaetse alle te bouen.

30

Lieffelijck ende schoon zijn, en is niet: Een wijf, die den HEEre vreest, salmen louen.

31

Sy sal gepresen worden vanden vruchten haerder handen, Ende hare wercken sullense louen inde poorten.

¶ Eynde des Boecx der Spruecken Salomonis.